Yaqinda UEFA bosh kotibi, FIFA prezidentligiga nomzodlardan biri Janni Infantino o'z dasturini e'lon qildi. Eslatib o'tamiz, yirik futbol tashkiloti rahbari 26 fevralda tashkil etiladigan saylovlardan so'ng ma'lum bo'ladi.
«Bitta federatsiya - bitta ovoz» qoidasi ko'p muhokama qilindi. Axir xaritadan hamma ham topolmaydigan mamlakatning qo'llab-quvvatlashi futboli rivojlangan davlatniki bilan bir xil kuchga ega-da. Ortida UEFA turgan, Mishel Platinining o'rnini to'ldirayotgan shveytsariyalik mutasaddidan ea Evropa tashqarisida ham obro' orttirish talab etiladi.
Yaqinda Infantino KONKAKAF mintaqasiga kiruvchi Karib futbol ittifoqi federatsiyalari rahbarlari bilan uchrashdi. Shundan so'ng u Reuters axborot agentligiga bergan intervyusida shunday dedi: «G'alaba qozonishga astoydil intilyapman. Meni butun jahonda qo'llab-quvvatlashadi, ularning soni tobora ortmoqda».
Aytish joizki, Karib ittifoqi FIFAda 25ta ovozga ega (umumiy hisobda KONKAKAFda ushbu ko'rsatkich 35ta ovozni tashkil etadi). Bu esa elektoratda katta ulush degani. Taqqoslash uchun, saylovlarda Afrika 54ta, Evropa 53ta, Osiyo 46ta, Okeaniya 11ta, Janubiy Amerika esa 10ta ovoz bilan qatnashadi.
Endi e'tiboringizni Infantino dasturining diqqatga molik jihatlariga qaratmoqchimiz.
- Jahon chempionati ishtirokchilari sonini 32tadan 40tagacha oshirish.
Mazkur bo'lim aynan ko'psonli ovozga ega federatsiyalar uchun muhim ahamiyat kasb etadi. Umuman, may saylovlari vaqtida JChda qatnashuvchi termalar miqdori yuzasidan Yozef Blatter ham so'z yuritgandi. Bir tomondan, formatning kengaytirilishi qo'shimcha daromad keltiradi: o'yinlar soni qancha ko'p bo'lsa, foyda ham shunga yarasha ortaveradi. Ammo o'z navbatida, musobaqa saviyasining pasayishiga olib kelishi mumkinligini ham unutmaslik joiz. Tashkilotchilar yirik hisoblar va jamoalar darajasidagi sezilarli tafovutga qarshi hech narsa qilolmaydilar. Xullas, bu masala to'liq hal etiladi, deyish qiyin. Zero, turnir formulasini har qanday holatda ijroqo'm tasdiqlaydi.
- «FIFA mundialni nafaqat bir yoki ikki davlat, balki butun bir mintaqada o'tkazilishini ko'rib chiqishi lozim. Shu tariqa turli mamlakatlar yirik musobaqani tashkillashtirishdek sharafga sazovor bo'lib, bundan foyda ko'rishlari aniq».
Dunyo miqyosida bu haqiqiy yangilik! Mazkur holatda Infantino Platinining Evro-2020 vaqtida amalga tatbiq etiladigan bahsli g'oyasiga xayrixohlik ko'rsatdi. Ushbu rejaning plyus va minuslari allaqachon muhokamadan o'tgan.
Turnir yaxlitlik va jozibasini yo'qotadi. Qolaversa, mezbon mamlakatlar termalari saralashdan o'ta olishmasa, qadrdon o'lkalarida o'tadigan final bosqichida begonalar o'yinini kuzatishga ishtiyoq sezmasliklari turgan gap.
Davomi InterFUTBOL gazetasi blogida.
— deya xabar beradi uff.uz nashri.