2015 yilning 4-10 oktyabr kunlari Qozog'istonning Chimkent shahrida kamondan otish sport turi bo'yicha o'tkazilgan xalqaro xotira turnirida hamyurtlarimiz to'rtta bronza medaliga sazovor bo'ldilar.
Jumladan, xotin-qizlar o'rtasida bo'lib o'tgan shaxsiy musobaqalarda Munira Nurmanova ikki bor 70 metr masofaga kamondan otish bahslarida uchinchi o'rinni egallagan bo'lsa, jamoaviy hisobda Irina Savinova, Madina Akramova hamda Munira Nurmanovalardan iborat jamoamiz ham bronza medali bilan taqdirlandilar.
Erkaklar o'rtasida o'tkazilgan musobaqalarda shaxsiy hisobda ishtirok etgan Islom Sayfullin ikki bor 70 metr masofaga kamondan otish musobaqasida bronza medalni qo'lga kiritish bilan birga, xalqaro toifadagi sport ustasi talabini ham bajardi.
Jamoaviy bahslarda ham muvaffaqiyatli ishtirok etgan Islom Sayfullin, Amet Umirov va Shaxboz Xojibekov uchligi bronza medali sovrindori bo'ldilar.
Ma'lumot uchun. Mazkur xalqaro xotira turnirida O'zbekiston terma jamoasi bosh murabbiyi Gulnora Aripova boshchiligida jami 13 nafar sportchimiz ishtirok etdilar. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.