Ba'zan orasidan qil ham o'tmaydigan qalin do'stlar ham o'zaro qo'l ko'tarishga borishlarini inobatga olsak, o'ta asabiy kasb vakillari bo'lgan futbolchilarning mushtlashishlaridan ajablanmasa ham bo'laveradi.
Lekin stadionga ajoyib futbol spektakli umidida kelgan aksariyat muxlislarga bunday mushtlashuvlar yoqmasligi aniq. Umuman, urish­qoqlik chinakam insonga xos bo'lmagan sifatlardan bo'lsada, ayrim o'yinchilar o'z kamchiliklarini yashirish yoki raqiblarini qo'rqitish maqsadida jamoadoshlariga qo'l ko'taradilar. Shunday noxushliklarga imkon qadar kamroq guvoh bo'lishga umid qilgan holda futbolchilar o'rtasidagi ayrim mojarolarni yodga oldik.
Li Boyer va Kiron Dayer
Futbolchilik faoliyatining ilk davrida Li va uning «Lids»dagi jamoadoshi Jonatan Vudgeytlar birgalikda pokistonlik talaba yigitni do'pposlash orqali tanilishgandi. Keyin Boyer o'z jamoadoshi bilan mushtlashishdan ham o'zini tiya olmadi: «Nyukasl» o'z uyida «Aston Villa»ga 0:3 hisobida mag'lub bo'layotgan o'yinda u Dayer bilan mushtlashib ketdi. Vaholanki, bu ikki jamoadosh o'zlarining qofiyadosh familiyalaridan foydalangan holda serdaromad firma yoki mukammal sahna duetini tashkil etishlari mumkin edi. «Boyer va Dayer» - o'ta jarangdor! To'g'rimi? Ammo maydondagi mojaro uchun uchrashuv hakami «bokschi-qarg'alar»ni maydondan chetlatdi. Ta'bi tirriq bo'lgan «Nyukasl» bosh murabbiyi o'yindan keyin afsus bilan shunday degandi: «Ular «Nyukasl» nomiga dog' tushirdilar. Boz ustiga, bu dog'ni butun mamlakatga namoyish etdilar».
Sportchilarga xos bo'lmagan qilig'i uchun Li Boyer 7ta uchrashuvga diskvalifikatsiya qilindi, lekin jamoada qoldi.
Bryus Grobbelar va Stiv Makmanaman
Maydonda «krutoy» sifatida nom qozongan Grobbelar haqida uzoq hikoya qilish mumkin. Bir kuni Bryus «Everton» bilan bo'lgan derbi bellashuvida burchak zarbasidan yo'llagan to'pni o'z darvozasidan o'tkazib yubordi. Sharmandalikka chiday olmagan posbonning ko'zi yosh Makmanamanga tushdi. U o'z jamoadoshining yoqasidan olib, do'pposlay ketdi. Keyinchalik jahlidan tushgan Grobbelar o'z qilmishini shunday izohladi: «Aslida, golni o'tkazib yuborishimda boshqa o'yinchi aybdor edi. Lekin Stiv undan ko'ra yaqinroq turgandi. Shu bois, undan alamimni olib qo'ya qoldim. Xatoga yo'l qo'ygan jamodoshim esa qora tanli yigit edi. Agarda men uni jazolaganimda, ertasiga barcha gazetalar meni irqchiga chiqarib qo'yardilar».
Vladislav Radimov va Fernando Riksen
«Bokschi-futbolchilar» faqat Angliyada emaslar. Ularni boshqa mamlakatda ham uchratish mumkin. Mavsumga tayyorgarlik ko'rayotgan «Zenit» «Malaga»ga qarshi maydonga tushgandi. Vaziyatlarning birida Shkrtelning harakati Radimovga yoqmadi. Sardor slovakiyalik jamoadoshiga tanbeh berdi. Lekin kutilmaganda Fernando Riksen Martinning yonini olib, Radimovga qarshilik ko'rsata boshladi. Oqibatda gollandiyalik «bokschi» nafaqat Vladislavga, balki Shkrtelga ham musht otib yubordi. Shu tariqa Radimov sardorlik bog'ichidan, Riksen bilan Shkrtel esa kattagina mablag'dan judo bo'lishdi.
Kreyg Bellami va Yon-Arne Riise
Mashaqqatli mashg'ulotdan so'ng «Liverpul» a'zolari karaoke barda hordiq chiqarishgan, futbolchilar navbatma-navbat qo'shiq ijro etishgandi. Lekin Riise nima uchundir kuylashni istamadi. Bundan jahli chiqqan Bellami norvegiyalik himoyachiga qo'pol hazillar qila boshladi. Tabiiyki, Yon-Arne ham javob qaytara boshladi. Rafael Benitesning aralashuvi mojaroga nuqta qo'ygandek edi. Biroq kechqurun qaerdandir golf klyushkasini topib olgan Kreyg Yon-Arneni bir nechta kuchli «uzatma»lar bilan siyladi. Oradan ikki kun o'tgach uelslik hujumchi «Barselona» darvozasiga urgan golini ham golf uzatmasi ko'rinishida nishonladi. Shundan keyin «Liverpul» a'zolari o'z gollarini shu tariqa nishonlaydigan bo'lishdi.
Mario Balotelli barcha jamoadoshlariga qarshi
O'z jamodoshlari bilan janjallashish borasida Mario Balotelli - mutlaq chempion! Birgina «Manchester Siti»dagi faoliyati davomida italiyalik hujumchi nafaqat futbolchilar, hatto bosh murabbiy Roberto Manchini bilan ham jiqillashishdan tap tortmagan. Uning «bokschi»lik mahoratidan Karlos Teves, Jerom Boateng, Vensan Kompani, Mayk Richards va boshqa bir qator o'yinchilar «bahramand» bo'lishgan. Yana bu janjalkash futbolchining «Nima uchun doimo men?» degan nozu firog'iga nima deysiz?
Davomi InterFUTBOL gazetasi blogida.
— deya xabar beradi uff.uz nashri.