Shifokorlar - sportda o'z o'rniga ega insonlar. Ularsiz millionlar o'yinini tasavvur qilib bo'lmaydi. Futbol nafaqat dribling yoki texnika, balki ayovsiz kurash maydoni hamdir. Shunday ekan, shifokor yordamisiz hech bir futbolchi faoliyatini davom ettira olmagan bo'lardi. Bugungi sahifamiz mehmonlari esa nafaqat sportchilar sog'lig'ini muhofaza qiladilar, balki o'zlari ham futbol bilan muntazam shug'ullanib boradilar.
ShIFOKOR-FUTBOLChILAR
Futzal bo'yicha havaskorlar o'rtasida o'tkazilgan Toshkent shahar birinchiligida bu yil shifokorlar jamoasi g'oliblikni qo'lga kiritdi. Ammo bu g'alaba sog'liq posbonlari erishgan muvaffaqiyatlar ichida yagona emas. Respublika ixtisoslashtirilgan xirurgiya markazi bazasida tashkil etilgan jamoa bunga qadar ikki marta xalqaro musobaqalarda ham qatnashgan va g'oliblikni qo'lga kiritgan edi. Ha, professional futbolchilarimiz uchun hozircha faqat orzu bo'lib qolayotgan g'alabalar ular uchun «cho't» emas. Mamlakatimiz shifokorlaridan iborat O'zbekiston terma jamoasi 2013 yilda Janubiy Koreya termasini 6:4 hisobida mag'lub etgan edi. 2014 yilda esa Rossiyada o'tkazilgan xalqaro musobaqada Rossiya, Ukraina va belaruslik hamkasblaridan ustun kelib, g'oliblikni qo'lga kiritishdi. 2015 yilda esa xuddi shunday musobaqa Toshkentda tashkil etildi va bu safar ham ularga bas keladigan raqib topilmadi.
E'tiborli tomoni, o'sha musobaqada o'zbekistonlik shifokor-futzalchilarga 4:1 hisobida imkoniyatni boy bergan Chexiya terma jamoasi oradan bir oy o'tib, AQShda tashkil etilgan jahon chempionatida g'oliblikni qo'lga kiritgan edi. Chexlar aslida, Toshkentga jahon chempionati oldidan yig'in o'tkazish maqsadida kelgan ekanlar. Kim biladi deysiz, balki hamyurtlarimizga qarshi o'tkazilgan o'sha o'yindagi tajriba ularga mundial g'olibligini keltirgandir.
Mana endi, O'zbekiston shifokorlar terma jamoasi ham Ispaniyada o'tadigan mundialga tayyorgarlik ko'rmoqda. Nasib qilsa, yozda hamyurtlarimiz Kataloniyaning Barselona shahri mezbonlik qiladigan XII jahon chempionatida ishtirok etadilar. Mana shu musobaqa oldidan shifokor-futzalchilar tayyorgarlikka zo'r berishgan. Quyida ular bilan tanishib olishingiz mumkin.
Temur KABULOV (hujumchi, akademik V.Vohidov nomidagi Respublika ixtisoslashgan xirurgiya markazi xirurgi)
Temur Kabulov 2007 yildan buyon «RIXM» shifokorlaridan tuzilgan jamoa sharafini himoya qilib keladi. Shu bilan birga, mohir shifokor-sportchi O'zbekiston terma jamoasida  muntazam to'p suradi. O'zi shundoq ham hafta davomida og'ir ish bilan band inson qanday qilib futbol uchun vaqt topa oladi? Temur aka bilan qilgan suhbatimiz mana shu mavzudan boshlandi.
- Hordiq chiqarish - bu faqat dam olish yoki televizorda futbol tomosha qilish degani emas. Futbolni darhaqiqat yaxshi ko'rgan odam maydonga tushib yugursa, charchamaydi, balki dam oladi. G'uborlari ketadi. Keyin sport bilan shug'ullanish tanani chiniqtiradi. Shaxsan o'zim ham havaskor sportchi, ham professional shifokor sifatida shunga intilaman.
- 2013 yilda futbol bo'yicha Janubiy Koreya shifokorlar terma jamoasiga qarshi maydonga tushib, 6:4 hisobida g'alabaga erishgan ekansizlar. Koreyaliklarni professional darajada mag'lub etish, terma jamoalarimizga qiyinchilik tug'dirishidan xabardormisiz?
- Albatta bilaman. Ammo biz ularni ortiqcha muammosiz mag'lub etgandik. Endi O'zbekiston milliy terma jamoasidan ham shuni kutamiz (kuladi)...
- Temur aka, yaqinda Qatarda kechgan olimpiya jamoalari o'rtasidagi Osiyo chempionatida ikki markaziy himoyachi - Bobur Yo'ldoshev va Odil Hamrobekovlar sog'ligida yuzaga kelgan muammo tufayli o'ynay olmadilar. Shifokor sifatida ayting-chi, professional futbolchining bunday holatga tushishida kim aybdor? O'zimi yoki klub?
- Bu borada asosiy mas'uliyat klub shifokorlar xizmatida, deb o'ylayman. Futbolchi har bir mashg'ulot va o'yindan so'ng tibbiyot xodimlari nazoratida bo'lishi shart. Bilishimcha futbolchilarimiz har yili chuqurlashtirilgan tibbiy ko'rikdan o'tib turadilar. Biroq og'ir bosim ostida yuradigan sportchiga bu kamlik qilishi mumkin. Klublar shifokorlari ulardagi muammoni o'z vaqtida payqaganda, balki vaziyat bu qadar og'irlashmagan bo'larmidi. Yana bir jihat - sportchi o'z holatini nazorat qila olishi lozim. O'zidan o'tganini insonning o'zidan boshqa hech kim yaxshiroq bilmaydi. Qaeridir bezovta qildimi, demak darhol tibbiyot xodimiga murojaat qilish kerak. Aftidan, yosh sportchilar murabbiy oldida o'zini ko'rsatish uchun tanasini haddan ortiq zo'riqtirib yuborgan ko'rinadi. Shifokor sifatida yoshlarga bunday qilmaslikni maslahat bergan bo'lardim. Eng avvalo, sog'liqni o'ylash kerak. Aks holda, professional faoliyat ham bo'lmaydi...
- Yozda Ispaniyada o'tadigan jahon chempionatida ishtirok etarkansizlar. Bu taklif qanday paydo bo'ldi? Ayni vaqtda tayyorgarlik qanday ketmoqda?
- Musobaqaga taklif V. Vohidov nomidagi Respublika ixtisoslashtirilgan xirurgiya markazi direktori Nazirov Feruz G'ofurovich nomiga kelgan edi. Klinikamiz rahbariyati sportga juda qiziqadi. Masalan, bosh shifokor Hoshimov Shuhrat Xurshidovich ham futbol jamoamiz a'zosi. Ular darhol bu taklifni qo'lladilar va Sog'liqni saqlash vazirligi ko'magida jahon chempionatiga tayyorgarlikni boshlab yubordik. Ayni vaqtda hujjatlar bilan bog'liq rasmiyatchiliklar o'talmoqda. Jamoamiz haftasiga ikki marta mashg'ulot olib boryapti.
Davomi InterFUTBOL gazetasi blogida.
— deya xabar beradi uff.uz nashri.