Bugun “Nasaf” jamoasi o'z maydonida oliy liga 25-tur uchrashuvini Farg'onaning “Neftchi” jamoasiga qarshi o'tkazdi. Uchrashuv kutilganidek kurashlarga boy va murosasiz kechdi.
Birinchi bo'lim to'liq maydon egalari ustunligida o'tdi. Ketma-ket tashkil etilgan hujumlar golsiz yakunlanaverdi. Maydondagi keskinlik birinchi bo'lim so'nggi daqiqalarigacha davom etdi. Birinchi bo'lim asosiy vaqtiga qo'shib berilgan ikkinchi daqiqadasida “Nasaf”  jamoasining mohir hujumchisi Ilhom Shomurodov nihoyat gol urib hisobni ochishga erishdi. Uning boshi bilan bergan zarbasi darvoza to'ridan joy oldi – 1:0.
Shuni alohida ta'kidlash kerakki, uchrashuvda mehmonlar ham bo'sh kelishmadi, ular nafaqat “Nasaf” jamoasining tezkor hujumlarini bartaraf etishdi, balki xavfli hujumlarni ham tashkil etishib, Eldor Suyunov mahoratini sinovdan o'tkazishdi.
Birinchi bo'lim ana shu hisobda yakuniga etdi.
Ikkinchi bo'lim boshidanoq maydon egalari  yana hujumlarga zo'r berishdi. “Nasaf”ning tashkil etgan hujumlari juda xavfli ko'rinish oldi. Albatta mehmonlar ham ora-orada o'zlarining hujumlarini tashkil qilishdi, ayniqsa 67-daqiqada ular tomonidan tashkil qilingan hujumda Ro'zimboy Ahmedovning dastlabki zarbasini Suyunov qaytarib qoldi, keyingi zarbasi esa himoyachiga tegdi. Bu vaziyatda Eldor Suyunovning mahoratiga tasanno aytish kerak, u o'z jamoasini muqarrar goldan asrab qoldi.
O'yinning qolgan daqiqalari ham shunday suratda davom etdi. Uchrashuvning so'nggi 10 daqiqasida maydon egalari o'yinida biroz pasayish ro'y berdi, o'yin mehmonlar jarima maydonidan, maydon markaziga ko'chdi.
Shundan keyin uchrashuvda gollik vazitlar vujudga keltirilgan bo'lsada, darvozalarga boshqa gollar kiritilmadi va Ilhom Shomurodovning yagona goli “Nasaf”ning navbatdagi g'alabasini ta'minlab berdi.
“Nasaf” jamoasi O'zbekiston Kubogi-2015 finaliga yaxshi kayfiyat bilan boradigan bo'ldi. G'alaba muborak aziz “Nasaf” muxlislari!
Oliy liga, 25-tur
“Nasaf” (Qarshi) – “Neftchi” (Farg'ona) 1:0 (6170 tomoshabin)
Gol: Ilhom Shomurodov, 45+1-1:0
“Nasaf”: 25.Eldorbek Suyunov, 4.Maqsud Karimov, 9.Ilhom Shomurodov, 18.Bahrom Abduraximov, 20.Erkin Boydullaev (s), 22.Shoruh Gadoev (7.Akram Baxriddinov 75), 23.Sherzod A'zamov, 28.Shuhrat Muhammadiev, 33.Odiljon Hamrobekov (6.Aziz G'aniev 52), 34.Farruh Sayfiev, 41.Azamat Allaniyazov ( 16.Alisher Yusupov 87).
“Neftchi”: 30.Evgeniy Cheremesin, 3.Shukurali Po'latov, 6.Bahtiyor Yoqubov (8.Akmal Xolmatov 65), 9.Sherzod Hakimov (26.Otabek Isroilov 79), 20.Dilyorbek Ermatov, 21.Muhsin Ubaydullaev, 22.Ro'zimboy Ahmedov (10.Murodbek Bobojonov 73), 27.Adrian Kashkaval, 33.Sardor Rahmanov, 44.Umidjon Qodirov, 38.Abbos Maxstaliev.
Ogohlantirish: Maqsud Karimov 12, Odil Hamrobekov 23, Dilyorbek Ermatov 31, Erkin Boydullaev 69.
Bosh hakam: Ilgiz Tantashev (Buxoro).
Hakamlar: Ruslan Serazeddinov(Toshkent), Xusniddin Shodmonov (Buxoro vil.).
Zaxira hakami:  Ishoq Ibragimov (Nukus).
Nazoratchi: Arslon Xotamov (Toshkent).
— deya xabar beradi uff.uz nashri.