Dubaydagi ikkinchi yig'in doirasida “Lokomotiv” o'zining birinchi uchrashuvini bugun mahalliy “Al-Urooba” klubiga qarshi o'tkazdi. Murabbiylar shtabi nisbatan kuchliroq raqiblar bilan o'yinni yig'inning so'nggi kunlariga rejalashtirishgan. Toshkent vaqti bilan 18:20 da start olgan uchrashuvda betobligi bois 3 nafar futbolchi ishtirok eta olmadi: Server Jeparov, Timur Kapadze va Kaxi Maxaradze. Qo'shimcha qilish kerakki, ko'rikda bo'lib turgan serbiyalik Nenad Inyatsga harakatlari murabbiylar shtabiga ma'qul kelmagani uchun javob berib yuborilgan. “Temiryo'lchilar” o'yinni kutilganidek ustunlik bilan boshlashdi hamda 5-daqiqaga kelib hisobda oldinga chiqib olishdi. 25 metrlar uzoqlikdan belgilangan jarima zarbasini Sardor Mirzaev aniq amalga oshirishga muvaffaq bo'ldi. Shundan keyin ham hujumlar “Lokomotiv” futbolchilari tomonidan tashkil qilingan bo'lsada, keyingi gol mezbonlar tomonidan urildi. 25-daqiqada hisob tenglashgan bo'lsa, oradan 10 daqiqa o'tib Nemanya Yanichich jamoadoshlarini hisobda ikkinchi bor oldinga olib chiqib olishlarini ta'minladi. Birinchi bo'limda darvozalarga boshqa to'p kiritilmadi. Ikkinchi bo'limni “Lokomotiv” 3 ta o'zgarish bilan boshladi. Bu o'yin suratini yanada oshirdi. 47-daqiqada Abduholiqov o'yindagi o'zining birinchi golini urgan bo'lsa, oradan olti daqiqa o'tib Marat Bikmaev jarima zarbasini aniq amalga oshirib, hisobni yirik ko'rinishga olib keldi – 1:4. Va nihoyat 60-daqiqada Temurxo'ja Abduholiqov bellashuvdagi so'nggi golni kiritdi. Ajoyib pas uchun hujumchi Islom To'xtaxo'jaevga minnatdorchilik izhor qilishi kerak. “Lokomotiv”ning 12 hamda 14 fevral sanalaridagi raqiblari nomi ma'lum qilingan. Navbatdagi o'yinlar haqida keyinroq ma'lumot berib o'tamiz. Quyida jamoamizning 2016 yildagi o'rtoqlik uchrashuvlari natijasi, bugungi o'yin qaydnomasi hamda fotosuratlari bilan tanishib chiqishingiz mumkin. AL-UROOBA (BAA) – LOKOMOTIV 1:5 (1:2)
Gollar: Sardor Mirzaev, 5 (0:1). Al-Urooba, 25 (1:1). Nemanya Yanichich, 36 (1:2). Timurxo'ja Abduholiqov, 47 (1:3). Marat Bikmaev, 53 (1:4). Timurxo'ja Abduholiqov, 60 (1:5).
“Lokomotiv”: Ma'mur Ikromov (Ignatiy Nesterov, 46) — Oleg Zoteev (Sergey Proxorov, 65), Nemanya Yanichich, Islom To'xtaxo'jaev, Jasur Hasanov_16 (Sherzod Fayziev, 46) — Jasur Hasanov_77 (Marat Bikmaev, 46), Quvondiq Ro'ziev (Mirto'ra Akbarov, 89), Ikrom Aliboev, Sanjar Shoahmedov (Sadriddin Abdullaev, 80), Sardor Mirzaev (Salim Mustafoev, 67) — Temurxo'ja Abduholiqov (Doniyor Usmonov, 65) 2016 yildagi o'rtoqlik o'yinlari
15 yanvar, 2016 Al-Ahli (Saudiya Arabistoni) – Lokomotiv 0:0
19 yanvar, 2016 Xenan Jiane (Xitoy) – Lokomotiv 0:0
22 yanvar, 2016 Slovakiya U-21 – Lokomotiv 0:2
— deya xabar beradi uff.uz nashri.