Shu kunlarda erkin kurash bo'yicha O'zbekiston terma jamoasi a'zolari Belarus poytaxti Minsk shahrida navbatdagi o'quv-mashg'ulot yig'inini o'tkazishyapti. Terma jamoamiz a'zolari ushbu yig'indan so'ng 18-19 fevral kunlari uch karra Olimpiada o'yinlari g'olibi Aleksandr Medved sovrini uchun o'tkaziladigan an'anaviy xalqaro turnirda qatnashadilar.
Ma'lumki, joriy yilning 18-20 mart kunlari Qozog'iston poytaxti Astana shahrida “Rio-2016” Olimpiada o'yinlarining yo'llanmalari o'ynaladigan qit'aviy saralash musobaqasi o'tkaziladi. Belarusda tashkil etilgan o'quv-mashg'ulot yig'ini aynan ushbu nufuzli musobaqa oldidan tayyorgarlik bosqichi vazifasini o'tab beradi.
Minsk shahriga yo'l olgan terma jamoamiz tarkibidan Nodirjon Safarov, Abbos Rahmonov (har ikkisi – 57 kg), Ixtiyor Navro'zov (-70 kg), Bekzod Abdurahmonov (-74 kg), Umid Ismanov, Soslan Tigiev (har ikkisi – 86 kg), Xusanboy Rahimov, Magomed Ibragimov (har ikkisi – 97 kg), Hasanboy Rahimov (-125 kg). Murabbiylar: Aleksandr Nedorezov, Arsen Sharashenidze. Hakamlar brigadasidan Tuymurod Adizov o'rin olgan.
Ma'lumot uchun. 2016 yilning 17-21 fevral kunlari Bangkok shahri (Tailand)da erkin kurash bo'yicha Osiyo chempionati o'tkaziladi. Mazkur qit'a chempionatida “Rio-2016” o'yinlarining litsenziyalari o'ynalmaganligi bois terma jamoa murabbiylari Osiyo chempionatiga ikkinchi raqamli sportchilarni yuborishga qaror qilgan. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.