27 yanvar kuni Qatar Yulduzlar Ligasida 16-turning dastlabki o'yinlari bo'lib o'tdi.
O'zbekiston milliy terma jamoasi yarim himoyachisi Sardor Rashidov faoliyat yuritadigan “Al-Jaish” ushbu turda “Al-Xor” jamoasi mehmoni bo'ldi. Uchrashuv 1:0 hisobida maydon egalari foydasiga yakun topdi. O'yindagi yagona golni 40-daqiqada Medson kiritdi. Rashidov o'yinni asosiy tarkibda boshladi va uni to'liq o'tkazdi.  
Ayni vaqtda Qatar Yulduzlar Ligasi turnir jadvalida “Al-Jaish” 32 ochko bilan ikkinchi o'rinni egallab turibdi. Chempionat peshqadami — “Ar-Rayan” hisobida 42 ochko mavjud va u 16-tur o'yinini bugun Sanjar Tursunovning yangi jamoasi “Umm-Salal”ga qarshi o'tkazadi. “Umm-Salal” ushbu tur oldidan 23 ochko bilan jadvalning 5-pog'onasidan joy olgan.
Sardor Rashidov ushbu mavsumda o'z jamoasining chempionatdagi barcha o'yinlarida maydonga tushdi. 12 bor u o'yinni asosiy tarkibda boshlagan bo'lsa, 4 bora zahiradan maydonga tushdi. Uning hisobida bugunga qadar 9ta gol bor.
— deya xabar beradi uff.uz nashri.