Statistika - shafqatsiz soha: oqni oq deydi, qorani qora. Hayotda esa omad bilan omadsizlik yonma-yon yuradi - g'olib bor joyda mag'lubning bo'lishi muqarrar. Xullas, 2015 yilning omadlilari aniqlanib, o'z sovrinlarini olib bo'lishdi. Endi navbat - «qora» sahifadan joy olganlarga.
Futbolchi: Eden Azar
So'nggi yillarda bu futbolchini shunchalik ko'p maqtashdiki, «ettinchi osmon»dan qulashi muqarrar bo'lib qoldi. Avvalgi mavsumda Azar Belgiya terma jamoasida samarali o'ynagan bo'lsada, «Chelsi» muxlislariga gol ulashishdan to'xtab qoldi. Joriy mavsumda esa uning o'yin saviyasi umuman tushib ketdi. 25 uchrashuvdan faqat bittasida, sentyabr oyidagi «Arsenal»­ga qarshi bahsda u talab darajasida to'p surdi. Eden faoliyatidagi inqiroz davri Mourinoning omadsizlik pallasiga to'g'ri kelib, oqibatda ham klubning, ham murabbiy va futbolchining nufuziga putur etdi. Doimiy ravishda «Benazir»ni yoqlaydigan muxlislar belgiyalik futbolchini «jamoa kalamushi»ga chiqarib qo'yishdi. Xullas, 2015 yilni Eden Azar qanchalik tez unuta olsa, shuncha yaxshi bo'ladi.
Murabbiy: Rafael Benites
Shu paytgacha qizg'in bahslarga sabab bo'lib kelgan «Benites malakali murabbiymi?» mavzusi 2015 yilda abadiylikka yuz tutdi. Boz ustiga, uni «kuboklar mutaxassisi» sifatida etirof etish orqali yonini oladigan tarafdorlari endi sukut saqlashga majburlar. Chunki ispaniyalik mutaxassisning bu maqomga loyiq emasligi oydinlashib qoldi. Yodingizda bo'lsa, may oyida Benitesning «Napoli»si ichki chempionat yoki ELdagi natijalari orqali EChL yo'llanmasini qo'lga kiritishga urinib ko'rgandi. Ammo har ikki urinish ham naf bermadi. Avvaliga Benites shogirdlari murosasiz yarim final duelida «Dnepr»dan engilishdi. Qizig'i shundaki, neapolliklarning argentinalik hujumchisi Gonsalo Iguain agarda jamoasi «Dnepr» to'sig'idan o'ta olmasa, o'z faoliyatini yakunlashga ont ichgandi. Biroq mag'lubiyatdan so'ng qasamini unutdi. Ehtimol, u o'z va'dasida turganida «Napoli»ga yaxshiroq bo'larmidi - «A» seriya­dagi «Latsio»ga qarshi bahsda aynan Iguain­ning xatosi jamoani EChL yo'llanmasidan judo qildi.
«Real»ga o'tganidan keyin ham Benites o'zining «kuboklar mutaxassisi» fazilatini ko'rsata olmadi. «Qirollik klubi» turnir jadvalining ikkinchi yarmida borayotgan jamoalardan 3 ochko tortib olishni uddaladi. Lekin asosiy raqobatchilarga qarshi bahslarda oqsab qoldi - etakchi jamoalar bilan kechgan 7 uchrashuvning 4tasida qimmatli ochkolarni boy berdi, «Barselona»dan o'z uyida 0:4 hisobida engildi.
Davomi InterFUTBOL gazetasi blogida.
— deya xabar beradi uff.uz nashri.