Futzal bo'yicha o'tkaziladigan Osiyo chempionati oldidan yaxshi yangilik tarqaldi - endi terma jamoamizda jismoniy tayyorgarlik bo'yicha ispaniyalik Arkait Sisniega Gomes faoliyat yuritadi. Shuningdek, braziliyalik fizioterapevt Anxoleto Aleksandre ham terma jamoa murabbiylar shtabi tarkibiga qo'shildi. Navbatdagi qit'a birinchiligi jahon chempionatiga yo'llanma beradigan muhim musobaqa ekanligini inobatga olsak, bu o'zgarishlar kishini xursand qilishi turgan gap. Ayniqsa, O'zbekiston futzal terma jamoasi so'nggi o'rtoqlik o'yinlarida u qadar ko'ngilli natija qayd etolmagan bir vaqtda, bu - yaxshi yangilik.
Aftidan, Qozog'iston termasiga qarshi kechgan 2ta o'rtoqlik o'yinidagi mag'lubiyatlar jamoamiz bosh murabbiyi - Xose Mariya Mendezni tashvishga solib qo'ygan ko'rinadi. Harqalay, murabbiylar shtabidagi o'zgarish eng avvalo, Mendezning shogirdlari jismoniy holatidan ko'ngli to'lmayotganini bildirsa kerak. Murabbiy shuning uchun ham jamoaning og'riqli nuqtalarini yopishga urinmoqda. Ammo shu o'rinda savol tug'iladi -  u bu o'zgarishlarni amalga oshirishga biroz kechikmadimikan? Axir Osiyo chempionati boshlanishiga sanoqli kunlar qoldi...
Albatta, o'rtoqlik o'yinlaridagi natijaga qarab, terma jamoaning tayyorgarligiga baho berish noto'g'ri. Boz ustiga, Qozog'iston futzal termasi anoyi raqib emas. To'g'ri, yon qo'shnilarimiz UEFA tarkibiga o'tgandan buyon biror marta Evropa chempionatida ishtirok eta olmadilar, ammo bu holat raqib salohiyatini aslo pasaytirmaydi. Zero, Qozog'istonda futzalni rivojlantirish yo'lida juda katta ishlar amalga oshirilgan va ular orasida eng ko'zga tashlanadigani - xorijlik o'yinchilarni mahalliylashtirishdi. Agarda O'zbekiston termasiga qarshi kechgan uchrashuvda qozog'istonliklar tarkibida gol urgan futzalchilar nomiga nazar tashlasangiz, bunga ishonch hosil qilishingiz mumkin. Chunki Chingizdan farqli o'laroq, Leo va Duglas - bizning hududlarga aslo mos kelmaydigan ismlar. Shunday ekan, balki «qozoqlar»ga qarshi kechgan har ikki uchrashuvdagi 1:3 hisobiga sabab topish mumkindir. Ammo...
Gap shundaki, O'zbekiston futzal termasi qozoq diyoridagi o'yinlardan tashqari, tojikistonliklarga qarshi ham manejga tushdi va yaxshi natija qayd etolmadi. Ushbu raqib tarkibida braziliyalik futzalchilar yo'qligini inobatga olsak, bunisi endi biroz tashvishlanarli holat. Ayniqsa, Osiyo chempionati oldidan bunday o'rtoqlik o'yinlari muxlis ko'nglini alag'da qilib qo'yishi tayin.
Sportda shunday qoida bor - jamoa muhim musobaqa oldidan o'z formasini eng yaxshi holatga keltirib olishi kerak. Sportchining har doim jismoniy holatini birdek ushlab turishi juda qiyin. Shu sababli, u muhim vaqt­da sport formasini eng yuqori cho'qqiga chiqarishga harakat qiladi. Bu ish yakka sport turlarida osonroq. Masalan, bokschi, gimnastikachi yoki kurashchi o'z holatini nazorat qilib borishi mumkin. Ammo jamoaviy sport turida hammasi ancha murakkab ko'rinish oladi. Futzal, futbol, voleybol yoki basketbolda murabbiyning o'rni katta ekanligiga sabab ham shu.
Xullas, terma jamoamiz murabbiylar shtabi Osiyo chempionati boshlangunga qadar futzalchilar tayyorgarligini bir maromga solish harakatida. Xorijlik mutaxassislar aynan shu maqsadda chaqirilgani turgan gap. Umid qilamiz, Xose Mariya Mendez bu ishni uddalay oladi. Masalan, u 6 oy muqaddam shogirdlarini ancha yaxshiroq holatga keltirgan edi. 2015 yilning iyul oyida nisbatan kuchli hisoblangan Qirg'iziston futzal termasi birin-ketin 3ta o'rtoqlik o'yinida mag'lubiyatga uchratilgani fikrimizni tasdiqlaydi. O'shanda futzalchilarimiz raqibdan 4:0, 3:2 va 5:3 hisobida ustun kelgandilar.
Davomi InterFUTBOL gazetasi blogida.
— deya xabar beradi uff.uz nashri.