Tabiiyki, Osiyo futbolining ham o'z afsonalari bor. O'zbekistonda - Mirjalol Qosimov, Eronda - Ali Dai, J.Koreyada - Xon Myun Bo... E'tibor bering, biz bugunning emas, balki yaqin o'tmishning yorqin yulduzlarini sanayapmiz. Xullas, quyida ularning ayrimlari xususida qiziqarli faktlar, xususan, bugungi kunda nimalar bilan shug'ullanishayotgani haqida ma'lumot bermoqchimiz.
Avstraliya. Gari Kyuell. 1978 yilning 22 sentyabrida tavallud topgan. Asr boshida katta «sensatsiya» ko'targan «Lids Yunayted» safida Mark Viduka, Rio Ferdinand, Robbi Kin, Alan Smit, Li Boyer va Pol Robinson kabi futbolchilar bilan birga yangi avlod davrini boshlab bergan. Asosan aynan uning o'yinlari Angliya premer-ligasiga Avstraliyadan futbolchilar oqimi kuchayishiga olib keldi. Gari akstrisa Sheri Myorfiga uylangan. 4 nafar farzandi bor. 2012 yilning 12 iyulida Sidneyda bo'lib o'tgan marosimda muxlislar ovozlariga ko'ra, Avstraliyaning barcha zamonlardagi eng buyuk futbolchisi, deb topildi. 2015 yilning 23 iyulida ayni payt premer-ligada ishtirok etayotgan «Uotford» klubining U-23 toifasidagi yoshlar jamoasiga bosh murabbiy etib tayinlandi.
Iroq. Emad Muhammad Ridha. 1979 yilning 24 iyulida tavallud topgan. Kichik jussasiga qaramay, arab futbolida o'z o'rnini topgan ijrochilardan biri. Iroq terma jamoasi uchun mundiallar saralashida 10ta gol urgan. 33 yoshida yurtiga qaytgan Ridha o'z mamlakati futbolini qayta tiklashga bel bog'lagan fidoyilardan. U 2015 yilning 29 oktyabridan Iroqning «Najaf» klubida bosh murabbiy sifatida ishlayapti.
J.Koreya. Xon Myun Bo. 1969 yilning 12 fevralida Seulda tavallud topgan. Xuddi evropalik futbol yulduzlari singari faoliyatini Amerikaning «Los-Anjeles Geleksi» klubida yakunladi. Osiyoning barcha zamonlardagi eng yaxshi futbolchilari qatoriga kiritilgan. 2012 yili uning boshchiligidagi J.Koreya olimpiya terma jamoasi Londonda bronza medali sohibiga aylandi. 2015 yilning 17 dekabrida Xitoy super-ligasi vakili - «Xanjou Grintaun» klubida bosh murabbiy sifatida ish boshladi.
S.Arabistoni. Sami Abdulloh al JObir. 1972 yilning 11 dekabrida tavallud topgan. 2008 yilning 21 yanvarida «Al-Hilol» va «MYu» o'rtasida uning xayrlashuv uchrashuvi o'tkazildi. O'shanda Sami Abdulloh penaltidan gol urib, o'yinning 3:2 hisobida o'z jamoasi foydasiga hal bo'lishini ta'minlagandi. Murabbiylik faoliyatini esa Erik Gerets, Gabriel Kalderon va Tomas Dol kabi buyuk mutaxassislar yonida boshladi. Xususan, 2012 yili Frantsiyaning «Oser» klubida malaka oshirib qaytdi. 2013 yilning may oyida «Al-Hilol» boshqaruvini o'z qo'liga oldi. O'sha mavsum yakunida jahon murabbiylari reytingida 19-o'rinni band etdi. Keyinchalik BAAning «Al-Vahda» klubida ham ishladi.
Xitoy. Xao Xaydong. 1970 yilning 25 avgustida tavallud topgan. Golli vaziyatni sezish qobiliyati juda baland edi. Shuning hisobiga Xitoy futbolining so'nggi 25 yildagi eng nomdor o'yinchilari qatoriga kirdi. Xitoy bozoriga katta umid bilan qaragan «Sheffild Yunayted» klubi 2005 yili Xaydongni ramziy narx - 1 funtga sotib olgandi (keyin ushbu antirekord «Chelsi» tomonidan yangilandi - «aristokratlar» braziliyalik himoyachi Aleks uchun atigi 1 evro to'lashdi).
Xao garchi Angliyada jarohati tufayli o'ynolmagan bo'lsada, «Sheffild» akademiyasida uzoq vaqt ishladi. Klub Xitoy chempionati vakili - «Chende Bleyds» bilan hamkorlikni yo'lga qo'yganidan so'ng esa, Xaydong o'z yurtiga qaytib, mustaqil ravishda murabbiylik faoliyatini boshladi. Ayni payt Xitoy 1-ligasida ishtirok etuvchi «Tyantszin Suntszyan» klubi egasi hisoblanadi. Ushbu jamoa 2006 yili tashkil topgan va 60 ming kishilik arenaga ega.
Davomi InterFUTBOL gazetasi blogida.
— deya xabar beradi uff.uz nashri.