O'tgan haftaning eng shov-shuvli xabari - shubhasiz, O'zbekiston milliy terma jamoasi va Moskvaning «Lokomotiv» klubi himoyachisi Vitaliy Denisovga Rimning «Latsio»si qiziqayotgani bo'ldi. Xabar shu qadar sensatsion ediki, hatto Sanjar Tursunovning Ukrainadan Qatarga ko'chib o'tgani ham soyada qolib ketdi. Qatar - o'zimizning Osiyo, shu sababli u qadar oh-voh qiladigan darajada emas. Boz ustiga, u erda shu vaqtga qadar bir qancha futbolchilarimiz to'p surishga ulgurganlar va hozir ham to'p surishmoqda. Ammo Italiya chempionati - butunlay boshqa olam. Shu qadar boshqachaki, biz uchun o'zga sayyora, desak ham bo'laveradi.
Mana, endi o'zimizning Denisov o'sha «o'zga sayyora»da to'p surishga tayyorlanmoqda. Nasib qilsa, o'zbekistonlik futbolchini «A» seriyada ko'radigan kunlarga oz qolgan ko'rinadi. Shu sababli, garchi «Latsio» hangomasi hozircha «ertak» maqomida bo'lsa-da, bu xabarga alohida e'tibor qaratishga qaror qildik. Boz ustiga, diqqatimiz markazida turadigan ob'ekt - «Latsio» ham emas. Hozircha bu klub haqida ko'p gapirish shartmas. Chunki hali rasman tasdiqlanmagan ma'lumot uchun og'iz ko'pirtirish yaramaydi. Biz shunchaki, boshqa narsani ta'kidlashni istaymiz - rimliklar Denisovni sotib oladimi yoki yo'q, bundan qat'iy nazar, bir narsaga ishonchimiz komil - Vitaliy darhaqiqat Evropada o'ynab keta oladigan futbolchi. Va bu gapni biz emas, balki ko'zga ko'ringan insonlar aytishgan. Hozir shunga misol keltirsak.
Aslida, O'zbekiston terma jamoasi himoyachisi haqidagi gaplar ancha oldinroq paydo bo'lgan edi. Yaqinda, ikki oygina muqaddam Moskvaning «Dinamo» klubi katta tadbir o'tkazdi. «Dinamochilar» 70 yil muqaddam Angliya maydonlarida turne o'tkazishgan ekan, o'sha tarixiy sana munosabati bilan ingliz klublari vakillari ham mehmon sifatida taklif etildi. Moskvadagi tadbirda Angliyaning «Arsenal», «Chelsi», «Kardiff Siti» va «Reynjers» jamoalari mehmon bo'lishdi. Mehmonlar tantanali marosimdan tashqari Rossiya chempionati doirasidagi «Dinamo» va «Lokomotiv» o'rtasida kechgan uchrashuvni tomosha qilishga ham taklif etildilar. Bizni qiziqtirgan holat o'sha uchrashuv davomida sodir bo'lgan.
Endi bahsni tomosha qilganlar haqida ham ikki og'iz ma'lumot bersak. Ular - «Arsenal» ijrochi direktori Ken Frayer, «Arsenal»ning afsonaviy futbolchisi Liam Breydi va «Chelsi»ning yaqin o'tmishdagi yulduzi Tur Andre Flo. Bu mutaxassislarning chakana obro'ga ega emasliklari tayin. Aynan shu insonlar «Dinamo» va «Lokomotiv» o'rtasida kechgan uchrashuvni tomosha qilarkanlar, O'zbekiston terma jamoasi himoyachisi Vitaliy Denisovga alohida e'tibor qaratganlar. Rossiyadagi Championat.ru internet nashri tomonidan tayyorlangan reportajda aytilishicha, ingliz mutaxassislari Denisovning o'yinini kuzatishar ekan, shunday fikr bildirishgan: «Juda harakatchan yigit, o'z qanotida ancha sifatli ishlamoqda! Bunday futbolchi Angliya premer-ligasida ham o'ynab ketgan bo'lar edi!»
O'zingiz o'ylab ko'ring, Angliyaning eng kuchli klublarida o'ynagan, ishlagan va ko'zi pishgan odamlar o'zlari mutlaqo tanimagan futbolchi haqida shunday ijobiy fikr bildirgan ekanmi, demak Denisov darhaqiqat o'z kuchini Evropada sinab ko'rishga arziydigan futbolchi. Ammo bu hali hammasi emas. Endi e'tiborni shunchaki gapdan statistika tomon bursak. Zero, raqamlar futbolda har doim ardoqlanadi.
Vitaliy Denisov bu borada ham yaxshi natija qayd etayotgan futbolchi. Uning o'yinini «Lokomotiv» murabbiylar shtabi ham chakana baholamaydi. Joriy mavsumda faqat Vitaliy Denisov va darvozabon Gilerme «Lokomotiv» tarkibida Rossiya chempionatining barcha 18 uchrashuvida maydonga tushganlar. Boshqa futbolchilar zaxirada qolgan vaqtda ham Vitaliy jamoaning asosiy ustuni bo'lib qolavergan. Darvozabon uncha-munchaga zaxiraga olinmasligini inobatga olsak, bu statistika Denisovning qay darajada kuchga ega ekanini ko'rsatib turibdi. Shunday ekan, himoyachimizga kuchli klublardan qiziqish bo'layotgani u qadar hayratlanarli masala emas. Kuchli klublar ahmoq emas, biror futbolchini sotib olishdan oldin uni ming chig'iriqdan o'tkazishlari turgan gap. Vitaliy mana shu chig'iriqdan o'tgan futbolchi va unga darhaqiqat qiziqish yuqori. Bu o'rinda faqat bir masala qoladi - futbolchi bu qiziqishdan qay darajada foydalana olar ekan?
Dunyo futbolida iqtidorli o'yinchilar ko'p bo'lgan. Ammo har doim ham potentsialini ochib beravermagan. Futbolchining faoliyati ko'pincha uning agenti olib borgan ishga ham bog'liq bo'ladi. Hozirda nafaqat futbol yoki sport, balki san'at va shou-biznes sohasida ham agentlik faoliyati avj olib ketdi. Qaysidir kinoaktyor biror blogbasterdagi rolni olishi uchun faqat uning iqtidori kamlik qiladi. Buning uchun agenti ham kuchli bo'lishi lozim.
Vitaliy Denisov borasida ham ayni masala hozir juda muhim o'rin tutadi. Biz «Latsio»dan bo'lgan qiziqish qay darajada haqiqatligini bilmaymiz. Balki bo'lgandir, balki yo'q. Ammo muhimi bu emas. Asosiysi shundaki - Vitaliy Denisov darhaqiqat, Evropa darajasidagi futbolchi. U Italiyada bo'lmasa Angliya yoki Ispaniyada ham o'ynay oladi. Faqat buning uchun uning mehnatini yuzaga chiqara oladigan agent kerak bo'ladi.
Davomi InterFUTBOL gazetasi blogida.
— deya xabar beradi uff.uz nashri.