Osiyo Chempionlar Ligasi-2016ning start nuqtasi tobora yaqinlashmoqda. Shunday ekan, mazkur musobaqa atrofidagi shaxslar, voqea va hodisalar, xususan, uning o'tmishiyu, buguni haqida ma'lumot berish ustuvor vazifalarimizdan biridir.
Binobarin, qit'a klub futbolidagi asosiy turnirda bu yil ham 4ta jamoamiz ishtirok etadi. Demak, bugun G'arbiy va Markaziy Osiyodan OChL-2016da qatnashadigan jamoalar, xususan, klublarimiz raqiblari bosh murabbiylari xususida ma'lumot bermoqchimiz. Gazetamizning keyingi sonlarida esa, bo'lajak raqiblar safidagi legionerlar, ularning porlashi mumkin bo'lgan yosh iste'dodlariga atalgan maqolalar berish niyatimiz ham bor.
«A» guruhi: «Fulad Mobarakeh Sepahon» (Eron); «Al-Nasr» (BAA);«Lokomotiv» (O'zbekiston); «Al-Ittihod» (Saudiya Arabistoni) yoki «Al-Vihdat» (Iordaniya)
Igor Shtimats. 2015 yilning 12 noyabridan Eronning «Sepahon» klubi ustozi. U Husayn Faraki o'rnini egallagandi. 1967 yilning 6 sentyabrida tavallud topgan. Futbolchilik faoliyati (1985-2002)da markaziy himoyachi rolini bajargan. «Derbi Kaunti» va «Vest Xem» klublarida o'ynagani bilan keng ommaga tanilgan. Murabbiylik faoliyatini 2001 yili boshlagan. 2012 yilning 5 iyulida Xorvatiya terma jamoasiga ustoz etib tayinlanguniga qadar TVda sharhlovchi bo'lib ishlagan. Jamoasi 2013 yilning 15 oktyabrida JCh-2014 saralash bosqichida Shotlandiya termasiga yutqazib qo'yganidan so'ng Xorvatiya futbol ittifoqi tomonidan ishdan bo'shatilgan. Murabbiy sifatida faqat bir marta, «Xayduk» (Split) bilan 2004|2005 yillar mavsumida Xorvatiya chempionligini qo'lga kiritgan. «Sepahon» uning Osiyodagi ilk klubidir.
Ivan Yovanovich. 2013 yilning 18 iyunidan «Al-Nasr» klubi ustozi. 1962 yilning 8 iyulida tavallud topgan. Futbolchilik faoliyati davomi (1980-1999)da yarim himoyachi pozitsiyasida o'ynagan. Xususan, «Iraklis» (Saloniki) klubi safida 10 yildan ortiq to'p surgan. Serbiyalik futbolchilar orasida bunday barqaror faoliyat olib boradiganlari kamdan-kam uchraydi. Murabbiylik ishini 2001 yili Gretsiyada boshlagan. Uning faoliyatida Kiprning APOEL klubi alohida o'rin tutadi.
Yovanovich bu jamoa bilan 4 marta chempionlik, 1 marta kubok, 4 marta superkubokni yutgan. Asosiysi,    APOEL ChL-2011|2012da nafaqat guruhdan chiqdi, balki 1|8 finalda «Lion» bilan to'qnashib, penaltilar seriyasi bo'yicha ustun keldi hamda keyingi raundda «Real» (Madrid)ga yuzma-yuz bo'ldi. Shu natijaning o'zi Yovanovichni APOEL tarixidagi eng omadli murabbiyga aylantirdi. 2011 yili Serbiyaning eng yaxshi murabbiyi sifatida tan olingan Ivan Yovanovich «Al-Nasr» bilan ham ma'lum yutuqlarga erishib ulgurdi. Ya'ni Fors ko'rfazi ChL (2014), BAA prezidenti kubogi (2014|2015) va BAA Liga kubogi (2014|2015)da g'alabani ta'minladi. O'yin davomida taktikani tezkorlik bilan o'zgartirishda Osiyoda unga teng keladigani topilmasa kerak. G'oyat irodali murabbiy. Qit'amizda ilk marta ishlayapti.
Viktor Pitsurke. 2014 yilning 16 oktyabridan Jiddaning «Al-Ittihod» klubi ustozi.
Raed Assaf. 2016 yilning yanvaridan Iordaniya poytaxti - Ammanning «Al-Vihdat» klubi bosh murabbiyi.
