13 fevral kuni Malayziya superligasi bahslari start olganidan muxlislarimizning xabarlari bor. Bu yil ushbu yurtning oliy divizionida uch nafar o'zbekistonlik futbolchi to'p surmoqda: Vohid Shodiev (“Perak”), Lutfulla To'raev (“Felda Yunayted”) hamda Dilshod Sharofiddinov (“T-Tim”).
Aslida “Perak” safidagi legionerlarimiz soni hozirda ikki nafar bo'lishi lozim edi. Biroq yarim himoyachi Oybek Qilichev ma'lum muddatga hozircha yana o'zimizga qaytishga majbur bo'ldi. Bu borada Ipox shahri klubi prezidenti Dato Seri Abdul Puxat Bin Mat Nayan Malayziya ommaviy axborot vositalari uchun 1-turning “Perak” – “Kelantan” (0:0) uchrashuvidan so'ng rasmiy bayonot berdi.
- “Perak” klubi shuni ma'lum qiladiki, uyda “Kelantan”ga qarshi o'tkazgan o'yinimizda muxlislarimizning ajoyib qo'llab-quvvatlashlari uchun butun jamoamiz ularga o'z minnatdorchiligini bildiradi (izoh: uchrashuvga 21000 tomoshabin tushgan, – “SA”). Bunday qo'llab-quvvatlash, albatta, futbolchilarimiz maydonda bor kuchlarini berib o'ynashlari uchun juda muhim omil bo'ldi. Bu hol, shak-shubhasiz, o'yinchilarimizga ruhiy tomondan katta yordam vazifasini bajardi. “Perak” futbol klubi butun mavsum davomida ishqibozlarning aynan huddi shunday tarzda qo'llab-quvvatlashlariga umid qilib qoladi va bu holat davomiy va doimiy bo'lishligiga ishonadi. Chunki, birinchidan, klubimiz buyuk tarixga ega va, eng asosiysi, jamoamiz muxlislari boshqa klublar ishqibozlaridan yaqqol ajralib turishadi.
Shuningdek, “Perak” klubi o'zbekistonlik futbolchi Oybek Qilichev bilan yuzaga kelgan texnik muammo – chempionat uchun u ma'lum sabablarga ko'ra ro'yxatdan o'tkazilmay qolgani uchun o'z ishqibozlaridan uzr so'raydi. Biz Malayziya futbol assotsiatsiyasi reglamentini hurmat qilamiz. Mavsumoldi o'rtoqlik bahslarida Oybek Qilichev qanaqangi ajoyib o'yinchi ekanligini namoyish etishga muvaffaq bo'lgandi. Buni hammangiz ko'rdingiz.
Albatta, endi biz uni ikkinchi davradan jamoamizga olib kelishga bor kuchimiz va bor imkoniyatlarimizni ishga solamiz. Va kelajakda unga uzoq muddatli shartnoma taklif qilishni ko'zlaganmiz.

— deya xabar beradi uff.uz nashri.