Xabaringiz bor, «MYu» ustozi Lui van Gal va britan OAVlari o'rtasidagi «jang» ayni kunlarda rosa avjiga chiqdi. Mojaroga esa bundan bir oylar muqaddam gollandiyalik murabbiyning iste'foga chiqqani haqida tarqatilgan xabar sabab bo'ldi. Aniqrog'i, The Sun nashri xuddi shunday yangilikni chop etdi. Natijada, mutaxassis britaniyalik jurnalistlar undan uzr so'rashlarini talab qildi. «Kechirimlar» esa shu qadar istehzoli yangradiki...
Xullas, o'shanda van Galdan «inglizcha uzr» mana bunday tarzda so'raldi:
«Kechiring, ketma-ket 6 o'yinda g'alaba qozonmaganingiz uchun;
Kechiring, 1-o'rindan 5-o'ringa tushib ketganingiz uchun;
Kechiring, ChLdek muhim musobaqadan ayrilganingiz uchun;
Kechiring, muxlislar jamoangiz o'yinidan o'lguday zerikishgani uchun;
Kechiring, shularning hammasi uchun 250 million funt sarflaganingiz uchun;
Kechiring, «MYu» fanatlari, uning haligacha iste'foga chiqmagani uchun».
Hali bu «kechirim» mavzusi tugamay turib, Lui van Gal «Nyukasl»ga qarshi kechgan o'yindan so'ng Runining ortiqcha vazni haqida savol bergan jurnalist Nil Kastisning o'zini semizlikda aybladi. O'z nav­batida, jurnalist unga qarshi javob qaytardi. «Lui, eng avvalo, ortiqcha vazn borasidagi muammoimni ko'rsatib berganingiz uchun sizdan minnatdorman. Buni sezmagan ekanman. Ammo endi o'z oldimga maqsad qo'ydim - ozishga harakat qilaman. Ammo sizning jamoangiz men tashlagan vazncha ochko yig'a olarmikan? Ikki stoun (taxminan 12,7 kilogramm) ozmoqchiman. Bu esa 28 funt bo'ladi. Biroq siz may oxiriga qadar shuncha ochko yig'a olarmikansiz?».
Vaholanki, Lui van Gal «MYu»dagi yangi vazifaga o'tirish bilanoq Gollandiyaning NRC nashri (adadi bo'yicha mamlakatda to'rtinchi o'rinda turuvchi mashhur gazeta) darhol britaniyalik jurnalistlarga yuzlanib, ularni mutaxassis bilan muomalada ehtiyotkorlikka undashgandi. Aniqrog'i, gollandiyalik muxbirlar van Gal bilan muloqotda zarur bo'ladigan 10ta qoidani ishlab chiqib, uni ingliz jurnalistlari havola qilishgandi. Lekin inglizlar bu qoidalarga etarlicha e'tibor qaratishmadi. Oqibatda, janob Lui britan OAVlari bilan tortishib qoldi.
Gollandiyalik jurnalist­larning murojaati:
«Hurmatli britaniyalik hamkasblar! Sizlar endi Lui van Gal bilan ishlashinglarga to'g'ri keladi. Shunday ekan, ishonchsizlik, shubhalar, tushunarsiz holatlarga to'qnash kelasiz. Demak, «o'yindan keyingi intervyu» deb ataladigan «sayohat»ga yo'l olar ekansiz, avvalo, quyidagi qoidalarga diqqat bilan e'tibor berishingiz talab etiladi.
1. Lui van Galning har qanday kayfiyatiga tayyor turishingiz lozim. Chunki boshqa murabbiylardan farqli o'laroq, uning kayfiyati jamoa yutgan yoki yutqazganiga bog'liq bo'lmaydi. G'a­­­labadan keyin van Galning qiyofasida mamnunlikni sezsangiz ham ehtiyot bo'ling - birgina omadsiz savol uni izdan chiqarishi mumkin.  
2. Suhbatni, yaxshisi, neytral mavzulardan boshlang: «Jamoaning o'yinini qanday baholaysiz?», «O'yin haqida nima deysiz?» kabi. «Siz natijadan juda hayron qoldingiz, shekilli?» - juda nomaqbul savol. Hamisha yodda tuting: siz hozirgina ko'rgan o'yin va van Gal ko'rgan o'yin - umuman boshqa-boshqa. Lui, agar futbolchilar uning ko'rsatmalarini bexato bajarishgan bo'lsa, «Old Trafford»da autsayderdan uchralgan mag'lubiyatdan so'ng ham qoniqish hosil qilaveradi. Bu holatda tablodagi hisobning ahamiyati yo'q. Agar siz bunday deb o'ylamasangiz, murabbiydan intervyu olmay qo'ya qoling.
3. O'zingizni tanishtirmang! Aks holda, u sizni eslab qoladi-da, bundan o'zingizga qarshi foydalanadi. Xullas, siz mikrofon ushlagan oddiy muxbirdan urishish va janjallashish mumkin bo'lgan «qandaydir» Gari, Klayv yoxud Toniga aylaning. Ana o'shanda van Gal siz bilan jang boshlaydi.
4. Mavzudan og'ishmang! Agar o'yin haqida bo'lsa, aynan u haqda savol bering. Keyingi uchrashuv, transferlar, mashg'ulotlar - bu mavzulardan aslo og'iz ochmang. Aks holda, boshqa mavzudagi har qanday savol sizning so'nggi so'rovingizga aylanadi.
5. Suhbatni boshladingizmi, tamom, ingliz tili sizning emas, van Galning ona tiliga aylanadi. Boshqacha aytsak, van Gal qaerda ishlasa, mahalliy tilni darhol o'ziniki qilib oladi. Jumladan, u Germaniyada «o'lim yoki gladiolus» («hammasi yoki hech nima» ma'nosida) iborasini ommalashtirdi. Lui uchun iboralarni lug'atga solishtirib ko'rish shart emas. Nega bunday? Negaki, bu endi van Galning tili, siznikimas. Gap shundaki, van Galning so'zlarni bilib-bilmay ishlataverishi - uning aybi emas. Faqat bu iboralarni to'g'ri ma'noda tushuna olmaganingiz uchun siz aybdorsiz.
6. Intervyuning «chorraha» shaklini olishiga yo'l qo'ymang. Albatta, bu juda qiyin masala. Negaki, van Galdan olinadigan intervyular har doim intervyu haqidagi intervyuga o'xshab qolaveradi. Tushunarliroq qilib aytsak, Lui biroz muddatdan so'ng sizning savollaringiz haqida sizga savol beraveradi. Bunday lahzalarda qochgani joy topolmay qolasiz! Agar ish shu taxlit ko'rinish ola boshlasa, suhbatni darhol to'xtating. Aks holda, muloqot qisqa fursatda Youtube portaliga joylanib, sizni xijolatda qoldiradi.
7. Savollarni sira qaytarmang! Chunki har qanday holatda ham hech qachon yangi fikr eshitmaysiz. Van Galni dog'da qoldirishning iloji yo'q. Siz savolingizni juda o'tkir aql bilan berdim o'ylasangiz ham, u sizga shunday javob qaytaradi: «Axir hozirgina sizga shu haqda gapirdim-ku!». O'jar bo'lmang, shunchaki, olg'a qarab boravering. Ammo xuddi «uxlab yotgan politsiyachi»ni aylanib o'tayotgandek juda ehtiyot bo'ling!
Davomi InterFUTBOL gazetasi blogida.
— deya xabar beradi uff.uz nashri.