«B» guruhi: «Al-Nasr» (Saudiya Arabistoni); «Zob-Ohan» (Eron); «Lahviya» (Qatar); «Bunyodkor» (O'zbekiston) yoki «Al-Shabab» (BAA)
Fabio Kannavaro. 2015 yilning 24 oktyabridan «Al-Nasr» bosh murabbiyi. U klubda Xorxe da Silva o'rnini egalladi. 1973 yilning 13 sentyabrida tavallud topgan. Futbolchilik faoliyatining katta qismini «Parma»da o'tkazgan. Barcha zamonlarning eng buyuk himoyachilaridan biri. 2006 yili jahon chempioni sifatida «Oltin to'p» yutgan. Faoliyatini «Al-Ahli» (BAA)da yakunlagan Fabio murabbiylikka ilk qadamlarni ham shu klubda qo'ydi. Kosmin Olariu kelgach, u bilan 1 yil ishladi. 2014 yilning 5 noyabrida Fabioni «Guanjou Evergrand» klubiga bosh murabbiy etib tayinlashdi. Yana kimning o'rniga deng? Marchello Lippi o'rniga! 2015 yilning 4 iyuniga kelib esa, u bu lavozimni Luiz Felipe Skolariga bo'shatib berdi. Xitoy klubidagi statistikasi quyidagicha: 23ta o'yin, 11ta g'alaba, 7ta durang, 5ta mag'lubiyat. Endi Fabio «Al-Nasr» uni shunchaki, mashhurligi uchun taklif etmaganini isbotlashi kerak. Zero, bu jamoa Saudiya Arabistonining amaldagi chempioni hisoblanadi.
Yahyo Gulmuhammadi. 2014 yilning 10 mayidan «Zob-Ohan» klubi bosh murabbiyi. 1971 yilning 19 martida tavallud topgan. Futbolchilik faoliyati (1989-2008)da markaziy himoyachi pozitsiyasida o'ynagan. Jahon chempionatlarida gol urgan 6 nafar eronlikdan biri. «Persepolis» klubidagi o'yinlari orqali butun Osiyo futbol jamoatchiligiga tanilgan. Murabbiylik faoliyatini 2008 yili boshlagan. Eronning 6ta klubini boshqarishga ulgurdi. Murabbiy sifatidagi statistikasi: 207ta o'yin, 97ta g'alaba, 68ta durang, 42ta mag'lubiyat. Xullas, 46,5 foiz samaradorlik qayd etgan. O'tgan mavsum «Zob-Ohan» Gulmuhammadi boshqaruvida «Hafzi kubogi»da g'alaba qozondi, murabbiyni esa yil laureati, deb topishdi. Aslida «Zob-Ohan» bilan 2 yillik shartnoma tuzgan payti Yahyoga nisbatan e'tirozlar ko'p yangragandi. Lekin u mavsum yakunida jamoani Eron pro-ligasida 4-o'ringa olib chiqdi. Bu natija 2012 yildan buyon OChLda o'ynamagan jamoa uchun a'lo hisoblanadi.
Jamol Belmadi. 2015 yilning 19 iyunidan «Lahviya» ustozi. U Mikael Laudrup o'rnini egalladi. 1976 yilning 27 martida tavallud topgan. Futbolchilik faoliyati (1995-2009)da yarim himoyachi pozitsiyasida o'ynagan. «Marsel» va «Sautgempton» klublaridagi o'yinlari orqali keng ommaga tanilgan. Murabbiylik faoliyatini 2010 yili boshlagan. O'sha yil yozda uni «Lahviya» klubiga chaqirishgan. Mavsum yakunida jamoa chempion bo'ldi. Bu yosh klub tarixidagi ilk muvaffaqiyat edi. 2012 yilning 8 oktyabrida shartnomasini uzaytirgan Belmadi «Lahviya»da dekabrgacha ishladi. O'shanda jamoa yomon start olgandi. Keyinchalik uni Qatarning 2-darajali terma jamoasiga jalb etishdi. 2014 yilning 15 martida esa milliy jamoa boshqaruvini qo'lga oldi. Ammo Osiyo kubogi-2015dagi omadsizlik sabab, vazifasidan ozod etildi.
Davomi InterFUTBOL gazetasi blogida.
— deya xabar beradi uff.uz nashri.