Jarohatlar Tomas Vermalenning Ispaniyada o'tkazgan birinchi mavsumini yo'qqa chiqardi. Ammo hozir u formada va Leo Messi bilan qo'shnichilikda hayot lazzatini surmoqda. Ammo mashg'ulotlarga bir-birlarini olib borish ularga nasib qilmayapti. Bularning barchasi haqida belgiyalik futbolchi FourFour Tvoga bergan intervyusida gapirib berdi.
«Tiki-taka jahon miqyosida tan olingan, ammo bu raketa qurish emas»
- «Barselona»dagi birinchi mavsumingizni jarohat bois o'tkazib yubordingiz. Unga qarshi kurashish og'ir bo'ldimi?
- Ha, judayam og'ir. Barchasi shunday kechishini hech ham kutmagandim. Jahon chempionatida Rossiyaga qarshi  o'yindan so'ng sog'ligimda muammolar borligini sezdim, ammo tekshiruvlarda jiddiy xastalik aniqlanmadi. Mundialdan qaytgach va qayta nazoratdan o'tgach, tizza ostida muammo borligi ma'lum bo'ldi.
- Bunga «Barselona» qanday munosabatda bo'ldi? Axir klub «Arsenal»ga 15 mln. funt to'lab, endigina siz bilan 5 yillik shartnomaga ega bo'lgandi-ku?
- «Barsa»da hamma meni tushundi. Jamoadoshlarimni meni qo'llab-quvvatlovchi yozuvlar tushirilgan futbolkalarda ko'rib esa juda ta'sirlandim. Zero, buni aslo kutmagandim. Menimcha, bu fikr Xavidan chiqqan bo'lsa kerak. O'shanda haqiqiy «syurpriz» bo'ldi va buni hech qachon unutmayman.
- Emireytsdagi so'nggi mavsumni goh lazaretda, goh zahira o'rindig'ida o'tkazdingiz. O'shanda «Barsa» sizga qiziqayotganligidan taajjubga tushgandirsiz?
- Rostini aytsam, karaxt bo'lib qoldim. Bu o'zimni ko'rsatish uchun ilk jamoam - «Ayaks»ga taklif qilishgani yoki oradan bir necha yil o'tgach, «Arsenal» men bilan muloqotga chiqqan davrdagiday edi. Har bir futbolchi shunday buyuk klubda o'ynashni istaydi, shuning uchun men juda hayajonlandim. Shartnoma bo'yicha bir yil muddatim qolgandi va bu taklif «kanonirlar»ga men uchun qandaydir mablag' ishlab olishning so'nggi yo'li edi. O'shanda maydonga kam tushayotganim esa, masalaning oson echim topishida muhim ahamiyat kasb etdi.
 - «Barselona»dagi hayotingiz «Arsenal»dagidan qaysi jihatlari bilan farqlanadi?
- «Ayaks», «Arsenal», «Barselona» - bu klublarning barchasi anchadan beri kombinatsion hujumkor futbol o'ynab kelishadi. Bu jihatdan olganda, «Barselona» Londonda o'rganganlarimdan uncha farq qilmaydi. Tiki-taka jahon miqyosida tan olingan, ammo ishoning, bu raketa qurish emas. Biz mashg'ulotlar paytida bunga katta e'tibor qaratamiz, xolos. Keyin Neymar va Messining afsungarligi barchasini bajaradi.
- Haftada 7 kun Messi bilan maydonda birga bo'lish qanday ekan?
- Biz barchamiz professionallarmiz va maydonda o'z ishimizni qilishga harakat qilamiz, deyishim mumkin edi. Ammo bu rost gap emas. Men barcha kabi futbol muxlisiman. Messi va Neymar bilan birga maydondaligimdan baxtiyorman. Ular butunlay boshqa darajadagi futbolchilardir. Hech bir hafta yo'qki, ularning biri o'z harakati bilan bizni lol qoldirmagan bo'lsa (kuladi).
- Maydondan tashqarida ham Messi shu darajada ta'sirchan bo'lib qoladimi? U kiyim almashtirish xonasida bossmi, Kamp Nouning «cho'qintirgan otasi»mi?
- Aslo! Jamoada yulduzlar  ko'p, ammo hech biri  o'zini boshqalardan ustun qo'ymaydi. Bu erga kelganimdan buyon birorta ham  salbiy holatga duch kelmadim. Boshqa klublarda bu masalada muammolar etarli. «Barselona» chindan ham oddiy klubdan yuqori.
- Kiyim almashtirish xonasida kim musiqa qo'yadi?
- Dani Alves. Uning audio tizimi juda katta, ovozi rosa baland. U o'zining iPhonesiga ulanadi. Ispan pop-musiqasi bo'lgan salsani va texnoni... hammasini u birday yaxshi ko'radi.
 
«Evro-2016ni orziqib kutyapman»
- «Barsa» o'yinchilari maydondan tashqarida qanday yashashadi? Shaharni paparatstsilarsiz va selfi ovchilarisiz aylanishga muvaffaq bo'ldingizmi?
- Vaqti-vaqti bilan meni tanib qolishadi va muloyimgina murojaat qilib avtograf so'rashadi. Bu Messi va Neymarga nisbatan bo'layotgan munosabatlarga qaraganda hech narsa emas: ularga uydan chiqish, plyaj va mahalliy supermarketga kirish oson emas. Atroflarini darov «tomi ketgan» muxlislar o'rab olishadi.
- Messi va Neymar qo'shnilaringizligini e'tiborga olsak, bir-birlaringizni tez-tez mashg'ulotlarga olib borasizlarmi?
- Buni xohlaganimda ham uddalolmagan bo'lardim. Sababi, ularning o'z kun tartiblari bor. Biri mashg'ulotdan so'ng shifokor huzuriga yo'l olsa, ikkinchisi sportzalga oshiqadi, kabi.
- Siz «Ayaks», «Arsenal», «Barselona» bilan bir qator sovrinlarga ega bo'ldingiz. Kelgusi rejalaringiz qanday? Balki, Belgiya termasi safida Evro-2016da g'olib bo'lmoqchidirsiz?
- «Barselona» bilan sovrin yutib oldim, deb o'ylamayman. Chunki, maydonga tushmagandim. Shuning uchun, joriy mavsumda jamoaning bir bo'lagi sifatida o'tgan yilgi muvaffaqiyatni takrorlash umididaman. Shuningdek, Evro-2016ni ham orziqib kutyapman. Kurtua, Kompani, Azar, De Brayn, Lukaku, Benteke - jamoamiz iqtidorlarga shu darajada boyki, biz oldimizga eng ulug' maqsadlarni qo'yishga haqlimiz. JCh-1994ni televizor orqali tomosha qilganim yodimda. O'shanda muxlislar Niderlandiya ustidan g'alaba qozonilgach, ko'chaga chiqib olib bayram qilishgandi. Bu safargi zafarlarimiz undanda ko'proq bo'ladi, deb umid qilaman. Biz o'zimizga ishonamiz. I.OBIDOV tayyorladi Manba: www.intersport.uz
— deya xabar beradi uff.uz nashri.