Barchaga ma'lum tushunchaga ko'ra, 11 metrli jarima zarbasi 99 foiz goldemakdir. Ammo uni tepish huquqiga ega bo'lish uchun ham mehnat qilish talab etiladiki, buni ko'pchilik hisobga olmaydi. Harqalay, Evropadagi top-chempionatlarga qarasangiz, kuchli klublarning ko'proq penalti tepishayotganini ko'rasiz.
Xullas, jamoalar salohiyatini penaltilar statistikasi orqali ham baholash mumkin. Odatda 3 ochko  taqdirini yagona gol hal qilsa va u «nuqta»dan urilgan bo'lsa, ko'pchilik darhol o'zicha «tashxis» qo'yadi: «Zerikarli o'yin, tomoshabop emas, darvozalarsiz...». Biroq penalti tepish uchun ham ter to'kish lozim ekanligi negadir unutiladi. Angliya, Germaniya, Italiya va Ispaniya elit divizionlarida qayd etilgan penaltilar statistikasiga nazar tashlab, tushunib olish qiyin emas: 11 metrli zarba tepish huquqi shunchaki, omad kelganini anglatmaydi, balki maydondagi jamoalardan birining ustunligi nishonasidir.
Angliya - Premer-liga
Tendentsiya. APLda aynan «Lester»ning eng ko'p penalti ishlaganida hech qanday hayratlanarli tomoni yo'q. «Tulkilar» ijrosidagi o'yin uslubi hujumkorlikka qaratilgan. Bunda ular asosan o'z etakchilari - Riyod Mahrez va Jeymi Vardining tezlik hamda texnik qobiliyatlariga tayanishadi. Aynan shu ikki yigit raqiblarni jarima maydoni ichida qoidaga xilof ravishda harakatlanishga majbur etadi. Xususan, Mahrezga qoyil qolish kerak - u beqiyos texnikasi va  maydonga qulash san'ati hisobiga tez-tez penalti tepish huquqiga ega bo'lyapti. Vardi esa tezligi va yaxshi «ochilishi» evaziga hakamning «nuqta»ga ishora qilishini ta'minlaydi. 9ta penalti - jamoaviy imidj uchun yomon emas. Deylik, joriy mavsum milliy chempionatlarda birgina «Barselona» bundan ko'proq penalti ishladi.
APLda penaltidan gol urish bo'yicha oldinda borayotgan boshqa klublarga kelsak, «Suonsi» futbolchilari ham, «Stok Siti», «Kristall Pelas» va «Uotford» vakillari ham 2-3ta uzatmaga asoslangan tezkor qarshi hujumlardan so'ng darvoza tomon deyarli zarba yo'llamaydilar. Zero, ular uchun asosiy vazifa - vaziyatni «pishitish», to'p bilan raqib jarima maydoniga kirish va u erda keskin holatni yuza keltirish. To'g'ri, 5ta penaltidan 5ta gol urgan «Suonsi» ushbu toifaga uncha to'g'ri kelmaydi. Harqalay, «oqqushlar» jarima maydoni tashqarisidan ham ko'p zarba yo'llashadi.
Darvoqe, muayyan jamoa darvozasi tomon belgilangan penaltilar statistikasi ham aniq tushunchalarni beradi. Deylik, Angliyada 11 metrlik zarbadan eng ko'p jabr ko'rgan klub - bu «Sanderlend» (6 marta). Shundan ham jamoa himoyachilari saviya bobida nisbatan pastda ekanliklari va ular haddan tashqari ko'p oddiy xatolarga yo'l qo'yishlarini anglash mumkin. Hattoki, «qora mushuklar»ning yangi futbolchilari (misol uchun, Yan Kirxgoff) ham ushbu «virus»ga qarshi turishni eplay olmayapti.
Eng sovuqqon penaltichi - Troy Dini («Uotford»): 4ta zarba, 4ta gol.Boxing Daygacha ushbu yo'nalishda Riyod Mahrez peshqadam edi, ammo u qisqa vaqt oralig'ida «nuqta»dan zarba yo'llashda ketma-ket 2 marta adashdi. Natijada APLdagi eng sovuqqon penaltichi maqomi mavsumning boshqa bir kashfiyoti - Troy Diniga o'tib ketdi. U 11 metrlik nuqta oldiga yaqinlashgach, keyingi harakatlarini aslo bilib bo'lmaydi. Aslida Dinining to'pga yugurishiga qarab, qanday zarba yo'llashini taxmin qilish mumkindek. Ammo «Uotford» sardori har safar mantiqqa zid variantlarni tanlaydi. Ya'ni uzoq masofadan tezlikda yugurib kelib, texnik tomondan mukammal va nafis zarbani ijro etadi. Bordiyu, yugurish uchun qisqa masofa olsa, unda to'pni kuchli zarba bilan darvozaning yuqori «to'qqizligi»ga yo'naltiradi.
Penaltining eng yaxshi mutaxassisi - Eurelio Gomes («Uotford»): 4ta zarba, 1ta «seyv», 1ta xato. Ochig'ini aytganda, Gomesning APLda penalti to'sish bo'yicha eng yaxshi golkiper bo'lib turganini tasodifga yo'yish mumkin. To'g'ri, u doimo ajoyib «seyv»lari bilan ajralib turgan, ko'p hollarda o'z jamoasi joniga oro bergan. Ammo hech qachon 11 metrli zarbalarni qaytarish bobida mohir mutaxassis sifatida gavdalangan emas. Lekin joriy mavsum Gomes «Bornmut» vakili Glenn Myurrey bilan «duel»da ustun keldi. Qolaversa, «nafaqaxo'r» Oskar «Stemford Brij» maydoni tufayli («Chelsi» futbolchisi sirg'anib ketdi) Eurelio darvozasini ishg'ol qilolmadi. Qisqasi, Gomesning penalti bo'yicha ayyorona strategiyasi yo'q - u to'pga shunchaki, tavakkaliga tashlanadi.
Davomi InterFUTBOL gazetasi blogida.
— deya xabar beradi uff.uz nashri.