2016 yilning 6-7 fevral kunlari Frantsiya poytaxti Parij shahrida dzyudo kurashi bo'yicha “Katta dubulg'a” turkumiga kiruvchi yirik xalqaro turnir bo'lib o'tdi.
An'anaviy tarzda o'tkaziladigan ushbu nufuzli xalqaro turnirning bu yilgi bahslarida 91 davlatdan jami 557 nafar dzyudo ustasi 14 vazn toifasida g'oliblik uchun kurash olib bordilar.
Ushbu musobaqada “Rio-2016” o'yinlarining yo'llanmasi uchun reyting ochkolar ham o'ynaldi. Jumladan, 1-o'rin sohibi 500 ochkoga, kumush medal sovrindori 300 ochkoga, bronza medalga sazovor bo'lgan sportchilar esa 200 reyting ochkosiga ega bo'ldilar.
Sakkiz nafar sportchi bilan ishtirok etgan O'zbekiston terma jamoasi bitta beshinchi o'rin bilan umumjamoa hisobida 25-o'rinni band etdi. Hamyurtlarimiz orasida eng yuqori ko'rsatkichga Sharofiddin Lutfullaev (-60 kg) erishdi.
Ushbu xalqaro turnirda Vatanimiz sharafini Sharofiddin Lutfullaev (-60 kg), Rishod Sobirov (-66 kg), G'iyosjon Boboev (-73 kg), Sharofiddin Boltaboev (-73 kg), Yahyo Imomov (-81 kg), Sherali Jo'raev (-90 kg), Ramziddin Saidov (-100 kg) va Abdullo Tangriev (+100 kg) himoya qildilar.
Ma'lumot uchun. Joriy yilda “Katta dubulg'a” turkumiga kiruvchi turnirlar, shuningdek, Boku (Ozarbayjon, may), Tyumen (Rossiya, iyul), Abu-Dabi (BAA, noyabr) va Tokio (Yaponiya, dekabr) shaharlarida o'tkaziladi. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.