Italiya futbolida azaldan «Milan derbisi» muhim o'rin tutadi. Bu o'yin vaqti «Inter» va «Milan»ning turnir jadvalidagi holatiyu, qanday sport formasida ekanligi mutlaqo unutiladi. Xullas, «rossonerlar» va «neradzurralar» har qanday vaziyatda bir-birlariga chinakam kurash taqdim etishadi.
31 yanvar kuni bo'lib o'tgan oxirgi derbida «Milan»ning qo'li baland keldi - 3:0. O'yindan oldin «rossonerlar» hujumchisi Karlos Bakka oxirgi vaqtlarda maydondagi roli ancha o'zgarganini aytib, yana qo'shimcha qilgandi: «Yakshanba kuni qizchamning tug'ilgan sanasi. Shunday ekan, unga sovg'a tayyorlashim kerak. Qanday gol urishim muhim emas. Shunchaki, raqib darvozasini nishonga olsam va ja-moam g'alaba qozonsa, bas». Qarangki, u o'z so'zi ustidan chiqib, «Milan»ning ikkinchi goliga mualliflik qildi va yirik hisobli g'alabaga munosib ulush qo'shdi.
- Siz bungacha Belgiya va Ispaniya chempionatidagi derbi o'yinlarida ham gol urgansiz. Italyancha derbi xususida nima deya olasiz?
- Ko'pchilik hozir «Inter»ning ishlari uncha yurishmayotganini ta'kidlamoqda. Ehtimol shundaydir, ammo derbida hammasi unutiladi. Ya'ni jamoalarning uchrashuvdan oldingi holatlariga qarab, xulosa chiqarish aslo to'g'ri emas. Bunday bahslarda 3 ochko olish uchun bor kuch bilan o'ynash va faqat g'alabani ko'zlash kerak. Yana mas'uliyatni to'la anglab, ishtiyoqni maksimal darajada namoyish qilish talab etiladi.
- Xo'sh, qaysi derbi «qaynoq»roq - Sevilyanikimi yoki Milanniki?
- Sevilyada derbiga e'tibor aql bovar qilmas darajada baland. Bu haqdagi muhokamalar o'yinga bir oy qolganidayoq boshlanadi. Restoranga kirsang yoki ko'chada sayr qilib yursang, albatta, kimdir oldingdan chiqadi va derbida g'alaba qozonish shartini qo'yadi. U erda boshqa har qanday uchrashuvda yutqazish mumkin, ammo faqat derbida emas. Boshing baloga qolishini istamasang, bir ilojini topib, o'yinni o'z jamoang foydasiga hal etishing shart.
- Ayni payt «A» seriyasidagi faoliyatingizdan qoniqish hosil qilyapsizmi?
- Ha. Ligada eng muhimi - taktika. Xayriyatki, bunga moslashib oldim. Har safar maydonga tushayotganimda, o'z salohiyatimga ishonchim ortayotganini sezaman. Mana, bir nechta gol urishga erishdim va shu bilan to'xtab qolish niyatim yo'q. Maqsadim - raqib darvozasiga ko'proq to'p kiritib, «Milan»ning imkon qadar yuqoriga ko'tarilishiga hissa qo'shish. Xullas, bor mahoratimni ishga solishni, «Milan»ga sidqi-dildan xizmat qilishni xohlayman.
- Bir qarashda, mavsum startiga nisbatan olganda, ancha o'zgardingiz...
- Ha, shubhasiz, shunday. Ayniqsa, o'yinning taktik jihatlari ustida qattiq ishladim. Harqalay, Ispaniyada mashg'ulotlar boshqacha o'tardi.
- Sinisha Mixaylovich o'yinlardan oldin sizni asosan qanday so'zlar yordamida kurashga shaylantiradi?
- Aslida murabbiyning o'yinlar arafasida nimadir deyishiga hojat yo'q, ayniqsa, derbilardan oldin. Shunchaki, har bir futbolchi e'tiborini jamlasa, bas. Xususan, menda ishtiyoq masalasida hech qanday muammo yo'q.
- Kumirlaringizdan biri - Ronaldo «Milan derbisi»da har ikki klub uchun gol urgan...
- Buni bilaman. Yoshligimda Kolumbiyada «A» seriyasi o'yinlarini kuzatardim. O'sha vaqt Faustino Asprilya va Ivan Kordoba kabi hamyurtlarim Italiyada o'ynashardi. Tabiiyki, Ronaldoning o'yinlarini ham qunt bilan kuzatib, undan ko'p narsalarni o'rganganman. Umuman, «Milan»da doimo saviyali hujumchilar to'p surishgan. Umid qilamanki, men ham jamoa futbolkasini kiyib yurishga munosib ekanligimni to'la-to'kis isbotlay olaman.
- Kim bilan o'ynashingiz qulayroq - M~Baye Nyang yoki Luis Adriano?
- Ikkisi uslub bo'yicha bir-biridan keskin farqlanadi. Adriano asosan texnikaga urg'u qaratadi va biz o'zaro yaxshi tushunib to'p suramiz. Nyang esa ancha harakatchan yigit, o'ng tomonda ham, chapda ham birdek o'ynay oladi. Shunday hujumchining jamoamizda qolganidan bag'oyat xursandman.
- Gonsalo Iguain - «A» seriyasi to'purarlar poygasining yaqqol peshqadami. Sizningcha, u chempionatning eng yaxshi hujumchisimi?
- Albatta, Gonsalo ajoyib futbolchi, shuningdek, ajoyib klubda o'ynayapti. Harqalay, «Napoli» futbolchilarining ko'p yillardan buyon birga to'p surishayotgani ham Iguainga qo'l kelyapti.
Davomi InterFUTBOL gazetasi blogida.
— deya xabar beradi uff.uz nashri.