Transfer darchasi - futbol yilidagi qizg'in palla. Bozordagi har bir ishtirokchining o'z maqsadi bor: kimdir grand jamoadan joy olishga intiladi, boshqasi aksincha, top-klub chanagalidan tezroq qutulish payida. Shularni kuzatar ekansiz, hojatbaror transfer bozorining rang-barang qirralarini his etasiz. Marhamat, ularning ayrimlari bilan tanishib, xulosa chiqaring.
Uni boshqa jamoa libosida tasavvur qilolmayman
O'zining bor mahorati, navqiron damlarini bita jamoaga bag'ishlagan futbolchi shonli g'alabalar, nufuzli sovrinlarga sazovor bo'ldi. Tarixchilar unga jamoa afsonalari safidan joy hozirlash tadorigini ko'rishmoqda. Lekin kutilmaganda vaziyat keskin o'zgarib, futbolchi qadrdon klubini tark etishga majbur bo'ldi. Balki u o'zini jamoa etakchisi rolidan tashqarida tasavvur qilolmagani yoki mutasaddilar uning o'rniga navqiron iqtidor sohibini topishganmi, nima bo'lganda ham, u boshqa chempionatga yo'l oladi. Lekin uning faoliyati qaerda yakuniga etishidan qat'iy nazar, bu futbolchini biz avvalgi jamoasidan ayro holatda tasavvur qilolmaymiz.
Misollar:  Real dan  Shalke ga ketgan Raul,  Liverpul dan  Los-Anjeles Gelaksi ga yo'l olgan Stiven Jerrard,  Real dan  Portu ga o'tgan Iker Kasilyas,  Barselona dan  Al-Sadd ga qo'shilgan Xavi.
Voqeaning real hayot va san'atdagi ekvivalenti: San'atkorlarning akasariyati yagona yorqin rol orqali mashhurlikka erishadilar. Keyinchalik ular bir qator boshqa obrazlarni yaratishsa ham, muxlislar ularni avvalgi yorqin qahramonlar timsolida yodga oladilar.
Yaqin kunlarda yana kim ro'yxatni to'ldirishi mumkin: Jon Terri.  Chelsi ning doimiy sardori o'z mavqeini boy bermaslik uchun bor kuch-mahoratini ishga solmoqda. Lekin  ko'klar ning har bir omadsiz uchrashuvi tarkibdagi jiddiy o'zgarishlarni talab qilmoqda. Himoya markazi tez orada Keyxil-Zuma dueti ixtiyoriga o'tsa, ajabmas. Qolaversa, jamoa Jon Stounzga qiziqish bildirmoqda. Demak, Terrining MLS yoki Xitoy klubidan biriga yo'l olishi hech kimni ajablantirmaydi.
Zabt etilmagan cho'qqi
Futbolchi o'rtamiyona jamoalardagi ishonchli o'yinlari bilan tobora yuqoriga ko'tarilib boradi. Nihoyat, rad etib bo'lmaydigan taklifga asosan top-klubdan joy oladi. Biroq yangi jamoadagi bosim, kuchli raqobat va shunga o'xshash omillar unga o'z mahoratini namoyish etish imkoniyatini bermaydi va sho'rlik ortga qaytishga majbur bo'ladi.
Misollar:  Sautgempton dan  Liverpul ga o'tgan Riki Lambert,  Nyukasl dan  PSJ ga yo'l olgan Yoan Kabay,  Nyukasl dan  Chelsi  safiga qo'shilgan Demba Ba,  Aston Villa dan  Liverpul ga ketgan Styuart Dauning.
Voqeaning real hayot va san'atdagi ekvivalenti: O'tgan asrda Lourens Piter tomonidan yaratilgan  Piter printsipi  tizimiga asosan, har qanday kishi ertami-kech o'zining qobiliyatsizligini tan oladi. Misol deysizmi? Bir paytlar Comedy Club rezidentlari O'ZM (KVN)da risoladagidek start olib, Rossiya yumorida chinakam inqilobni amalga oshirishdi. Biroq keyinchalik o'zlarini Eddi Merfidan kam hisoblamagandek his etib, film yaratishga qaror qilishdi. Ana shu xato binoyidek faoliyatni barbod etdi.
Yaqin kunlarda yana kim ro'yxatni to'ldirishi mumkin: Kristian Benteke, Uilfrid Boni.
Davomi InterFUTBOL gazetasi blogida.
— deya xabar beradi uff.uz nashri.