O'zbekiston professional futbol ligasi 2016 yilgi mamlakat kubogi bahslari uchun qur'a tashlash marosimini o'tkazdi.
To'rt karra O'zbekiston kubogi sohibi, o'tgan mavsum finalchisi Toshkentning “Bunyodkor” jamoasi bahslarga 1/8 final doirasidan qo'shiladi.
Ushbu bosqichdagi raqibimiz “Oq-tepa” va “Obod” jamoalari o'rtasidagi uchrashuvdan so'ng ma'lum bo'ladi. G'olibni bitta uchrashuv natijasiga ko'ra aniqlaydigan “Oq-tepa” – “Obod” qarama-qarshiligi “Navro'z” bayrami arafasida aniqlanadi.
Nimchorak finaldan boshlab bahslar uy-safar tizimida o'tkaziladi. Ushbu bosqichning birinchi uchrashuvlari 25-26 mart kunlariga mo'ljallangan. Javob o'yinlari esa 21 may kuni o'tkaziladi.
Qayd etish kerakki, “qaldirg'ochlar” finalga qadar etib borgudek bo'lishsa, bu orada amaldagi chempion “Paxtakor” bilan ham, amaldagi kubok sohibi “Nasaf” bilan ham to'qnash kelmaydi.
Hal qiluvchi final uchrashuvi 27 noyabr sanasiga mo'ljallangan.
— deya xabar beradi uff.uz nashri.