Londonda tug'ilib o'sgan Rahim Sterling «Liverpul»da tanilib, inglizlarning eng qimmatbaho futbolchisi sifatida «Manchester Siti»ga yo'l oldi. «Shaharliklar»ning kichikroq qishloq hududi bilan teng bo'lgan Uemblida ilk marta intervyu bergan iqtidorli hujumchi o'zining bolalikdagi orzulari, katta futboldagi taassurotlari, «Liverpul»dan «Siti»ga o'tishi sabablari va terma jamoadagi faoliyati haqida hikoya qildi.
Yumshoq o'rindiqqa xotirjam joylashib olgan Rahim professional futboldagi ilk kunini yodga oldi: «10 yoshli paytimda meni «KPR» akademiyasiga taklif etishdi».
2005 yilning 8 mart oqshomida yosh Sterling Uembli Trayenglda joylashgan uyda televizorni yoqdi. O'sha oqshom «Chelsi»-«Barselona» bahsi namoyish etilgandi: projektorlar nuriga ko'milgan «Stemford Brij», EChLning madhiyasi: «Ronaldino o'shanda shunday ajoyib gol urdiki, uni bir umrga eslab qoldim».
Darhaqiqat, Ronaldino bolakayning qalbidan chuqur joy olgan futbolchilardan biri bo'lib, Rahim o'z tengdoshlarini aldab o'tayotgan paytlarda unga o'xshashga intilardi. «Televizorga tikilib, madhiyaga quloq solar ekanman, shunday nufuzli turnirda to'p surish menga ham nasib etadimi, degan savol xayolimdan o'tdi».
Oradan o'n yil o'tgach, Sterling eng qimmatbaho angliyalik futbolchiga aylandi. Bu mavzuga uning Liverpuldagi ilk taassurotlaridan keyin qaytamiz. Stiven Jerrardga duch kelgan yosh futbolchi haykaldek qotib qolgandi: «Bo'lishi mumkin emas, bu haqiqiy Stivi Ji emas, bu shunchaki mumdan yasalgan haykal».
Keyin mavzu Rahimning onasi - Nadinga ko'chdi. Shubha yo'qqi, u hozir ham farzandining hayotida muhim o'rin tutadi. «Siti» «Vest-Xem»ga qarshi maydonga tushganida yangi jamoasining dastlabki mag'lubiyatidan jig'ibiyroni chiqqan hujumchi echinish xonasida onasidan kelgan «SMS»dan xabardor bo'ldi: «Sen ko'proq jarima maydonchasi ichida o'ynashing kerak. Astoydil mehnat qil. Onang».
«Liverpul»dan 44 mln. funt evaziga «Siti»ga kelgan hujumchiga yam-yashil maysalar qo'ynidagi Uilmsloudan yangi uy berishdi. Sterling aynan shu hududda o'zining xususiy sartaroshxonasini ochish niyatida. Inshoot deyarli tayyor holda - binoning poli bitgan o'rindiq va ko'zgular o'rnatilsa, bo'ldi. Bir qarashda qo'rs va chapanidek ko'rinadigan Rahim aslida odobli va xushmuomala yigit. Suhbatimiz nihoyasiga etgach, u fotografning asbob-uskunalarini mashinaga ortishda ko'maklashib yubordi. O'sha paytda englari shimarilgan Sterlingning chap qo'liga tushirilgan ajoyib naqsh etiborimizni tortdi. Unda tasvirlangan jajjigina bolakay «Uembli»ga qarab turibdi, qo'lida to'p, egnida o'ninchi raqam yozilgan futbolka. «Bu mening «KPR»dagi raqamim. Stadiondan atigi 5 daqiqalik yo'l uzoqligida yashaganim bois, inshootning qad rostlashini muntazam ravishda kuzatib turganman. Uning yonidagi maydonchada to'p surganim uchun, baland kranlar yordamida amalga oshirilgan qurilish ishlaridan yaxshi xabardorman. O'sha paytlarda bu stadion ishga tushsa, albatta unda to'p suraman, deb dilimga tugib qo'ygandim. Mana, suratda orzuni amalga oshirish uchun stadionga qarab turibman».
Davomi InterFUTBOL blogida.
— deya xabar beradi uff.uz nashri.