So'nggi yillarda ko'plab futbolchilarimiz faoliyatlarini xorij chempionatlarida davom ettirmoqda. Bu bizni quvontirmasdan qolmaydi. Terma jamoalarimizning saviyasini oshirish uchun ham legionerlarimizning soni ko'paygani ma'qul. Biroq ayrim o'yinchilar turli ekzotik mamlakatlar futbolini tanlamoqda. Aytish kerak, bu yurtlarda futbol yuqori darajaga ko'tarilmagan. Aksincha, saviya juda past hisoblanadi. Demak, ular o'sishdan ko'ra, pulni ko'proq o'ylamoqda. To'g'ri, pul hammaga kerak. Menga, sizga va boshqalarga. Futbolchi etuk bo'lib etishsa, pulning o'zi ortidan quvmaydimi? Evropaliklarning tajribasiga qarang: birinchi navbatda nom uchun o'ynamoqda. Keyinchalik pulning o'zi o'sha nomi chiqqan futbolchi uchun o'ynab beryapti.
Futbolchilarimizning xorij chempionatlariga yo'l olayotganligi quvonarli holdir. Chunki, legionerlarimizning soni qanchalik ko'p bo'lsa, bu futbolimiz rivojiga shunchalik ko'p hissa qo'shadigan omil. Buni maqolaning boshida aytib o'tgandik. Diqqat bilan kuzatayotgan bo'lsangiz, oxirgi yillarda futbolchilarimiz ekzotik mamlakatlarga yo'l olmoqda. Albatta, bunda futbol agentlarining ham hissasi bor. Shuningdek, tanish-bilishlar orqali ham chetga chiqish odatga aylangani hech kimga sir emas. Legioner bo'lish uchun esa nomi ulug' mamlakatga borish shart emas, to'g'rimi?
Deylik, ko'plab futbolchilarimiz faoliyatlarini Qirg'iziston chempionatida ham davom ettirishmoqda. Bir qarashda, bu mamlakat futbolini biznikidan ustunlik jihati umuman yo'q. Moliyaviy tomonlari biroz yaxshidir, balki? Yaqinda bir tanishim Qirg'iziston chempionati haqida gapirarkan, shunday dedi:
- Hech kimga sir emas, Qirg'iziston chempionatining saviyasini oliy ligamiz bilan aslo solishtirib bo'lmaydi. Birinchi ligamizdan ustunlik qilishigina mumkin. Biroq oliy ligamizdagi sharoitlar, imkoniyatlar, klublarning salohiyati borasida qo'shni mamlakat jamoalaridan ilgarilab ketganmiz. Lekin, ko'pchilik futbolchilar biladiki, bu mamlakatda ham xorijlik o'yinchilarga katta maosh berishmoqda. Xususan men uch yil to'p surib, shuni angladimki, bu erda sharoitlar ko'ngildagidek bo'lmasada, pul yaxshi to'lanmoqda. Aytaylik, oyiga 1000-1500 dollar atrofida. Shunday ekan, birinchi ligada to'p surgandan ko'ra, ularning oliy ligasida o'ynash moliyaviy tomondan yaxshi emasmi?! Aynan shu sabab, ayrim futbolchilarimiz Qirg'iziston chempionatini afzal bilmoqda.
Chindan ham tanishimning so'zlariga quloq tutib, nima sababdan Qirg'iziston chempionati tanlanayotganliginini fahmladim... Birinchi ligadagi klublarimizdan buncha oylik kutish mantiqsizlik. Hattoki, ayrim oliy liga klublarimiz bunchalik pulni bera olishmaydi.
