Bundan biroz vaqt oldin “Navbahor“ jamoasining Toshkentda tashkil etilgan dastlabki yig'ini yakunlandi. Yig'inning so'nggi kunida namanganlik futbolchilar Jizzaxning "So'g'diyona" klubi bilan kuch sinashishdi. Jizzaxliklar bilan o'tgan o'yinda G'ofurov shogirdlari ustunlikka ega bo'lishdi. Bu jihat yakuniy hisobni 3:0 bo'lishini ta'minladi. Dastlab Dilshod Jabborov qanotdan uzatilgan to'pni boshi bilan darvozaga joylab qo'ydi. Tanaffusga qadar “Navbahor“ning chap qanotdan uyushtirgan hujumi ham samarali yakunlandi. Anvar Rajabovning qanotdan uzatgan to'pi himoyachiga tegib to'rdan joy oldi. Uchrashuv yakunlanishi arafasida zaxiradan maydonga tushgan Sardor Azimov hisobni yirik ko'rinishga olib keldi. “Navbahor“ tarkibi quyidagicha bo'ldi: Akmal Ortiqov, Obid Jo'raboev, Xayrulla Karimov, Igor Golban, Azizbek G'ulomxo'jaev, A'zam Aliev, Dilshod Jabborov, Otabek Valijonov, Anvar Rajabov, Timur Ayupov, Mo'ydin Mamazulumov. Zaxiradan maydonga tushganlar: Botir To'raboev, Azizbek Turg'unboev, Alisher Mahmudov, Sanjar Asqaraliev, Shohjahon Abbosov, Sardor Azimov, Nodir Mavlonov, Ravshan Aslanov, Qahramon Mahammadjonov. Uchrashuvda jarohatlari borligi tufayli Tohir Shamsitdinov va Akram Bahriddinovlar ishtirok eta olishmadi. Ukrainalik hujumchi Oleksandr Pishur esa ta'tildan foydalanib, uyiga borib kelish uchun ruxsat olgani sababli o'yinda qatnashmadi. Shu tariqa Toshkentda tashkil etilgan dastlabki yig'in yakunlandi. Jamoa a'zolari qisqa muddatlik ta'tildan so'ng 2 fevral kuni yana Toshkentda yig'ilishadi.
— deya xabar beradi uff.uz nashri.