2016 yilning 21-25 yanvar kunlari Belgiyaning Antverpen shahrida suzish bo'yicha xalqaro turnir o'tkazildi. Ushbu nufuzli musobaqada O'zbekiston terma jamoa a'zolari 3 ta oltin, 1 ta kumush va 2 ta bronza medalini qo'lga kiritib, umumjamoa hisobida Buyuk Britaniya, Litva, Portugaliya va Belgiya davlatlaridan so'ng 5 o'rinni egallashdi.
Terma jamoamiz hisobiga oltin medallarni Vladislav Mustafin 50 (27.83 soniya) va 100 metr (1.00.64 soniya) masofalarga brass usulida suzish musobaqalarida, Ra'noxon Amanova esa 200 metrga (2.12.53 soniya) kompleks usulda suzish bahslarida keltirishdi.
Ra'noxon Amanova, shuningdek, 400 metr masofaga kompleks usulda suzish musobaqasida marra chizig'iga 4.40.71 soniyada etib kelib, kumush medal sovrindori bo'ldi.
Terma jamoamizning yana bir tajribali sportchisi Aleksey Derlyugov ham bir yo'la ikki yo'nalishda bronza medali sovrindori bo'ldi. Jumladan, 200 metr masofaga kompleks usulda suzish bahsida 2.03.57 soniya natija bilan uchinchi o'rinni egallagan bo'lsa, 400 metrga kompleks usulda suzish musobaqasida 4.25.96 soniya natijani qayd etgan holda terma jamoamiz hisobiga yana bir bronza medalini keltirdi.
Mavsumning ilk xalqaro musobaqasida munosib ishtirok etgan terma jamoamiz a'zolari 26 yanvar kuni Vatanimizga qaytib keladilar. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.