Boshqa mamlakatlar haqidachi? Maldiv orollarida ham bitta futbolchimiz to'p suryapti: darvozabon Alisher Ahmedov faoliyatini shu mamlakat chempionatida davom ettirayotganligidan xabaringiz bor. Ekzotik mamlakat hisoblangan Maldivda futbol rivojlanish bo'sag'asida turibdi. Vaholanki, terma jamoalari ham sekin-asta o'zining yuqori darajasiga ko'tarilishmoqda. Aytishlaricha, dam olish uchun ixtisoslashgan yurtda futbol rivojlanmoqda. Bunga ular legionerlarni taklif qilish orqali erishishmoqda. Asosan Braziliya, Angliyadan kelgan o'yinchilar hisobiga jamoalar kuchaytirilmoqda. Albatta, nomi ulug' bo'lgani bilan, bu futbolchilarning yuqori taraflari yo'q. Biroq Maldiv uchun bu namunali holatlardan biri desa bo'ladi. Ushbu yurtda ham legionerlarga oyiga 5-6 ming dollar atrofida maosh to'lashmoqda. Tabiiyki, bu mablag' uchun yurtimizdan ham borib, to'p suradigan futbolchilarni uchratish mumkin. Har holda futbol borasida Maldiv yuqori ligaga kirmaydi.
Malayziya xususida so'z borganida shuni aytish kerakki, bu yurtda ham futbol taraqqiy eta boshladi. Bilasiz, ayni paytda bu erda Sadriddin Abdullaev, Farhod Tojiev singari futbolchilarimiz to'p surmoqda. Dilshod Sharofutdinov esa ma'lum vaqtdan so'ng yurtimizga qaytdi. Malayziya terma jamoalari Osiyoda o'z o'rniga ega emasligini barcha yaxshi biladi. Shunga qaramay, bu mamlakatda ichki chempionatni kuchaytirish va uni rivojlantirishga katta ahamiyat berilmoqda. Ko'plab xorijliklar bu yurt futbolini tanlayotganligining asosiy sababi, moliyaviy jihatdan baquvvat jamoalarning soni ortganligi bilan bog'liq. Oyiga legionerlarga 10 ming dollarga qadar pul ajratishmoqda. Chindan ham mashhur firmalar klublar otalig'ini o'z bo'yniga olgan, hamda xorijlik o'yinchilarni taklif etish jarayonida qo'rqmasdan katta oylik va'da qilmoqda. Bu yo'lda ular Hindistonga tenglasha olmaydi. Yuqorida tanishimning so'zlarini o'qigandingiz. U Hindistonda ham bir mavsum to'p surib kelganligi bois, o'z fikrlarini bildirib o'tdi.
- 2008 yillarda Hindistondan taklif tushib, bu yurtga borib, bir mavsum o'ynagandim. Bilasizmi, men o'ynagan vaqtda chempionati hozirgidek kuchli emasdi. Keyinchalik jamoa­larni boy xo'jayinlar sotib olganidan so'ng ajoyib liga tashkil topdi. Barchaga ma'lumki, hozir Hindis­tonda dunyo futboli tan olgan faxriy o'yinchilar tashrif buyurishmoqda. Maqsad bitta: katta maosh olish. Men o'ynagan vaqtda Braziliya, angliyalik futbolchilar ham to'p surgan. O'shanda legionerlarga 4 ming dollargacha oylik berishardi. Bugungi kunda Hindistonda legionerlar oyiga 40 ming dollarga qadar maosh olyapti. Ko'rib turibsizki, ko'pchilik faqat pulni ko'zlab, shu yurtga ketmoqda. Hindistonda baribir kriket birinchi raqamli sport turi hisoblanadi. Futbol ular uchun shunchaki o'yin xolos. Balkim, shu boislan milliarderlar futbolga sarmoya kiritib, uning saviyasini ko'tarayotgandir.
Bu bejizga aytilmadi. Hozirda Indoneziya, Laos singari mamlakatlarda ham yurtimiz futbolchilari to'p surmoqda. Chunki bu mamlakatlar futboli taraqqiy etishi uchun katta pullar o'rtaga tashlanmoqda. Tailand, Xitoyda ham futbolchilar minglab dollarlab maosh olmoqda. Demak, chempionat shunga yarasha qiziqarli o'tadi. Arab mamlakatlari futboli haqida esa barchangiz yaxshi bilasiz. Pulga yarasha saviya ham bor. Xulosa esa bitta bugungi kunda ayrim futbolchilar o'sishdan ko'ra, pulni afzal bilib, xorijga chiqishmoqda.
— deya xabar beradi uff.uz nashri.