2015 yil Lyuk de Yong uchun ham xursandchilik, ham alam tortiq etdi. Ya'ni u PSVda muvaffaqiyat qozondi, klub bilan ChL guruh bosqichidan o'tdi. Biroq futbolchining Gollandiya termasidagi harakatlari gohida sog'lom fikrga mutlaqo to'g'ri kelmadi. «Borussiya» M. va «Nyukasl» klublari sobiq a'zosi FIFA.som saytiga bergan intervyusida aynan o'z muvaffaqiyatlari va kelajak rejalari haqida gapirib berdi.
- PSVning ChL «pley-off» raundiga chiqqani va urgan gollaringiz soniga qarab, 2015 yil siz uchun omadli kechdi, deyish mumkinmi?
- Yo'q, unchalik emas. Zero, asl maqsadimiz ham 1|8 finalga chiqish edi. To'g'ri, bu juda qiyinligini yaxshi tushunardik. Ha, mavsum men uchun yaxshi davom etyapti. Lekin qaytaraman, shaxsan o'zim ham boshidayoq barchasi shunday bo'lishini bilib, ko'p gol urishni ko'zlagandim. Asosiysi, kuchimga nisbatan ishonchim ortdi. Harqalay, jonajon vatanimda o'zimni juda qulay his etyapman, PSV esa xuddi uyimdek taassurot uyg'otyapti.
- Lekin ko'pchilik PSVdan ChL keyingi raundiga o'tishini kutmagandi. Klubingiz muvaffaqiyati siri nima?
- Avvalo, o'z salohiyatimizga ishondik, shuningdek, muxlislarimiz ham katta yordam berishdi. O'zi uyda g'alaba qozonish doimo yoqimli. Umuman, jamoaviy futbol ko'rsatdik. Sizga aytsam, beqiyos muxlislardan o'zgacha kuch oladigan jamoamizni engish juda qiyin. «Atletiko» bilan qarama-qarshiliklarda ham shu narsa katta rol o'ynasa, ajabmas. Chunonchi, birinchi o'yin Gollandiyada bo'lib o'tadi (24 fevral kuni). Demak, javob bahsi oldidan sezilarli ustunlikni ta'minlashimiz shart.
- Bir necha yil xorij - Germaniya va Angliyada o'ynadingiz, PSVga o'tib esa faoliyatingiz nihoyat, gurkirab rivojlandi.
- Bu men uchun nihoyatda muhim qadam edi. Ha, Germaniyada hammasi o'zim xohlaganchalik kechgani yo'q va bundan haligacha siqilaman. Aynan PSVdek klubga kelganim esa omadimning yurishganidir. Mana, o'tgan mavsum ajoyib o'ynab, sovrin yutdik, men Memfis Depaydan so'ng jamoaning ikkinchi yaxshi to'purariga aylandim.
- Joriy mavsum eredivizionda chempionlik poygasi qizg'in tus oladigan ko'rinadi: PSV, «Ayaks» va «Feyenoord» klublarini atigi bir necha ochko ajratib turibdi.
- O'ylaymanki, finishda 1-o'rinni egallashga qurbimiz etadi. Deylik, bu mavsum «Ayaks»ni ham, «Feyenoord»ni ham mag'lubiyatga uchratdik. Lekin boshqa ayrim raqiblar bilan o'yinlarda telbalarcha qimmatli ochkolarni boy berdik. Umumiy qaraganda, bizning jamoa tobora kuchayib boryapti va chempion bo'lishimizga shubham yo'q.
- PSVda o'ynab, doimiy tarzda Gollandiya termasidan chaqiruv olyapsiz. Garchi milliy jamoa qiyin davrni boshdan kechirayotgan bo'lsada, uning safiga qaytganingizdan xursanddirsiz...
- PSVga o'tayotgan paytim shu narsani asosiy maqsad sifatida belgilab olgandim. Afsuski, terma jamoaning oxirgi natijalari alam uyg'otdi. Evro-2016ga chiqolmaganimizni o'ylab, haligacha o'zimni qo'yarga joy topolmayapman. O'ylaymanki, qit'a chempionati tugaguncha barchamiz azoblanamiz. Lekin hozirdan Rossiyada o'tadigan JChga tayyorgarlik ishlarini boshlash kerak.
- 2010 va 2014 yillardagi mundiallarda yaxshi ishtirok etishgan gollandiyalik futbolchilar sekin-asta chetga chiqishyapti. Yoshlar jamoa kelajagi aynan o'z qo'llarida ekanligini tushunishyaptimi?
- Albatta. Bu masalada yigitlar bilan alohida gaplashib oldik. Ha, JCh-2010 finaliga chiqqan tarkib a'zolari qariyaptilar va biz endi golland futboli ko'prog'iga munosib ekanligini isbotlash uchun oldinga qadam tashlashimiz zarur. To'g'ri, o'sha jamoadagi ayrim yaxshi futbolchilar hozir ham safimizda, lekin umumiy qaraganda, yangi avlod vaqti keldi. Qayta bosh ko'tarish uchun avvalo, yaxlit jamoa bo'lishimiz talab etiladi. Agar shuni uddalasak, o'ynimiz kutilgan darajada yaxshilanishi tayin.
Davomi InterFUTBOL gazetasi blogida.
— deya xabar beradi uff.uz nashri.