Poytaxtimizda o'tkazilayotgan XIV Osiyo chempionatida kecha “C” va “D” guruhlaridan o'rin egallagan terma jamoalar ham dastlabki tur o'yinlarini o'tkazdilar.
“S” guruhida sovrinli o'rinlar uchun asosiy da'vogarlardan biri hisoblangan Tailand terma jamoasi tojikistonlik futzalchilar ustidan 5:4 hisobida zafar quchgan bo'lsa, xuddi shunday hisobda V'etnam terma jamoasi Xitoy Taypeyi termasidan ustun keldi.
“D” guruhida bo'lib o'tgan o'yinlarda darvozalarga bor yo'g'i to'rt to'p kiritildi. Yaponiya – Qatar 1:0, Avstraliya – Malayziya 2:1.
Bugun “A” va “V” guruhlarida ikkinchi tur o'yinlari o'tkaziladi. “A” guruhida peshqadamlik qilayotgan O'zbekiston terma jamoasi Qirg'iziston termasiga qarshi maydonga tushsa (19:00da), ushbu guruhdan o'rin olgan ikkinchi o'yinda Saudiya Arabistoni – Livan terma jamoalari o'zaro bahs yuritadilar (16:30da).
“V” guruhida dastlab Xitoy va Eron terma jamoalari kuch sinashsalar (16:30da), ikkinchi uchrashuvda Iordaniya hamda Iroq terma jamoalari bahs olib boradilar (19:00da).
Ma'lumot uchun. O'zbekiston terma jamoasi guruhdagi so'nggi tur uchrashuvini 14 fevral kuni Livan terma jamoasiga qarshi o'tkazadi. 2014 yili V'etnam davlatida o'tkazilgan Osiyo chempionatida O'zbekiston va Livan terma jamoalari chorak finalda to'qnash kelishgan edi va unda mamlakatimiz futzalchilari 6:2 hisobida zafar quchishgan. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.