Bugun, 14 fevral kuni O'zbekiston milliy terma jamoasi Birlashgan Arab Amirliklarida Livanga qarshi o'rtoqlik uchrashuvi o'tkazadi. Ushbu jamoalar shu vaqtga qadar o'zaro 4 bora to'qnash kelgan. O'zbekiston terma jamoasi Livanga qarshi o'yinlarda mag'lubiyatga uchramagan. Uch o'yinda g'alaba qozongan bo'lsa, bir o'yinda durang natija qayd etilgan. O'zaro o'yinlardagi to'plar nisbati O'zbekiston foydasiga — 6-1. Qisqa muddatli ushbu yig'inga O'zbekiston professional futbol ligasi jamoalari futbolchilari jalb etilgan. Avvalroq, Livanga qarshi o'rtoqlik uchrashuvi uchun O'zbekiston milliy terma jamoasi bosh murabbiyi Samvel Babayandan chaqiruv olgan 21 futbolchidan iborat tarkibni e'lon qilgan edik. Shuni qayd etish kerakki, himoyachi Islom To'xtaxo'jaev milliy terma jamoa safiga yuqori harorati bilan etib kelgan va uning bugungi o'yindagi ishtiroki so'roq ostida. Tarkibdagi boshqa futbolchilar esa o'yinga tayyor. E'tiborlisi, Livanga qarshi kechadigan bu o'yinda bir necha yosh futbolchilar — Jamshid Boltaboev, Otabek Shukurov, Javlon Mirabdullaev, Akromjon Komilov, Azimjon Ahmedov, Doston Hamdamov O'zbekiston milliy terma jamoasi safida debyut uchrashuvini o'tkazishi mumkin. O'zbekiston milliy terma jamoasining navbatdagi rasmiy o'yinlari Jahon chempionati-2018 ikkinchi saralash bosqichi doirasida mart oyida bo'lib o'tadi. Babayan shogirdlari 24 mart kuni Filippin, 29 mart kuni esa Bahraynni Toshkentda qabul qiladi. Ayni vaqtda O'zbekiston milliy terma jamoasi ikkinchi saralash bosqichida 6 o'yindan keyin 15 ochko to'plagan holda, “H” guruhida ikkinchi o'rinni egallab turibdi. Birinchi o'rindagi KXDR terma jamoasi hisobida 7 o'yindan keyin 16 ochko bor.
— deya xabar beradi uff.uz nashri.