“Bunyodkor” – “Al-Shabab” (2:0) uchrashuvidan keyingi matbuot anjumanining ikkinchi qismida “qaldirg'ochlar” ustozi ishtirok etdi.
- Avvalo, g'alaba bilan muxlislarimizni tabriklab o'tmoqchiman. Noqulay ob-havo haroratiga qaramasdan ular stadionga kelishdi va bizga dalda berib turishdi. Keyingi uchrashuvlarimizni ham mana shunday g'alabalar bilan yakunlab, ishqibozlarga xursandchilik ulashishni istaymiz. O'yinga tuzgan rejamiz to'liq ish berdi. Avvaldan o'ylangan uslub, g'alabamiz omili bo'ldi.
Yig'inlar mobaynida turli xil o'yin uslublarini sinab olganmiz. Nasimov va Nurmatov hujumda ham, himoyada ham yaxshi o'yin ko'rsatishdi. Bu kabi muhim o'yinlarda, ayniqsa hisob 2:0 bo'lgan pallalarda oldinga o'tib ketib, orqa chiziqni unutib qo'yish kerak emas. Yigitlarimiz raqibni zarba beradigan vaziyatga chiqarmasliklari kerak edi va buni juda yaxshi uddaladilar. Himoyachilarimiz juda yosh yigitlardan tashkil topgan.
Yildan-yilga ular yanada o'sadi va kuchayib borishadi. Chempionlar ligasida shunchaki ishtirok etishdan naf yo'q. Bizning maqsadimiz – bosh sovrinni qo'lga kiritish. Biz harakat qilamiz, ammo buni qanchalik uddalaymiz – vaqt ko'rsatadi. O'tgan yili bizga omad etishmagandi. Umid qilamanki, bu yil yaxshi natijalar qayd etamiz, - deydi Sergey Ivanovich.
— deya xabar beradi uff.uz nashri.