28 yanvar kuni Qatar Yulduzlar Ligasi 16-turi doirasidagi qolgan uchrashuvlar o'tkazildi. Ushbu turda O'zbekiston milliy terma jamoasi yarim himoyachisi Sanjar Tursunov o'zining yangi jamoasi — “Umm-Salal” tarkibida o'z debyutini o'tkazdi. Tursunov va uning jamoadoshlari bu turda o'z maydonida chempionat peshqadami “Ar-Rayan”ni qabul qilib, 0:2 hisobida mag'lubiyatga uchradi. Yangi jamoasi tarkibida 7-raqam ostida harakat qilayotgan Sanjar Tursunov bu o'yinni asosiy tarkibda boshladi va uni to'liq o'tkazdi. Ushbu turdan so'ng “Umm-Salal” hisobidagi ochkolar soni 23 taligicha qoldi va ular ayni vaqtda turnir jadvalining 6-pog'onasidan joy egallagan. Chempionat peshqadami  “Ar-Rayan” hisobida esa 45 ochko bor. Sardor Rashidov faoliyat yuritadigan “Al-Jaish” klubi bu turda mag'lub bo'lib, jadvalning uchinchi pog'onasiga tushdi.
— deya xabar beradi uff.uz nashri.