Bilasiz, kecha Toshkentning "Bunyodkor" klubi Osiyo Chempionlar ligasi guruh bosqichi uchun o'tkazilgan pley-off bahsida BAAning "Ash-Shabob" jamoasini 2:0 hisobida mag'lubiyatga uchratib, nufuzli musobaqaning guruh bosqich yo'llanmasini qo'lga kiritdi.
Uchrashuvdan so'ng "qaldirg'ochlar" hujumchisi Dostonbek Hamdamovning o'yin borasidagi fikrlari bilan qiziqdik.
"Uchrashuv biz uchun yaxshi kechdi. Muxlislarning o'yindan ko'ngli to'ldi deb, umid qilaman. Bundan keyin ham ishonchli o'yinlar bilan klub ishqibozlarini hamda o'zbek ahlini xursand qilishga harakat qilamiz. Ushbu g'alabadan so'ng to'xtab qolish niyatimiz yo'q. Bu yil yuqori natijalar qayd etib, ko'plab sovrinlarga ega chiqish niyatimiz bor.
Jamoaviy o'yin hamda g'alabaga bo'lgan ishonch tufayli muvaffaqiyatga erishdik, deb o'ylayman. Sariq kartochka olgan vaziyatga kelsak, biz tayyorlagan vazifa bo'yicha ish ko'rilmadi va men biroz ikkilanib qoldim. Natijada vaqt cho'zildi va kerak bo'lmagan sariq kartochkani ishlab oldim. Guruh bahslarida bunday xatolarga yo'l qo'ymaslikka harakat qilamiz", - deydi Osiyoning eng yaxshi yosh futbolchisi UFF.uz muxbiriga.
— deya xabar beradi uff.uz nashri.