Poytaxtimizda start olgan futzal bo'yicha Osiyo chempionati oldidan terma jamoalar bosh murabbiylari ishtirokida matbuot anjumani o'tkazildi. «Interneyshnl» (sobiq «Interkontinental») mehmonxonasining Crystal Ballroom zalida o'tgan marosimda terma jamoa bosh murabbiylari Osiyo chempionatiga olib borilgan tayyorgarlik, tarkib, imkoniyatlar haqidagi fikrlari bilan o'rtoqlashishdi. Biz uchun muhimi «A» va «V» guruhidan joy olgan terma jamoa ustozlarining fikrlaridir. «A» guruhida termamiz o'z o'yinlarini o'tkazsa, «V» kvartetidagi jamoalardan biri bilan chorak finalda to'qnash kelishimiz ehtimoli baland. «Pley-off»dagi bu uchrashuvda esa bevosita JCh-2016 yo'llanmasi o'ynaladi. Dastlab, «V» guruhi jamoalarining murabbiylari jurnalistlarni qiziqtirgan savollarga javob qaytarishdi.
Muhammad Nozim (Eron): - Shubhasiz, bu galgi Osiyo chempionati keskinlik va shiddat bobida avvalgilaridan farq qiladi. Osiyoda eng ko'p chempion bo'lgan jamoa sifatida Toshkentdagi qit'a chempionatida ham yuqori saviyada futzal namoyish etib beramiz. Rejalarimizni bosqichma-bosqich amalga oshirishni maqsad qilganmiz. Birinchi galda guruhdan chiqish vazifasini bajarishimiz kerak. Bizda musobaqada ishtirok etish bo'yicha yaxshi tajriba bor. Eron o'z tarixida 10 marta chempion bo'lgan. O'zbekistonga 11-chempionlik unvonini qo'lga kiritish uchun keldik.
Salah Abu Ja'far (Iordaniya):  - Iordaniya ilk bor Osiyo chempionati final bosqichida ishtirok etadi. Debyutimizni O'zbekistondagi musobaqada o'tkazishdan xursandmiz. Bu ham Iordaniya terma jamoasi uchun, ham mamlakat futbol Federatsiyasi uchun katta yutuq hisoblanadi. Biz Osiyo chempionatiga yaxshi tayyorgarlik ko'rdik. O'quv-mashg'ulot yig'inlari va o'rtoqlik uchrashuvlarini etarli darajada o'tkazdik. Guruh bosqichidan chiqishga urinib ko'ramiz.
Haitham Abbos (Iroq): - Asosiy maqsadimiz - guruhdan chiqish. Beshta jamoa JChga borishini bilamiz. Har bir raqibga hurmat ko'zi bilan qaraymiz. O'z o'yinimizni ko'rsatib, maqsadimizga etishga harakat qilamiz.
Shan Zxiping (Xitoy): - Osiyo chempionatida qatnashishimizdan xursandman. Xitoy terma jamoasi Osiyo chempionatiga tayyorgarlikni 18 yanvardan boshlagandi. Garchi bu kam muddat bo'lsada, Toshkentdagi qit'a chempionati final bosqichiga munosib tayyorgarlik ko'rdik, deb o'ylayman. Musobaqada ishtirok etishdan bosh maqsad - eng avvalo, guruhdan chiqish va JCh yo'llanmasini qo'lga kiritish.
- Ertangi o'yin oldidan qanday fikrdasizlar?
Sh.Zxiping: - Uchrashuvda g'alaba qozonishdan umidvormiz. Biz hozir faqat muvaffaqiyat haqida o'ylayapmiz.
Haitham Abbos: - Xitoy kuchli jamoa. Tarkibida tezkor futzalchilar bor. Bor imkoniyatimizni ishga solib, g'alaba qozonishga harakat qilamiz.
S.Ja'far: - Iordaniya Osiyoda o'z reytingiga ega bo'lmagan jamoa hisoblanadi. Eron esa Qit'amizning birinchi raqamli jamoasi. Futzalning go'zalligi shundaki, ertaga eng kuchsiz jamoalardan biri eng kuchli jamoaga qarshi yaxshi o'yin ko'rsatishga urinadi.
Muhammad Nozim: - Har bir musobaqada ilk o'yin doim qiyin kechadi. Biz buni yaxshi tushunib turibmiz. Iordaniyaga qarshi uchrashuvga bor kuchimizni yig'ib tushamiz. Undan keyin navbatdagi bahslar haqida o'ylaymiz.
Shundan so'ng «A» guruhi jamoalari bosh murabbiylari savollarga javob qaytarishdi.
Andrey Polxovskiy (Qirg'iziston): - Biz Osiyo chempionatiga jiddiy hozirlik ko'rdik. Toshkentga kelgunimizga qadar Rossiyaning «Dina» va «Norilskiy Nikel» klublariga qarshi ikkita o'rtoqlik uchrashuvi o'tkazdik. Endi tayyorgarligimiz qanday bo'lganligini Osiyo chempionati ko'rsatib beradi.
Fransisko Arauxo (Livan): - Osiyo chempionatiga reja asosida tayyorgarlik ko'rdik. Livandan tashqari, Vengriyada o'quv-mashg'ulot yig'ini va uning doirasida o'rtoqlik uchrashuvlarini o'tkazdik. Shubhasiz, qit'a chempionatiga eng kuchli terma jamoalar kelgan va ularning har biri o'z oldiga JChga beriladigan yo'llanmalardan birini qo'lga kiritish vazifasi qo'ygan. Shu boisdan, barcha o'yinlar keskin kurashlar ostida kechishini taxmin qilish qiyin emas. Bizning maqsadimiz ham 5ta yo'llanmadan birini qo'lga kiritish hisoblanadi.
Xose Mariya Mendez (O'zbekiston): - Osiyo chempionatiga tayyorgarlik ko'ngildagidek o'tdi. Evropa va Osiyoning ko'zga ko'ringan jamoalariga qarshi o'rtoqlik uchrashuvlari o'tkazdik. Fikrimcha, biz eng qiyin ikkita guruhning biridan joy olganmiz. O'zbekiston terma jamoasi shu paytgacha hali biror marta ham JCh final bosqichiga chiqmagan. O'ylaymanki, Toshkentda o'tadigan Osiyo chempionatida bu noxush an'anaga chek qo'yamiz.
Abdulloh al Rashud (Saudiya Arabistoni): - Toshkentga terma jamoamizning eng kuchli jihatlarini ko'rsatish uchun keldik. Musobaqaga juda yaxshi tayyorgarlik ko'rdik. Qit'a chempionatiga qadar kuchli terma jamoalar bilan o'rtoqlik uchrashuvlari o'tkazdik. O'ylaymanki, debyutant bo'lishimizga qaramay, Osiyo chempionatida munosib tarzda ishtirok etamiz.
Davomi InterFUTBOL gazetasi blogida.
— deya xabar beradi uff.uz nashri.