9 fevral kuni Toshkentning “Bunyodkor” jamoasi OChL-2016 “pley-off” bosqichi doirasida BAAning “Al-Shabab” klubini qabul qiladi.
Uchrashuv oldidan, “Al-Shabab” bosh murabbiyi Kayo Junior matbuot anjumanida ishtirok etdi.
- Hammaga hayrli kun. “Bunyodkor”ni Chempionlar ligasining “pley-off” bosqichida ishtirok etayotganligi bilan tabriklayman. Bunday ajoyib stadionda bo'lib turganimdan xursandman. Men “Bunyodkor” borasida braziliyalik do'stlarim Skolari va Ziko bilan gaplashdim. Ular “Bunyodkor” haqida juda iliq fikrlarni aytishdi. Raqib kuchli jamoa ekanligini yaxshi bilamiz. Bir yil oldin bu bosqichdan muvaffaqiyatli o'tganligi ham yaxshi esimda. Biz natijaga erishish uchun harakat qilamiz. “Bunyodkor”ning BAAda o'tkazgan yig'ini doirasidagi nazorat uchrashuvlarini kuzatdim. Biroq rasmiy va o'rtoqlik uchrashuvlari farq qiladi. “Bunyodkor”ning bo'sh nuqtalaridan foydalanib qolishimiz kerak. Shuningdek, BAAda chempionat bahslari davom etayotganligi bizga qo'l kelishi kerak. Shu tarkibimiz bilan “Fors Ko'rfazi” kubogida g'olib chiqqandik. Chempionatni 3-o'rinda yakunlagandik. Lekin negadir bu yilgi ishlarimiz ko'ngildagidek emas. Shu boisdan ham asosiy e'tiborimizni Chempionlar ligasiga qaratmoqchimiz. Tarixni hurmat qilaman. Biroq futbol bugungi kun bilan o'ynaladi. Avvalgi natijalar esa hech qanday muhim ahamiyat kasb etmaydi. O'ylashimcha, jamoalarning imkoniyatlarini teng deb baholayman. Tarkibimizda yo'qotishlar yo'q. Bu esa meni xursand qilmoqda. Faoliyatim mobaynida endi birinchi marotaba O'zbekiston klubi bilan to'qnash kelyapman. O'ylashimcha, Osiyoda Yaponiya va Janubiy Koreya klublari kuchliroq. O'zimizning mintaqadan esa Eron jamoalariga qarshi o'ynash og'ir, degan bo'lardim, - deydi Kayo Junior.
— deya xabar beradi uff.uz nashri.