Ispaniya terma jamoasi bosh murabbiyi Visente Del Boskening fikricha, Andres Inestani hisobdan chiqarishga hali erta ekan. U «Barselona» yarim himoyachisining Frantsiyada bo'lib o'tadigan Evropa chempionatida eng yaxshi formasida bo'lishiga umid qilmoqda. Shuningdek, ispaniyalik mutaxassis Goal.com saytiga bergan intervyusida Iker Kasilyasning asosiy darvozabonga aylanishiga ishonayotganli­gini bildirdi.
- Ispaniya termasining hozirgi tarkibi tanqidlarga uchradi. Sizningcha, bu borada qandaydir o'zgartirishlar kiritish lozimmi yoki futbolchilarning holatidan qoniqish hosil qilyapsizmi?
- Ayrim o'yinchilarni hisobdan erta chiqarib qo'yishadi. Braziliyadagi jahon chempionatidan so'ng ham shunday bo'ldi. Ko'pchilik u yoki bu futbolchini taklif qilishimiz lozimligi haqida gapirdi. Lekin ayrim yigitlarning qaysi paytda qanday o'yin namoyish etishlarini taxmin qilish qiyin. 2008 yili terma jamoani qabul qilib olganimda hozirgi tarkibdagilarning ko'pchiligi bor edi. David Silva, Sesk Fabregas, Andres Inesta, Santi Kasorla, Serxio Ramoslar shular jumlasidandir. Ammo ularni Braziliyaga olib borganimizni tanqid qilishdi. Ayni paytda Inesta faoliyatidagi eng yaxshi damlarini o'tkazmoqda. Umid qilamizki, u Frantsiyaga ham xuddi shunday holatda etib boradi. Biz bir-birimizni qo'llashimiz kerak.
- So'nggi paytlarda Xerard Pikeni ishqibozlar hushtakbozlik bilan qarshi olishlariga ko'nikib qoldik. Xo'sh, Ispaniya termasi bosh murabbiyi sifatida shogirdingizning bunday holatga tushib qolishiga qanday qaraysiz?
- Buni eshitish og'ir. Lekin biz o'rganib qoldik. Xerard xushtakbozlikka umuman e'tibor bermaydi. Bu esa, eng muhimi. Pike Ispaniya terma jamoasi uchun muhim futbolchi. Umid qilamanki, bundan buyog'iga ham u shu tarzda o'yin namoyish qiladi.
- Nolitoning «Barselona»ga o'tishi uning uchun terma jamoa eshiklarini ochib beradimi?
- Biz futbolchilarning hozirgi darajasiga qarab baho beramiz. Masalan, Nolitoning «Barselona»ga o'tish yoki o'tmasligi uning terma jamoaga jalb qilinishiga umuman ta'sir o'tkazmaydi. Muhimi, uning ayni paytda qanday o'yin namoyish qilayotgani. U o'ynayotgan klub esa hech qanday rol o'ynamaydi.
- Iker Kasilyas-chi? Ushbu darvozabon hozirgi holatda sizning jamoangizdan o'rin ola bilarmikan?
- Terma jamoadagi joy hech kim uchun kafolatlanmagan. Biz futbolchilarni 17 mayga qadar kuzatib boramiz. Shundan keyingina tarkibni e'lon qilamiz. Aynan o'shanda muxlislar Evroga kim borishidan xabar topishadi. Umid qilamanki, eng yaxshilarni tanlab olamiz. Tarkibda Kasilyas bo'ladimi? Shunga umid qilaman. Avvalo, uning ko'rsatayotgan o'yiniga baho beramiz. Darajasi, klubi va terma jamoasi uchun muhimligi va eng asosiysi, ko'rsatayotgan o'yini tufayli termadan joy oladi. Iker o'ynashdan to'xtamadi va hozirda yomon harakat qilmayapti. Yana shuni alohida ta'kidlamoqchiman. Kasilyas haqida mendan so'raganingiz uchun gapiryapman. Buni Ikerning boshqalardan ajrab turgani uchun aytmayapman.
- Hujum chizig'idan ko'nglingiz to'lyaptimi? Aytaylik, terma jamoaga nomzodlardan biri - Alvaro Morataning o'yinlari sizga ma'-qul kelyaptimi?
- U «Yuve»ning deyarli barcha uchrashuvlarida ishtirok etyapti. Ammo maydonda ko'p vaqt bo'lmayapti. Ya'ni, o'tgan mavsumdagidan ozroq o'ynamoqda. Bu unga ta'sir o'tkazishi mumkinmi? Albatta. Hozirda uzoq kelajakni o'ylamay, ko'z ostimizga olgan futbolchilarga e'tibor qaratishimiz lozim. Maqsadimiz - iyulda o'ynash.
- Darvoqe, bu yoqda Viktor Valdesning ham ishlari unchalik qovushmayapti...
- Valdes hozirda termaga qaytish emas, balki ko'proq o'ynash haqida o'ylashi kerak. Har qanday inson uning o'ynashini istaydi. Valdesning hozirgi holati esa, shunchaki omadsizligi tufayli vujudga kelgan.
Davomi InterFUTBOL gazetasi blogida.
— deya xabar beradi uff.uz nashri.