Yangi yilning dastlabki kunlarida tajribali futbolchi  Anvar ­­­   G'ofurov­­­­­­­­ning «Bunyodkor»dan boshqa jamoaga ketayotgani haqida mish-mishlar tarqalgandi. Ammo u yangi mavsumga aynan «qaldirg'ochlar» bilan tayyorgarlik ko'rmoqda. Sports.uz portali futbolchining kelajak rejalarini bilish maqsadida G'ofurovni suhbatga tortdi.
- Anvar, ayting-chi, fubol o'ynashni qachondan boshlagansiz? Futboldagi ilk qadamlaringiz qaysi klubda qo'yilgan?
- Futbol o'ynashni boshlaganimga ancha bo'ldi. Yodimda bor, o'shanda 6 yashar bolakay edim. Akam bilan doim to'p ortidan quvib yurardik. Keyinroq dadamning xohishlari bilan futbol to'garagiga qatnasha boshlaganmiz. Shundan beri mening hayotim sportning bu turiga uzviy bog'lanib qolgan. Katta futboldagi ilk qadamlarni esa Jizzaxda qo'ygandim.
- Faoliyatingiz avvalida qanday qiyinchiliklarga duch kelgansiz?
- Birinchi bor oliy ligada ishtirok etuvchi klubga kelganimda, menga qishki yig'in o'ta murakkab tuyulgan. Chunki biz shu qadar ko'p yugurardikki, bunaqasini umuman tasavvur qilmagandim. Bunday paytlarda yanada kuchliroq klubda to'p surish yoki terma jamoa a'zosiga aylanish haqidagi xayollar bilan o'zimni-o'zim ruhlantirardim. Keyingi faoliyatim o'zim istagandek tus olishida buning katta hissasi bo'ldi.
- Mashaqqatli kunlarda futboldan ketish haqida ham hech o'ylab ko'rganmisiz?
- Yo'q. Yaqin-yaqingacha bu haqda umuman o'ylamagandim. Lekin hozirga kelib 33 yoshga to'ldim va istaysizmi-yo'qmi, endi katta futboldagi faoliyatni tugatish haqida ham fikr sura boshlaysiz. Ammo sog'-omonman, murabbiylar talablarini bajara olar ekanman, maydonga chiqaveraman.
- O'zbekistonning ko'plab klublarida to'p surgansiz. Ayting-chi, ularning qay biri hayotingizda o'chmas iz qoldirgan?
- Ochig'ini aytsam, men to'p surgan har bir klubning hayotimda o'z o'rni bor. Ya'ni, qaysi jamoa sharafini himoya qilgan bo'lsam, o'sha erda o'zim uchun ko'pgina yangi jihatlarni kashf qilganman. Shunday ekan, men bilan hamkorlik qilgan va yangi do'stlar orttirishimga sabab bo'lgan barcha klublarga minnatdorchilik bildiraman.
- Bir vaqtlari O'zbekiston milliy terma jamoasi safida ham o'yin­lar o'tkazgansiz. O'sha davrlardagi MTJ bilan hozirgisining kuchlarini taqqoslay olasizmi?
- Bilasizmi, men bunday taqqoslashlarni yoqtirmayman. Negaki, u davrlarda futbolga boshqacha ko'z bilan qaralardi. Hozirgi qarashlar esa umuman bo'lakcha. Chunonchi, futbol bir joyda to'xtab turmaydi. U kun sayin rivojlanmoqda. U paytdagi MTJ o'z davri uchun kuchli edi. Hozirgi terma esa bugungi kun uchun kuchli.
- Ma'lumki, faoliyatingiz faqat o'zbek klublarida kechdi. Nima uchun o'zingizni xorij jamoalarida sinab ko'rmagansiz?
- Darhaqiqat, uzoq yillardan beri faqat o'zimizning klublarda to'p surdim. O'z vaqtida menga xorijdan takliflar ham bo'lgan. Ammo turli sabablar tufayli faoliyatimni chet ellarda davom ettira olmaganman.
- «Bunyodkor» yangi mavsumdan nimalarni kutmoqda? OChLda guruh bosqichiga chiqish imkoniyatini qanday baholaysiz?
-  «Bunyodkor» oldiga  har doimgidek, eng yuqori vazifalar qo'yilgan. To'g'ri, bir-ikki mavsumdan beri jamoamiz o'zi istagan natijalarga erisha olmayapti. Lekin bu avlodlar almashinuvi bilan bog'liq jarayon va o'ylaymanki, tez orada «Bunyodkor» avvalgidek kuchga kiradi. OChLga kelsak, menimcha, bu turnirda bizning imkoniyatimiz boshqalarnikidan kam emas. Qolaversa, «pley-off»ni o'z maydonimizda o'tkazamiz. Bu esa bizga qo'shimcha ustunlik beradi. Umid qilamanki, shu kuni muxlislarimiz stadionni to'ldirib o'tirib, bizni qo'llab-quvvatlashadi. Zero, bunday paytda bir klub butun mamlakat sha'nini himoya qiladi. Shunday ekan, muxlislar ham ichki chempionatda qaysi jamoaga ishqibozlik qilishlaridan qat'iy nazar, birlashishlari lozim.
- Siz Skolari, Babayan, Qosimov kabi ko'plab mashhur murabbiylar qo'li ostida mashg'ulotlar o'tagansiz. Ularning ichida kimning murabbiylik salohiyatini kuchliroq, deb hisoblaysiz?
- To'g'risi, mana shunday mutaxassislar bilan ishlash baxtiga muyassar bo'lganim uchun o'zimni omadli inson, deb hisoblayman. Lekin ulardan birini boshqalardan yaqqol ajratib ko'rsatish niyatim yo'q. Chunki har bir murabbiy futbolga, shogirdlariga nisbatan turlicha yondashishi mumkin. Futbolchi esa qaysi murabbiy qo'li ostida to'p surmasin, baribir, undan o'zi uchun kerakli qandaydir omillarni o'zlashtiradi.
Davomi InterFUTBOL gazetasi blogida.
— deya xabar beradi uff.uz nashri.