Ayrimlarda osongina boylik orttirish istagi shu qadar kuchli bo'ladiki, ular qaysidir bechoraning uyiga o'g'irlikka tusha turib, bu odam o'z vatani sha'ni uchun nimalar qilganini hatto eslab ham o'tirishmaydi.
Jumladan, bir qator futbolchilar ham o'z mehnatlari orqali dovruq taratib, yurtlari uchun jonlarini jabborga berib pul topishadida, bir kechada bor-yo'qlaridan ayrilib qolishadi. Bu borada ayniqsa, Angliya terma jamoasining a'zolari juda  ilg'or . Quyidagi maqola orqali bunga o'zingiz ham amin bo'lasiz.
Piter Krauch
Angliya premer-ligasida to'p surayotgan futbolchilar shu qadar yirik maosh olishadiki, ular tez-tez bosqinchilik tufayli jabr ko'rib turishlari ba'zida tabiiydek tuyuladi. Ana shunday  bechora lardan biri,  Stok Siti  hujumchisi Piter Krauch 2011 yili talonchilar bilan to'qnash kelgan. Aniqrog'i, u ajoyib kunlarning birida sevgilisi Ebbi Klensi bilan uzoq sayr qilib, uyga qaytadi. Uchrashuvdan to'lqinlanib qaytgan baxtiyor juftlik ne ko'z bilan ko'rishsinki, ular yo'q vaqtda o'g'rilar uyni ag'dar-to'ntar qilib,  supurib  ketishibdi. Voqea joyiga etib kelgan politsiya naqd pullar qatori, futbolchi va uning rafiqasiga tegishli barcha mayda-chuydalar, shu jumladan, hatto nikoh uchun olib qo'yilgan uzuklar ham yo'qolganini qayd etishdi, xolos. Muhimi, narxi 4,5 mln. funt turadigan koshonaga hech qanday zarar etmagandi.
Eshli Koul
Chelsi  klubi va Angliya termasining sobiq himoyachisi uchun 2010 yil juda og'ir keldi. Avvaliga u rafiqasi Sherilga bog'liq mashmashalar tufayli tushkunlikka tushdi. Aksiga olib, ayni shu vaqtda uning uyiga talonchilar ham bostirib kirishadi. Koul bu vaqtda Surrey grafligidagi 3,5 mln. funtlik uyda yashardi va eng qizig'i, o'g'rilar uyga kirishgan paytda (ertalab) Eshli yotoqxonasida bo'lgan. Shovqindan uyg'onib ketgan futbolchi o'rnidan qo'zg'almay, politsiyaga qo'ng'iroq qiladi. Biroq politsiyachilar yordamga etib kelishganda, talonchilar allaqachon oladiganlarini olib, juftakni rostlab bo'lishgandi. Bu voqeadan biroz vaqt o'tib, Eshli yangi xonadonga ko'chib o'tadi, ammo bu erda ham uni tunab ketishadi.
Karlos Salsido
Juda esda qolarli o'tgan JCh-2010dan so'ng Meksika terma jamoasi himoyachisi Karlos Salsido Gollandiyaning  PSV  klubidan Angliyaning  Fulxem  jamoasiga ko'chib o'tadi. Biroq achinarlisi shundaki, Karlos Londonda o'zini sira xotirjam his qila olmaydi. Aniqrog'i, futbolchining uyi darhol mahalliy talonchilarning  nishoni ga aylanadi. Mazkur xonadonda bosqinchilik yuz berganidan so'ng esa Salsido va uning oilasi darrov chamadonlarni yig'ishga kirishishadi. Boshqacha aytsak, uyida yuz bergan ilk o'g'irlikdan keyinoq  nozik ta'bli  futbolchining APLdan ko'ngli qolib, vataniga qaytib ketadi.
Emil Xeski
Xeski - o'zi istamagan holatda gazetalarning kriminal xabarlar sahifasidan joy olgan Angliya termasi a'zolaridan biri. Qizig'i shundaki, u ham aynan Krauchga ziyon etkazgan jinoiy guruhdan jabr ko'rgan. Bu voqea 2008 yili yuz bergan bo'lib, Emil o'sha vaqtlari  Uigan  sharafini himoya qilardi. U klub mashg'ulotlariga ketgan vaqtda o'g'rilar Emilning 1,65 mln. funt turadigan uyiga osongina kirib, bemalol talonchilik qilishadi. Vaholanki, bu paytda soat endigina ertalabki 10:45 bo'lgandi. Xullas, o'g'rilar futbolchining qo'lga ilinadigan barcha buyumlarini o'marib ketishadi.
Anxel Di Mariya
Argentinalik hujumkor yarim himoyachi 2014 yili  Manchester Yunayted ga ko'chib o'tganida mahalliy muxlislar rosa xursand bo'lishgandi. Zero, 60 mln. funtga xarid qilingan o'yinchi maydonda o'zini ko'rsatmasa ham bo'lmasdi-da! Ammo Di Mariyaning maydondagi va uning tashqarisidagi orzulari butunlay yakson bo'ldi. Aniqrog'i, Anxel hali jamoaga to'liq moslashib ulgurmay, uning uyiga noma'lum kimsalar bostirib kirmoqchi bo'lishadi. Holbuki, futbolchi va uning oilasi bu paytda koshonalarida miriqib dam olishayotgandi. Agar signalizatsiya tizimi bosqinchilarni to'xtatib qolmaganida... Mazkur ko'ngilsiz hodisadan so'ng  MYu ning yangi a'zosi Cheshir grafligidagi shinam uyini sotuvga qo'yadi. Oradan ko'p o'tmay, o'zi ham  PSJ ga ko'chib o'tadi.
Ian Rayt
Londonning  Arsenal  klubidagi o'yinlari orqali dong taratgan shunday afsonaviy futbolchi ham talonchilardan ziyon ko'rgan ekan. To'g'ri, bu paytda Ian katta futbol bilan xayrlashgan edi, ammo uning daromadi chakki emasdi -  ITV telekanalida sharhlovchilik qilardi. Xullas, 2014 yilgi JCh vaqtida Raytning Brazi liyada ekani va o'yinlarni berilib sharhlayotganidan foydalangan talonchilar afsonaning Londondagi uyiga bostirib kirishadi hamda uning rafiqasiga pichoq bilan tahdid qilishadi. Aniqrog'i, yovuzlar bechora ayolga agar uydagi bor pullarni olib bermasa, uning barmog'ini kesishlarini aytib, qo'rqitishadi. Xayriyatki, bu mudhish voqea oqibatida hech kim jiddiy zararlanmaydi. Rayt esa mundialdan kechib, zudlik bilan Braziliyani tark etadi va uyiga qaytadi.
Darren Fletcher
 Manchester Yunayted  klubi hamda Shotlandiya termasining sobiq yarim himoya chisi 2009 yili  qizil iblislar  safida EChL o'yinida ishtirok etish uchun Milanga jo'nab ketadi. Bundan xabar topgan uch nafar bosqinchi Fletcherning uyiga kirib borib, futbolchining turmush o'rtog'i Xelen Graysga pichoq o'qtalishadi. Kamiga uning sochlaridan tortib, polda sudrashadi. Bundan ko'zlangan maqsad esa bitta edi - oilaga tegishli pullar qaerda ekanini aniqlash. Shu tariqa, talonchilar boyliklar qaerda ekanini bilib olib, uyni ship-shiydon qilib ketishadi.
Davomi InterFUTBOL gazetasi blogida.
— deya xabar beradi uff.uz nashri.