Toshkentning «Paxtakor» jamoasi yangi mavsumga tayyorgarlikning qolgan qismini Qibraydagi klub bazasi va poytaxtda o'tkazadi. Fevral oyining birinchi yarmida BAAda tashkil etilishi rejalashtirilgan ikkinchi xorij yig'ini bekor qilingan.
Uning o'rniga mavsumga tadorik o'zimizda davom ettiriladi. Balki bu moliyaviy masalalar bilan bog'liqdir, ehtimol o'ziga yarasha boshqa sabablari bordir, bunisi bizga qorong'u. Har qanday holatda ham jamoa chempionlik himoyasiga aylanadigan mavsumga tayyorgarlikni kuchaytirilgan tarzda olib boradi. Biz O'zbekiston kubogi va 1-ligaga qur'a tashlash marosimidan so'ng «Paxtakor» klubi sport direktori Grigoriy Tseytlindan shu mavzuda intervyu oldik.
- Grigoriy Semyonovich, suhbatimiz avvalida Sharjada o'tkazilgan xorij yig'ini yakunlari haqida ma'lumot bersangiz. Klub rahbariyati va murabbiylar shtabining ushbu yig'indan ko'ngli to'ldimi?
- Albatta, rejalashtirgan ishlarimizni amalga oshirdik. Belgilangan o'rtoqlik uchrashuvlari o'tkazildi. To'g'ri, natijalar biz uchun ijobiy bo'lmadi. Lekin biz ushbu o'yinlarda buni birinchi o'ringa qo'ymagandik. Mashg'ulotlar kuniga ikki mahaldan tashkil etildi. Ayniqsa, o'tkazilgan 4ta o'rtoqlik uchrashuvidan eng so'nggisi bizga har tomonlama ma'qul keldi. Rossiya premer-ligasi vakili «Amkar» jamoasiga qarshi kechgan bahs biz o'ylagandan ham yaxshi o'tdi. Perm jamoasi murabbiylari o'yinga asosiy tarkibni qo'yishdi. Garchi 1:2 hisobida yutqazgan bo'lsakda, futbolchilarimiz o'zlaridan juda yaxshi taassurot qoldirishdi. Jismoniy tayyorgarlik va texnik-taktik harakatlari maromiga etib borayotgani ko'zga tashlanib qoldi. Umuman olganda, yanvar oyi uchun bu juda yaxshi holat. Kechadan Toshkentda tayyorgarlikni boshladik. Endi asosiy e'tibor «Nasaf» jamoasiga qarshi o'tkaziladigan O'zbekiston superkubogi o'yiniga qaratiladi. Bu uchrashuv ham biz uchun muhim. O'tgan yilgi superkubokdagi xatolardan xulosa chiqargan holda ijobiy natija qayd etishga harakat qilamiz.
- Sharjadagi yig'inda yangi futbolchilar qanday taassurot qoldirishdi? Jamoa o'yiniga moslashib ketishdimi?
- Aslida, safimizga qo'shilgan bu ikki futbolchini biz anchadan beri kuzatib kelayotgandik. Ularning imkoniyatini oldindan bilardik. Shu bois, ulardan mo''jiza ham kutmagandik. Suhrob Berdiev va Azim Ahmedov o'zlarini ijobiy tomondan ko'rsata olishdi. Ahmedovni himoya chizig'ida sinab ko'rdik. Azim o'zi uchun nisbatan yangi pozitsiyada juda yaxshi taassurot qoldirdi. «Buxoro» jamoasidan taklif qilingan yosh hujumchi Akobir To'raev esa asosan zaxiradan maydonga tushdi.
- Azim Ahmedov himoyada o'ynaydimi yoki uni shunchaki sinab ko'rdinglarmi?
- Bu haqida gapirishga hali erta. U hujum chizig'idan tashqari qolgan pozitsiyalarda o'ynab ko'rgan. Himoya ham u uchun yangilik emas. Lekin takror aytaman, hammasi chempionat boshlanishi arafasida hal bo'ladi.
- Kaxi Maxaradze jamoa uchun katta yo'qotish. Uning o'rnini kim bilan to'ldirmoqchisizlar?
- Yarim himoyada o'ynashi mumkin bo'lgan 3-4 nafar futbolchiga egamiz. Masalan, Jamshid Iskanderov ham bemalol bu joyda o'ynay oladi. Undan ko'nglimiz to'q. Boshqa tomondan, almashtirib bo'lmaydigan futbolchining o'zi yo'q. Qolgan yarim himoyachilarimiz Kaxining o'rnini bildirmaslikka harakat qilishadi.
- Suhrob Berdievni qaysi xislatlari uchun taklif qildinglar?
- U tezkor o'yinchi. Ham hujum, ham yarim himoya chizig'ida birdek to'p suradi. O'rtoqlik bahslarida ham yomon taassurot qoldirmadi.
- Igor Sergeevning «Paxtakor»da qolishi haqida ma'lumotlar paydo bo'ldi. Bu xabar qanchalik asosga ega?
- Sergeev - «Paxtakor» futbolchisi. Bu masala hamon ochiqligicha qolyapti. Bir kunda vaziyat o'zgarib ketishi mumkin. Ayni paytda «Paxtakor» safida to'liq kuch bilan yangi mavsumga tayyorgarlik ko'ryapti. Mana. Lobanov hech kim kutmaganda legioner futbolchiga aylandi. Bunday holat nafaqat Sergeev, balki boshqa futbolchilarimizda ham sodir bo'lishi mumkin.
- Unga Yaponiyaning «Sanfrechche Xirosima» klubi qiziqish bildirayotgan edi. Bu taklif hamon o'z kuchida qolyaptimi?
- Terma jamoaning birinchi raqamli hujumchisiga hamisha qiziqish yuqori bo'lgan. Bu jamoamizning ichki siyosati. Sergeevning transferini ko'rib chiqamiz.
- Lobanovning o'rnini kim bilan to'ldirmoqchisizlar?
- Nikita Ribkin asosiy tarkibda o'ynashga loyiq va munosib ekanligini isbotlayapti. Qolaversa, Temur Jo'raevni ham jamoaga qaytardik. U ham tajribali darvozabon, bir necha yil davomida «Paxtakor» sharafini himoya qilib kelgan. Temurning boy tajribasiga umid bog'layapmiz. Shuningdek, yoshlar va olimpiya terma jamoamizning birinchi raqamli darvozabonlarini ham esdan chiqarmaslik kerak. Ular bizning umidli tarbiyalanuvchilarimiz hisoblanishadi.
- Tarkibda yana yangi futbolchilar paydo bo'lishi mumkinmi?
- Hamma narsa ro'y berishi mumkin. Kuzatuvimizda ko'plab futbolchilar bor. Lekin ular orasida legionerlar bo'lmaydi.
- Ikkinchi xorij yig'ini Sharjada tashkil etilishi haqida aytilgandi...
- Bu yig'in o'tkazilmaydi. Yangi mavsum startiga qadar Toshkentda mashg'ulot o'tkazamiz. Shu erda o'rtoqlik uchrashuvlari tashkil etiladi.
Davomi InterFUTBOL gazetasi blogida.
— deya xabar beradi uff.uz nashri.