Kuni kecha “Qo'qon-1912” jamoasi bosh murabbiyi Murod Ismoilov Farg'onadagi “Ruxsor” FM radiosiga “Hokim kubogi-2016” turniri borasida intervyu berdi. - “Hokim kubogi” turniri azaldan katta qiziqishlarga sabab bo'lib kelgan, - deb gap boshladi Murod Muzaffarovich. Biroq aytish kerakki, so'nggi yillarda turnirning saviyasi biroz tushgandi. 2016-yilga kelib musobaqa tashkilotchilari birinchi o'rinda “Hokim kubogi”ning saviyasini oshirish borasida keng ko'lamdagi ishlarni olib borishdi va bu o'z samarasini bermoqda. Joriy yildagi turnirda Oliy liganing bir qator kuchli klublari o'zlarining asosiy tarkiblari bilan ishtirok etishmoqda. Biz ham PFL kubogidan ko'ra, “Hokim kubogi”da ishtirok etishni afzal bildik. Men musobaqa tashkilotchilaridan keyingi yillari turnirni yanada keng ko'lamda o'tkazishlarini, ko'proq Oliy liganing kuchli klublarini Farg'onaga taklif qilishlarini so'ragan bo'lardim. Farg'ona shahrida bir-biridan zamonaviy mehmonxonalar faoliyat ko'rsatib turibdi. Barcha sharoitlar bor. Toshkentda yoki xorij mamlakatlaridagi 10-15 kunlik yig'inlarni mana shu Farg'onada o'tkazib, “Hokim kubogi”da ishtirok etishsa musobaqaning saviyasida yanada oshardi. Bu mening shaxsiy fikrim. Bilasizmi, xar yili “Hokim kubogi” o'yinlari paytida ob-havo biroz noqulay kelar edi. O'yinlar asosan qor bosgan maydonlarda o'tardi. Quvonarli tomoni, bu yili futbol o'ynash uchun ajoyib quyoshli ob-havo bo'lmoqda va o'yinchilar ham rohatlanib maydonda to'p tepishyapti. Shuningdek, o'yindan-o'yinga muxlislarning stadionga tashrifi ortayotgani meni quvontirmoqda. Musobaqa tashkilotchilariga katta rahmat. - “Hokim kubogi-2016”ning final bosqichiga yo'l olish uchun qaysi jamoaning imkoniyatlari ko'proq deb hisoblaysiz ? - Hamma jamoaning imkoniyatlarini yuqori baholayman. “Qo'qon-1912” “Andijon”, “Qizilqum” va albatta “Neftchi” jamoasida finalga chiqish uchun yaxshi imkoniyat bor. Qo'qon jamoasi PFL kubogida ham ishtirok etsa bo'lardi. Lekin biz “Hokim kubogi”ni tanladik. Chunki turnirdagi o'yinlarning ko'pligi, uchrashuvlarning zich joylashuvi biz uchun juda qulay bo'ldi. - “Neftchi” jamoasining shu darajaga etishishida sizning xissangiz katta. Jamoaning o'yinlarini kuzatib boryapsizmi? Albatta. “Neftchi” xar doim yuqori natijalarga erishib kelgan jamoadir. Faqat so'nggi yillardagi muvaffaqiyatlarda biroz xissamiz qo'shildi xolos deb o'ylayman. Xa, “Neftchi”ning o'yinlarini kuzatib boryapman. “Yozyovon-Lochinlari”ga qarshi o'yinni ham ko'rdim. Yigitlar yaxshi o'yin ko'rsatishdi. Ayniqsa “Neftchi” yoshlari jamoasi ham yaxshi shakllanmoqda. Baxrom Haydarov o'z shogirdlari bilan samarali ishlayotgani bilinib turibdi. “Neftchi” yoshlari Qo'qon jamoasining asosiy tarkibiga qarshi bahsda ham jiddiy qarshilik ko'rsatishdi. - Balki kunlar kelib “Neftchi”ga yana qaytasizmi ? - Nasib qilsa, yana “Neftchi”ga qaytaman. Mana qarang, xozir ham suhbatga “Neftchi” libosida keldim. Niyatim, “Qo'qon-1912”da ham o'z bilimlarimni ishga solib Qo'qon futbolining rivojiga o'z xissamni qo'shishdir. Agar vaziyat shuni taqozo etsa, xar doim “Neftchi”ga kelib mehnat qilishga va Farg'ona futboli istiqboli yo'lida mehnat qilishga tayyorman. - Muxlislarga tilaklaringiz... - Muxlislarga doim sog'liq tilayman. Oilalari tinch bo'lsin. Xar doim stadionlarni to'ldirib bir-biridan qiziqarli o'yinlarni tomosha qilishlarini tilab qolaman. Muxlislar xamisha o'z sevimli jamoalarining o'yinlariga kelib, futbolchilarni yuksak darajada qo'llashlarini so'rab qolaman. Hojiakbar Jabborov suhbatlashdi
— deya xabar beradi uff.uz nashri.