Ko'pincha ommaviy axborot vositalarida murabbiylar va o'yinchilarning turli vaziyatlar munosabati bilan bergan intervyularini, bildirgan fikrlarini o'qib qolamiz. Ularning aksariyatida asosan umumiy fikrlar bildirilgan bo'ladi. Futbolchi va murabbiylar ommaviy jurnalistlar bilan muloqotda iloji boricha ehtiyot bo'lishga harakat qilishadi. Sababi xuddi gollivud filmlarida politsiyachilar tomonidan gumonlanuvchilarni qo'lga olayotganda aytilganidek: "Har bir so'zingiz o'zingizga qarshi ishlatilishi mumkin". Joze Mourino singari dilidagi tilida bo'lgan insonlar futbolda, umuman, har qanday sohada ham kam. Quyida e'tiboringizga futbolchi va murabbiylarning turli intervyularini havola qilar ekanmiz, ularning tilidagi gaplari bilan dillaridagi fikrlarni ham taxmin qilishga urinib ko'rdik. (Albatta, bularni jiddiy ravishda qabul qilmaysiz, degan umiddamiz. Yarim hazil, yarim chin) Musobaqa autsayderiga qarshi o'yindan oldin murabbiy fikrlari:
Tilida: "Biz raqibimizni hurmat qilamiz. Ular juda yaxshi o'yin namoyish qilishmoqda. Jamoa tarkibida bir qator kuchli futbolchilar bor. Shu sababli bizni qiyin o'yin kutib turibdi"
Dilida: "Bu jamoani umuman mensimaymiz. Yarim kuch bilan yutib qo'yishimiz mumkin. Mabodo g'alaba qozonsak, bu g'alabamiz bilan ko'proq maqtanish uchun raqibni maqtayapman. Agar ochko yo'qotadigan bo'lsak, oldindan bahona tayyorlab qo'ygan ham yaxshi". O'rtamiyona futbolchiga kuchli klub tomonidan qiziqish bildirilganda:
Tilida: "Mish-mishlarni men ham eshitdim. Albatta, bu klubning qiziqishidan xursandman. Ammo men o'z jamoamga sodiqman. Maqsadim, hozirgi jamoam bilan musobaqada chempionlikka erishish. Bu yo'lda qo'ldan kelgancha harakat qilmoqchiman"
Dilida: "Ishqilib, bu mish-mishlar rost bo'lsinda. O'sha kuchli klub vakillari qachon aloqaga chiqishar ekan-a? Agentimga aytib qo'yish kerak, hushyor bo'lib tursin. Iloji bo'lsa, kechqurun telefonini o'chirmay uxlasin. Tezroq bu chalajon jamoadan qochish kerak. O'sha klubga o'tsam, zo'r bo'lardi-da..." "Barselona"ga yangi o'tgan futbolchi birinchi intervyu berganda:
Tilida: "Barselona"ga o'tganimdan xursandman. Messi dunyoning eng zo'r futbolchisi. Bu futbolchi bilan birga to'p surish baxtiga erishganimdan xursandman".
Dilida: "Vachach! Men "Barsa"daman. Ko'zlarimga ishonmayman! Faqat shu har bir intervyuda Messini maqtash shartligi yoqmayaptida. O'zi eng zo'r futbolchi Messi deb kim aytdi?! Zo'r bo'lsa, o'ziga! Men undan zo'rroqman! Hali hammaga ko'rsatib qo'yaman! "Real"ga yangi o'tgan futbochli birinchi intervyu berganida:
Tilida: "Real" dunyoning eng kuchli klubi! Bu klubning bir qismiga aylanganimdan xursandman. Krishtianu Ronaldu dunyoning 1-raqamli futbolchisi! U mazkur yili "Oltin to'p"ni qo'lga kiritishiga ishonaman!
Dilida: "Urre, men "Real"daman! Tezroq o'zimni ko'rsatib, shartnomamni yana ikki yilga uzaytirib olsam, zo'r bo'lardi. Keyin oylikni ole-e-eb yuraverardim... Ronaldu va "Oltin to'p" mashmashasi jonga tegdida! Buncha ko'ngli nozik bo'lmasa buni! Intervyuda maqtamasang, sen bilan umuman gaplashmay qo'yarmish... Pfff... Barabir eng zo'ri - Messi! Bu erdagilar qachon buni tushunishar ekan-a?!" Tarkibga chaqirilgan futbolchilar borasida murabbiyga e'tiroz bildirilganda:
Tilida: "Biz hozirda eng yaxshi sport formasida bo'lgan futbolchilarni tarkibga chaqirdik"
Dilida: "O'zimga eng yaqin bo'lganlarni hammasini chaqirdim. Anovi ikkitasini asosiyda ikki-uch marta tushirsam, keyin biror chet el klubiga sotib yuborsak bo'ladi. Ishqilib, asosiyda tushirganimga yarasha gol-pol ham urib tursa yaxshi bo'lardi... Asosiyga tortadigan yana bir-ikki nafar zo'r bolalar bor edi-yu, faqat ularning agenti boshqa-da... Boshqa klubga sotilgani bilan, bir tiyinlik foydasi tegmaydi menga" Autsayder jamoaga qarshi o'yinda durang qayd etilgandan keyin murabbiyning fikrlari:
Tilida: "Hozir Osiyoda hamma futbol o'ynashni o'rganib olgan... Biz kuchli jamoaga qarshi to'p surdik. Shu sababli durangni ijobiy natija deb aytishimiz mumkin"
Dilida: "E lapashanglar... Shu jamoani ham yuta olishmadi... Essiz, o'yindan oldin uch ochko naqd deb o'ylagandim... Bekor kecha o'yindan oldin bolalarga tungi klubga borishga ruxsat bervoribman... Mana natijasi..." Chet eldan kelgan murabbiyning ilk intervyusi:
Tilida: "Men bu erga futbolni rivojlantirish, jamoani oldiga qo'yilgan maqsadlarga erishishida yordam berish uchun keldim. Yurtingizda futbolga qaratilayotgan e'tiborni ko'rib, ochihi hayron qoldim. Yurtingizda kuchli futbolchilar ko'p ekan"
Dilida: "Hm...Bunaqa katta pulga shartnoma tuzadigan ahmoqlarni endi ko'rishim... Bir-ikki yil mazza qilib yashayman, pulni qurtdek sanab olaman, keyin... uyga! Haqiqatan ham, bu erda futbolga qaratilayotgan e'tibor juda yuqori ekan. lekin undan unumli foydalanishni biladiganlar kam ekan. Kuchli futbolchilar ham tiqilib yotibdi, ammo ularning hammasi futboldan tashqarida. Menga berilgan ro'yxat bo'yicha futbolchilarni termaga chaqiraveraman-da! Menga nima!" Katta musobaqalardagi katta sharmandalikdan keyin murabbiylarning fikri:
Tilida: "Borimiz shu!"
Dilida: "Borimiz ham, yo'g'imiz ham shu!"
— deya xabar beradi uff.uz nashri.