Xudoyberdi To'xtaboevning “Sariq devni minib” asari qahramoni Hoshimjonni yaxshi bilasiz. Hech bo'lmaganda shu asar asosida olingan filmni tomosha qilgansiz. O'sha Hoshimjon sinfdoshidan alamzada bo'lib, qanday janjal chiqarishni bilmay,  o'tgan yili kuchugini tepganini bahona qilib, xumoridan chiqib olgan edi. Umid qilamizki, hozir biz ko'tarib chiqayotgan mavzu bilan o'sha Hoshimjonga o'xshab qolmaymiz. Zero, bizni alamzada qilgan sabab hali u qadar eskirib ulgurgani yo'q. O'tgan yilgi “kuchuk”ni eslamay ham nimalardir talab qilishga haqlimiz.
O'zbekiston Olimpiya terma jamoasi Osiyo chempionatida bemisl darajada muvaffaqiyatsiz o'ynab qaytganiga hech qancha vaqt bo'lmadi. Ko'rdik, qit'a birinchiligida biznikilar bemalol chempionlikni qo'lga kiritishlari ham mumkin ekan. Ammo qaysidir sababga ko'ra bu ish amalga oshmay qoldi. Kamiga “borimiz shu”, degan mash'um jumlani yana bir bor eshitdik. Demak, ushbu mantiq bo'yicha fikr yuritsak, Olimpiada yo'llanmasiga avval-boshdan umid qilishning keragi bo'lmagan. Chunki borimiz shu, bunday yuksak orzu uchun esa futbolchilar saviyasi etarli emas edi. Shundaymi? Balki. Ammo shu o'rinda boshqa holatni yodga olishga izn bersangiz.
Xabaringiz bor, O'FF prezidenti Mirabror Usmonov ancha vaqt muqaddam TJM oldiga Olimpiada yo'llanmasini qo'lga kiritish vazifasini qo'ygan edi. Yaxshi bilamiz, Mirabror Zufarovich shoshma-shosharlik bilan, oxirini o'ylamay natija talab qiladigan rahbar emas. Bunga asos sifatida uzoq yillar davomida biror marta Olimpiada yoki JCh yo'llanmasi talab qilinmaganini ta'kidlash etarli. Mirabror Usmonov shu vaqtga qadar sermulohaza hamda jiddiy rahbar sifatida taassurot qoldirib keldi. London-2012 va Braziliya-2014 yo'llanmasi uchun arzimagan bitta gol etmay qolganda ham xotirjamlikni yo'qotmadi. Yodingizda bo'lsa, o'shanda Mirabror aka JCh yo'llanmasi terma oldiga vazifa sifatida qo'yilmaganini rasman aytgan edi.
Gapimiz quruq bo'lib qolmasligi uchun O'FF prezidentining o'sha bayonotini yodga olsak. Avvalgi saralashdagi muvaffaqiyatsizlikdan so'ng Mirabror aka: “JChga shunchaki ishtirok emas, balki yaxshi natija uchun borishimiz kerak. To'purarlar sonini ko'paytirish uchungina mundialga chiqishdan nima naf? Biz JChga tayyor holda boramiz”, degandi. Bundan esa xulosa chiqarsa bo'ladiki, Mirabror aka hech qachon, hech kimdan ilojsiz narsa talab qilmagan. Ammo shunday rahbar ham bu safar terma oldiga Olimpiadani vazifa sifatida qo'ydi. Demak barchasini hisob-kitob qilgan. Xo'sh, endi kim aybdor? TJMmi? Babayanmi? Yoki O'FF?
Aybdorlar haqida shu vaqtga qadar ko'p va xo'p gapirildi. Qolaversa, xalqning o'zi kim qandayligini juda yaxshi biladi. O'FFning vazifasi – TJM so'ragan barcha sharoitni yaratib berish edi. TJMning vazifasi – Olimpiya terma jamoasi tayyorgarligini nazorat qilish va munosib murabbiylar shtabi tayinlash. Murabbiylar shtabining vazifasi esa – tarkib va taktikani to'g'ri tanlash bo'lgan. Bu shartlarning qay biri bajarilgani va qay biri aro yo'lda qolib ketganini yaxshi bilasiz. Biz esa shu o'rinda O'FF rahbarining yana bir gapini eslaymiz. Mirabror Usmonov vazifa bajarilmagan taqdirda kim qanday jazoga tortilishini aniq-tiniq aytgandi – TJM rahbari Asqar Tolibjonov va texnik direktori Rustam Akromov. Bu mutaxassislar futboldan batamom chetlatilishi haqida gap ham bo'lgan. Hozircha faqat bir kishini jazolashga zarurat yo'q – Rustam Akromov. Bu insonning hamiyatiga tasanno, o'zini chetga olishi uchun birgina hayfsan etarli bo'ldi. Ammo afsuski boshqalar haqida bunday deya olmaymiz.
