Uchrashuvdan avval “Neftchi” SK stadioniga kelgan muxlislar uchun farg'onalik san'atkorlar tomonidan kontsert dasturi tashkil etildi. Raqqosalar, xonandalar va bir qator taniqli so'z ustalarining chiqishlari o'yingohga kelgan muxlislarga yaxshi kayfiyat bag'sh etdi.
Soat 15:00da final o'yini boshlandi. Aytish kerakki, Andrey Fyodorov va Xamid Aktamov ilk daqiqalardan boshlab maydonga jangovor tarkiblarni tushirishdi. Ammo keskin kurashlarga boy bo'lgan bahsning ilk taymi nursiz durang bilan yakunlandi. Kutilganidek, ikkinchi bo'limda “Neftchi” va “Qizilqum” jamoalari o'yinni kuchaytirishdi.
Ta'kidlash joizki, ikkinchi taymda zaxiradan kurashga qo'shilgan futbolchilar uchrashuvga “yangi qon” olib kirishdi. Ikkinchi bo'limning o'rtalariga kelib, “Neftchi” futbolchisi tepgan to'p raqib vakilining qo'liga tegdi deb hisoblagan hakam penalti belgiladi. Ayni shu daqiqalardan tortishuvli vaziyat yuzaga keldi. Hakamning qaroridan norozi bo'lgan navoiyliklar o'yinni yakunlamasdan birin-ketin maydonni tark etishni boshlashdi.
Biroq ko'p o'tmay vaziyat ijobiy tomonga o'zgartirdi. Xamid Aktamov shogirdlari biroz o'tib yana maydonga qaytishdi va o'yinni davom ettirishdi. “Qizilqum” darvozasiga belgilangan penaltini esa Shukur Po'latov aniq amalga oshirib hisobni ochdi va bu gol yakunda “Neftchi”ning g'alabasini ta'minladi. 1:0, “Neftchi” g'alabasi.
“Hokim kubogi-2016”. Final
“Neftchi” – “Qizilqum” 1:0 (0:0)
Gol: Shukurali Po'latov.
“Neftchi”: Abdumavlon Abdujalilov, Shukur Po'latov, Jahongir Mehmonov, Dilyor Irmatov, Ilxom Boydedaev, Javohir Rasulov, Umid Qodirov, Alisher Samatov, Sardor Eminov, Damir Nazinov, Murod Bobojonov.
Zaxira: Sergey Smorodin, Sardor Qulmatov, Doston Tursunov, Muxsin Ubaydullaev, Sherzod Hakimov, Otabek Isroilov, Xusniddin G'ofurov.
“Qizilqum”: Erkin Jabborov, Giorgi Kvesmeshvili, Akmal Rustamov, Vecheslav Shevchenko, Baxriddin Vahobov, Alisher Yusupov, Sherali Jo'raev, Samandar Shodmonov, Azizbek Usmonov, Ilxom Yunusov, Andrey Derkach.
“Neftchi” PFK matbuot xizmati
— deya xabar beradi uff.uz nashri.