O'tgan haftada futbol muxlislari bir-biridan qiziqarli voqea, ajoyib o'yin va kutilmagan natijalar guvohiga aylanishdi. An'anaga sodiq qolgan holda, bo'lib o'tgan muhim hodisalarga jahon karikatura namoyondalarining ijodlari orqali ta'rif berib o'tamiz.
Engilmas Enrike
Luis Enrike qo'li ostida "Barselona" jamoasi mana 30 o'yindirki mag'lubiyat nima ekanini bilmay kelmoqda. So'nggi o'yinda kataloniyaliklar “Selta”ga qarshi bahs olib bordi va 6:1 hisobida yirik hisobda g'alabaga erishdi. Ispaniyada engilmas “Barselona”ni EChLda “Arsenal” to'xtata olarmikan? Buni biz yaqin orada bilib olamiz.
Messi va Suares ijrosidagi qoyilmaqom penalti
“Barselona” klubining etakchilari Lionel Messi va Luis Suares “Selta”ga qarshi (6:1) o'yinda kiritgan noan'anaviy penaltisi internet olamini larzaga keltirdi. Kimdir ushbu goldan hayratga tushgan bo'lsa, kimdir ularning “qilig'i”ni tanqid qildi va raqibga hurmatsizlik deya ta'rifladi. Yana kimlardir ushbu juftlik tomonidan amalga oshirilgan penaltidan xato topishga ham ulgurdi.
APLda nima gap?
Angliya Premer-ligasi o'z muxlislarini hayratlantirishda davom etmoqda. “Manchester Yunayted” 26-turda “Sanderlend” mehmoni bo'lib, kutilmaganda (har holda “MYu” muxlislari kutmagan-da) 1:2 hisobida mag'lubiyatga uchratdi. “Qizil iblislar” o'z tarixida ilk bor “Sanderlend” maydonida mag'lub bo'lishdi.
“Chelsi” hujumchisi Diego Kosta mashg'ulotlar vaqtida burnidan jarohat olib, “Nyukasl”ga qarshi 26-turda maxsus niqob bilan maydonga tushdi. O'sha niqob unga o'zgacha kuch bag'ishladi shekilli, ispaniyalik (asli braziliyalik) futbolchi joriy mavsumdagi eng yaxshi o'yinlaridan birini o'tkazdi. Diego “Zorro”ning xatti-harakatlari evaziga jamoa esa 5:1 hisobida zafar quchdi.
APL peshqadami “Lester” 26-turning markaziy bahsida “Arsenal”ga 1:2 hisobida yutqazib qo'ydi. “To'pchilar”ga qarshiy o'yinda Simpsonning olgan qizil kartochkasi “tulkilar”ni omadsizlikka boshladi. Zero, o'yindan so'ng Raneri chetlatilish bo'lmaganida uning jamoasi g'alaba qozonishini aytib o'tdi. Eng qizig'i, joriy mavsumda faqatgina Arsen Venger jamoasi “Lester”ni har ikki davrada mag'lubiyatga uchrata olgan.
“Yuventus” ishonchli tarzda “Skudetto” tomon yo'l olmoqda
Mavsum boshida muammolarga duch kelgan “Yuventus” hozirga kelib hech kimni ayab o'tirmayapti. Ketma-ket 15 ta g'alabaga erishgan turinliklar nihoyat musobaqa jadvalining “cho'qqi”siga chiqib olishdi. Bunga hatto “Napoli” ham to'sqinlik qila omadi.
Qolgan-qutganlar
Messi kimoshdi savdoda Ronaldudan ustun kelib, 32 mln evro evaziga “Ferrari” avtomobilini xarid qilgani ma'lum bo'lgach, argentinalik futbolchi ushbu xabarlarga o'z munosabatini bildirdi. U o'yinchoq mashina bilan suratga tushib, sotib olgan “Ferrari”si aynan shu ekanini aytib o'tgan.
“PSJ” hujumchisi Zlatan Ibragimovich Frantsiya chempionatida tengsiz ekanini namoyish qilmoqda. Shvetsiyalik futbolchi mamlakat chempionati va Kubok bahslarida hech qaysi raqibni golsiz qoldirmayapti. Uning “sharofati” bilan Frantsiya chempionati haqiqiy monopoliyaga aylanib qoldi.
Pep Gvardiola sobiq shogirdi Busketsni “Manchester Siti”ga olib kelmoqchi. Biroq, Luis Enrike uning xizmatlariga muhtoj va u bilan shartnoma uzaytirilishi kutilmoqda. Ko'ramiz, ispaniyalik yarim himoyachi kimning gapiga quloq solar ekan.
Yuqorida tasvirlangan karikaturalar Sizga manzum bo'ldi, deb umid qilamiz. Mazkur ijod namunalarini siz-u bizlarga hadya qilayotgan Omar Momani, Zezo Cartoons hamda beINSports’ga o'z minnatdorchiligimizni bildiramiz.
— deya xabar beradi uff.uz nashri.