“Lokomotiv” bugundan e'tiboran Toshkentdagi mashg'ulotlarini boshlaydi. Shanba kuni kechki payt Dubaydagi yig'indan qaytib kelgan futbolchilarga ikki kunlik dam berilgandi. Bugun tushda ular bosh murabbiy Mirko Elichich ixtiyoriga etib kelishadi hamda 1 fevralga qadar kuniga bir mahaldan mashg'ulot o'tkazishadi. 2 fevral kuni jamoa a'zolari horijdagi ikkinchi yig'inni o'tkazish uchun Dubay shahriga yo'l olishadi. Poytaxtimizdagi yig'in davomida bitta o'rtoqlik uchrashuvi o'tkazish rejalashtirilgan. 29 yanvar kuni “Buxoro” klubi TTMIga qarashli stadionda mehmon bo'ladi. Uchrashuv soat 11:00 da boshlanadi. Bugun klub bazasida “Lokomotiv”ning barcha futbolchilari jam bo'ladi. O'zbekiston olimpiya terma jamoasi bilan Qatardan qaytib kelgan Ikrom Aliboev ham mashg'ulotlarga qo'shiladi. Faqatgina Sadriddin Abdullaevda kichik jarohat bor. Katta ehtimol bilan u bugundan e'tiboran yakka holda yugurishni boshlaydi. Dubaydagi birinchi yig'inda murabbiylar shtabi ikkita legioner futbolchini sinovdan o'tkazib ko'rgani haqida xabar bergandik. Chernogoriyalik Ivan Vukovichning harakatlari klub mutaxassislariga ma'qul kelmadi va u Dubayning o'zida “Lokomotiv” bilan xayrlashdi. Serbiyalik Nenad Inyats esa “temiryo'lchilar” safida Toshkentga etib kelgan. Hujumchining “Lokomotiv” safida qolish yoki qolmasligi hozircha aniq emas. Slovakiya termasiga qarshi o'yinda faqatgina bitta bo'limda harakat qilgani uchun, u haqda aniq xulosaga kelish qiyin edi. Voqealar rivoji bilan tanishtirib boramiz.
— deya xabar beradi uff.uz nashri.