“Burgutlar”ning poytaxtdagi yig'ini davom etmoqda. Jamoa a'zolari bungacha “Admiral” mehmonxonasida istiqomat qilib kelayotgandi. Bugun tushlikdan so'ng klubning vaqtinchalik qarorgohi o'zgardi. Ayni damda “Andijon” FK a'zolari “Oq-tepa” klubi qarorgohida istiqomat qilmoqda. Barcha sharoitlarga ega bo'lgan ushbu baza jamoa uchun har tomonlama qulay bo'lishi turgan gap.
Bugun jamoa safida e'tiborga molik o'zgarishlar yuz berdi. Bir necha yillardan buyon “Andijon” sharafin himoya qilib kelayotgan Asror Rahmonov bilan xayrlashildi. Tarkibga esa avval xabar berganimizdek, R. Hasanov kelib qo'shildi. So'nggi ikki yilni “Navbahor”da o'tkazgan markaziy yarim himoyachi joriy mavsumni “Andijon”da o'tkazishi aniq bo'ldi. Bundan tashqari yaqinda “Olmaliq” bilan xayrlashgan Azamat Isroilov ham jamoa mashg'ulotlariga qo'shildi. Mavsumlar oralig'ida ma'lum muddat “Buxoro” yig'inida bo'lgan taniqli himoyachi Sahob Jo'raev ham bugundan jamoa safiga qo'shildi. Hozircha ushbu futbolchilarning jamoa safida qolishi ma'lum emas. Agarda har ikki tomon o'zaro kelishuvga erishsa, katta extimol bilan Isroilov va Jo'raev ham bu yil “Andijon”da o'ynaydi.
Darvoqe, ertaga jamoa ikkita nazorat uchrashuvida maydonga tushadi. Rejaga ko'ra soat 11:00da “Bunyodkor” akademiyasiga qarashli mashg'ulot maydonida “Buxoro” bilan kuch sinashiladi. Tushlikdan so'ng esa ya'ni, soat 14:30da “Oq-tepa”ga qarshi ham nazorat uchrashuvi o'tkaziladi. Bundan ko'zlangan maqsad murabbiylar ayni damda yig'inda bo'lib turgan har bir futbolchiga ko'proq o'ynash imkoniyatini berib, ularni yana bir bor ko'zdan kechirishdir.
— deya xabar beradi uff.uz nashri.