Toshkentning “Bunyodkor” jamoasi “pley-off” uchrashuvida Dubayning “Al-Shabab” klubidan ustun kelib, OChL-2016 guruh bosqichiga yo'llanma oldi. “Bunyodkor” – “Al-Shabab” uchrashuvi arafasida turli xil ommaviy axborot vositalari orqali jamoamizga dalda va ko'mak berganlar bo'ldi. Xususan, “Bunyodkor”ga omad tilaganlar qatorida “Neftchi”, “Buxoro”, “Qo'qon-1912”, “Oq-tepa” va boshqalar, shuningdek yurtimizning deyarli barcha viloyatlarida istiqomat qiluvchi futbol muxlislarining olg'a chorlovchi tilaklariga ko'zimiz tushdi. “Bunyodkor” futbol klubi “Bunyodkor” – “Al-Shabab” uchrashuvi oldidan va o'yin paytida jamoamiz uchun qayg'urgan, futbolchilarimizni qo'llab-quvvatlagan barcha-barchaga minnatdorchilik bildiradi. “Bunyodkor”ning g'alabasi –klubning o'z tarbiyalanuvchilariga tayanish siyosati to'g'ri yo'lga qo'yilganligidan dalolat berib turibdi. Jamoamiz bundan keyin ham bor kuch va mahoratini ishga solib, muxlislarga chiroyli, mazmunli va hujumkor futbol namoyish etishga harakat qiladi.
— deya xabar beradi uff.uz nashri.