Aftidan endi TJM rahbariyatini iste'foga chiqaradigan vaqt keldi, shekilli. Boz ustiga hozir Asqar Tolibjonovni hurmat bilan kuzatib qo'yish uchun juda qulay vaqt. Oldinda hech qanday muhim musobaqa kutib turgani yo'q, futzal bo'yicha Osiyo chempionatiga kelsak, bu musobaqani Asqar akasiz ham ko'ngildagidek o'tkazib olsa bo'ladi. Har holda futzal termasi bosh murabbiyi Xose Mendes Tolibjonovga juda muhtoj bo'lishiga ishonish qiyin. Shunday ekan, mabodo O'FF rahbariyati darhaqiqat aybdorlarni jazolash niyatida bo'lsa, hozir juda o'rni. Shundagina o'zbek futbolida qandaydir o'zgarish bo'lishiga ishonish mumkin.
Muxlislar esa o'sha o'zgarishni intiq bo'lib kutmoqdalar. Nima bo'lganda ham aybdorlar tegishlicha jazolanishi juda shart.Aks holda umidlar yana puchga chiqadi, eski hammom eskiligicha qolib ketadi. Biz aniq bir kishini jazolashni talab qilmaymiz, avval yaxshilab surishtiruv o'tkazishsin. Balki Asqar Tolibjonovda ayb yo'qdir, boshqa kimdir o'z ishini bajara olmagandir. Demak o'sha «kimdir»ni topib jazolash kerak. Surishtiruv ishlari o'tkazilsin, aybdor topilsin, jazolansin. Mayli Asqar aka bo'lmasa, PFL direktori Farhod Magometov ishdan olib tashlansin. Chunki u kishi ham nima uchundir xizmat vakolatidan tashqari bo'lsa-da Qatardagi delegatsiya tarkibida bor edi. Mehnatkash-da, endi. Qo'shimcha ishdan qochmaydi. Kim biladi deysiz, balki Farhod akaning ham termaga foydasi (zarari) tekkandir…
Agar Farhod Magometovda ham ayb bo'lmasa, topishsin o'sha aybdorni. Balki O'FF qorovuli aybdordir. Osiyo chempionatiga ketish oldidan qorovul terma jamoa murabbiylar shtabi tomon ishonqiramay qaragandir. Tarkibni ko'rib, bosh chayqab qo'ygan bo'lishi mumkin. Bu esa murabbiy va futbolchilar ruhiyatiga salbiy ta'sir o'tkazib, yutqazib qo'yishgandir. Bo'lishi mumkin-ku, to'g'rimi? Bo'shatvorishsin!
Agar qorovulning bir o'zi kamlik qilsa, unga qo'shib farrosh opalardan birortasini ham ishdan olsa bo'ladi! Buyruqqa esa quyidagi so'zlarni yozib qo'yishsin: “Farrosh opa Falonchixon Pismadonchieva Asqar Tolibjonovning stoli ustidagi changni yaxshilab armagani uchun mutasaddining kayfiyati buzilgan va Osiyo chempionati oldidan kerakli tadbirlar amalga oshmay qolgan. Shu sababli, o'z ishiga sovuqqonlik va mas'uliyatsizlik bilan munosabatda bo'lgani uchun Falonchixon opa Pismadonochieva farrosh lavozimidan iste'foga chiqarilsin!”
Bo'ldi, olam guliston. Muxlislarga hech bo'lmasa shuni ro'kach qilib tursa bo'ladi. Axir jazolashsin-da kimni bo'lsa ham. To'rt yillik mehnat, uqubat va umidlar havoga sovurilgani shundoq qolib ketaveradimi? Zafar QOSIMOV

— deya xabar beradi uff.uz nashri.