“Lokomotiv” Dubaydagi ikkinchi o'rtoqlik o'yinida ham yirik hisobda zafar quchdi. Bu safar Xitoy Superligasi vakili “Xanjou Grintaun” klubi darvozasi javobsiz uch bor ishg'ol etildi. Rasmiy o'yinlar yaqinlashib kelayotgani uchun ham Abdulloh Al-Balushi boshqarib borgan bellashuv oldidan tomonlar faqatgina 3 tadan o'zgarishni amalga oshirishga kelishib olishdi. Quyida “Lokomotiv”ning boshlang'ich tarkib futbolchilari bilan tanishib olishingiz mumkin. Andrey Miklyaev hamda Mirko Elichich o'zaro kelishgan holda 3 ta nominal himoyachi bilan o'ynashga qaror qilishdi. Markazda Yanichich harakat qilgan bo'lsa, uning ikki chetida To'xtaxo'jaev hamda Zoteev to'p surishdi. Tayanch yarim himoyadan tajribali Kapadze hamda Maxaradze joy olishdi. Oldingi chiziqda to'p surgan Temurxo'ja Abduholiqovga hujum tashkil etishda 3 ta futbolchi ko'maklashdi – Server Jeparov, Sanjar Shoahmedov hamda Sardor Mirzaev. Bunda keyingi ikki futbolchi Jeparovning ikki chetida o'yin olib borishdi. Tayanch zona va hujumkor yarim himoyachilarni bog'lovchi sifatida Ikrom Aliboev harakat qildi. “Temiryo'lchilar” bellashuvni ko'tarinki ruhda boshlab, Abduholiqovning 10-daqiqada kiritgan golidan keyin hisobda oldinga chiqib olishdi. Hujumni Timur Kapadze boshlagan bo'lsa, golli pas Sanjar Shoahmedov tomonidan uzatildi. 18-daqiqaga kelib Server Jeparov o'zining shedevr paslaridan birini amalga oshirdi hamda Shoahmedovni darvozabon bilan yakkama-yakka vaziyatga chiqardi. O'z navbatida Sanjar xitoylik posbonni aldab o'tib, hisobdagi farqni 2 taga oshirdi – 2:0. Ikkinchi bo'limda ham o'yinning borishini “Lokomotiv” futbolchilari nazorat qilishdi. Bu taymda darvozaga faqatgina bitta gol urildi. Burchakdan to'p Jeparovga tashlab berildi, Server esa uni qulay tarzda gol muallifiga etkazdi. “Lokomotiv” Dubaydagi ikkinchi yig'in doirasidagi birinchi o'rtoqlik uchrashuvini mahalliy “Al-Urooba” klubiga qarshi o'tkazib, 5:1 hisobida muvaffaqiyat qozongandi. Navbatdagi bellashuv 12 fevral kuni Xitoyning “Tyantszin Teda” klubiga qarshi bo'lib o'tadi. LOKOMOTIV (O'zbekiston) – XANJOU GRINTAUN (Xitoy) 3:0
Gollar: Timurxo'ja Abduholiqov, 10 (1:0). Sanjar Shoahmedov, 18 (2:0). Sardor Mirzaev, 75 (3:0).
“Lokomotiv”: Ignatiy Nesterov (Sarvar Karimov, 75) — Oleg Zoteev, Nemanya Yanichich, Islom To'xtaxo'jaev (Sherzod Fayziev, 70) — Kaxi Maxaradze, Timur Kapadze (Jasur Hasanov_77, 60) — Ikrom Aliboev — Server Jeparov, Sanjar Shoahmedov, Sardor Mirzaev — Temurxo'ja Abduholiqov.
“Xanjou Grintaun”: Guo Chun Tsuan — Tsao Xay Chin (Dzou De Xan, 46), Vu Fan Si, Chen Siyao, Ge Jen — Xuan Si Yan, Zang Yi Fen, Lo Dzing, Chen Dzin (Gao Xua Dze, 56) — Chen Bo Liyan (Vu Vey, 63), Devi Kloud Angan.
Hakam: Abdulla Al-Balushi.
— deya xabar beradi uff.uz nashri.