FIFA prezidenti kursisiga da'vogarlardan biri shayx Salmon bin Ibrohim al Xalifa Sky Sportsga eksklyuziv intervyu berib, jahon futbolida kuzatilgan oxirgi voqealarga munosabat bildirdi. Shuningdek, saylovlarda g'olib chiqish imkoniyatini chamalab ko'rdi.
Bilasiz, Yozef Blatterning vorisi 26 fevral kuni Tsyurixda saylanadi. Ko'pchilikning fikricha, FIFA prezidenti lavozimi uchun ketayotgan kurashda aynan shayx Salmon favoritdir. Osiyo futbol konfederatsiyasining amaldagi rahbari qit'adoshlaridan ko'proq ovoz olishga umid bog'lamoqda. Qolaversa, afrikaliklarning ham uning nomzodini qo'llashlari ehtimoli baland. Ma'lumot uchun aytsak, OFK tarkibida FIFAning 46ta a'zosi bor, AFKda esa 56ta.
Xullas, 2ta qit'a vakillari jami 102ta ovozga ega ekanliklarini hisobga olsak, shayx Salmonni bejiz favorit sanashmayotgani oydinlashadi. Bahraynlik funktsionerning o'ziga kelsak, u Angliya futbolini g'oyat qadrlaydi va 30 yildan buyon «Manchester Yunayted» klubiga muxlislik qiladi. OFK prezidenti Sky Sports muxbirlari bilan suhbat chog'i agar saylovlarda g'olib chiqsa, ser Aleks Fergyusonni o'z maslahatchilari qatorida ko'rishga qarshi bo'lmasligini ham alohida ta'kidladi.
- Nima deb o'ylaysiz, siz ilgari surayotgan aralashmaslik siyosati ayni payt FIFAga mos keladimi?
- Harqalay, qo'l qovushtirib, bekor o'tirish niyatim yo'q. FIFAga aniq struktura kerak, tashkilotga munosib odamlarni jalb etish lozim.
- Premer-liganing ashaddiy muxlisi ekanligingizni ta'kidladingiz. FIFAning aynan APL uslubida ishlashini xohlarmidingiz?
- Premer-liga va bundesliga nechog'li muvaffaqiyatga erishayotganini hamma ko'rib turibdi. Deylik, premer-liganing daromadi hattoki, FIFAnikidan ham ko'p. Ha, menga Angliyada yo'lga qo'yilgan tizim yoqadi. Mas'ul shaxslar o'z zimmalaridagi ishlarni ajoyib tarzda uddalashyapti. Endi FIFAda ham shunday tizimni tatbiq etish lozim. Biz avvalo, inglizlardan o'rganishimiz va ularning maslahatlariga quloq tutishimiz kerak.
- Saylovlarda g'alaba qozongan taqdiringizda ishonchli bosh kotibga ehtiyoj sezasiz. Richard Skademor bu ish uchun barcha zarur xususiyatlarga egami?
- Richard - yaqin do'stim, unga ishonaman. Zero, salohiyatiga gap bo'lishi mumkin emas. Biroq ushbu mas'uliyatli ishni o'z zimmasiga olishga tayyor kishini topish lozim. Hozirdan aniq ism-familiyalarni aytishni istamayman. Chunonchi, yakuniy qarorni ijrochi qo'mita qabul qiladi. Demoqchimanki, avvalo, FIFA xodimlari bilan maslahatlashib ko'rish maqsadga muvofiq. To'g'ri, agar Richard bosh kotib sifatida ishlashga rozi bo'lsa, bu biz uchun katta sharaf hisoblanadi. Lekin undan qolishmaydigan boshqa nomzodlar ham bor. Shunisi aniq, men har qanday holatda doimo Skademorning fikrlarini hisobga olaman.
- Umuman, Richard Skademor bilan qachondan beri tanishsiz?
- Tanishganimizga 3 yoki 4 yil bo'ldi. O'zaro bir necha marta uchrashdik. Richard - futboldagi muhim «figura», uning ishlarini hamma qadrlaydi.
- Oxirgi 12 oy ichida FIFAda yuz bergan voqealar xususida qanday fikr bildira olasiz?
- Barchasi o'ta ayanchli, ammo yashashda davom etish lozim. «Soya» butun FIFAni qamrab olishiga yo'l qo'ymaslik zarur. Bunda eng muhimi - rost va adolatli gapirish. Axir tashkilotda 400 nafardan ko'p xodim o'z ishini yaxshi bajaryapti. Futbol o'lgani yo'q, o'yinlar va turnirlar hamon davom etyapti. Umuman, ro'y bergan hodisalarga FIFA javobgar emas. Misol uchun, boshqa sport turlarida hammasi bundan ham yomonroq. Faqat, FIFAdan farqli o'laroq, ularni mikroskop orqali kuzatishmaydi. Hammaning og'zida bir gap: «FIFAda mojaro, FIFAda janjal». Lekin men bu masalada boshqacha fikrdaman. Aytaylik, engil atletika yoki tennisga qarang - doping mashmashalari, yana nimadir... Ishonchim komil, ayrim sport turlarida futboldagidan yomonroq ishlar bo'ladi...
Davomi InterFUTBOL gazetasi blogida.
— deya xabar beradi uff.uz nashri.