Futbol afsonalaridan biri Ronaldino yaqinda Sport360 portaliga eksklyuziv intervyu berdi. Ham terma jamoalar, ham klublar futbolida birdek yorqin iz qoldirgan «afsungar» suhbat davomida birinchi raqamli sport turiga umumiy munosabati va kelajak umidlariga to'xtalib, yana Rivaldo hamda Ronaldo ijrosidagi o'yinlarni yodga oldi.
Asosiysi, Ronaldino o'z faoliyatidan to'la qoniqish hosil qilgan. U bu borada shunday deydi: «Futbolchilik faoliyatim - bolalik orzularimning ro'yobi. Chunonchi, doimo taniqli futbolchi bo'lishni xohlaganman va bu amalga oshdi. Yoshlarga qaysi tarafdandir ibrat bo'lganimdan bag'oyat xursandman.
Zero, ular endi futbol yulduziga aylanish imkonsiz ish emasligini bilishadi. Aslida maydonda kimgadir o'xshashga umuman intilgan emasman. Odamlar meni shundayligimcha sevishadi - bu juda muhim. Faoliyatimga bog'liq baxtli lahzalar shu qadar ko'pki, ulardan eng yaxshisini ajratib ham ko'rsatolmayman. Umuman, futbol - bu hayotim. Bugun ham hech narsa o'zgarmadi - futbol va hayot men uchun hamon yaxlit narsa»
Ronaldinoning etuk futbolchiga aylanishi yoshligidayoq oydinlashgandi. Deylik, bitta futzal o'yini ko'pchilikning yodida muhrlanib qolgan. Zero, o'sha uchrashuvda 13 yoshli Ronaldino o'z jamoasining barcha gollariga mualliflik qilgandi. 3-4ta yoki 5-6ta emas, naq 23ta (!) golga. U jonajon klubi - «Gremio»da tezda ko'zga tashlangan. Deylik, vaziyatlarning birida JCh-94 g'olibi Dungani ajoyib tarzda ojiz qoldirgandi - to'pni ustalik bilan uning boshi orqali darvozaga yo'llagan.
Umuman, Ronni mislsiz textik qobiliyati bilan barcha-barchani hayratga solardi. U «PSJ» va «Barselona»da ham, «Milan» va «Flamengo»da ham aql bovar qilmas xatti-harakatlarni amalga oshirib, nafaqat raqiblari, balki muxlislarni-da gangitib qo'yardi. Braziliyalik etuk ijrochi umumiy hisobda klub miqyosida 13ta, terma jamoalar darajasida esa 4ta sovrin yutgan. Shuningdek, ketma-ket 2 yil (2004, 2005) FIFA talqini bo'yicha jahonning eng yaxshi futbolchisi, deb topilgan.
Qiziq, unga nima muhimroq sanalgan - mukofotlarmi yoki muxlislarga xursandchilik ulashish? Ronaldino bunga javoban shunday deydi: «Unisi ham, bunisi ham. O'zim yoqtirgan mashg'ulot bilan shug'ullanganimdan baxtiyorman. Lekin tabiatan mag'lubiyatni aslo jinim suymaydi. Sevimli o'yiningda g'alaba qozonish imkoniyati borligini bilib harakatlanishing naqadar yaxshi. Bu shunchaki, mo''jiza».
Ronaldino faoliyatini «Barselona»siz tasavvur qilish mumkin emas. U Kataloniyada gollandiyalik Frank Raykaard qo'l ostida to'p surib, 2003-2008 yillar oralig'ida 207 marta maydonga tushgan, 94ta gol urib, 69tasiga assistentlik qilgan.
Xullas, bo'lajak yulduz Lionel Messi, ispaniyalik «metronom» Xavi Ernandes, portugaliyalik pleymeyker Deku, kamerunlik «vahshiy» Samuel Eto'O kabilar bilan elkama-elka o'ynagan braziliyalik uzunsoch 2 marta La liga g'olibiga aylangan, 2005-2006 yillar mavsumida esa ChL kubogini boshi uzra baland ko'targan. Ko'pchilik Ronnining «Chelsi»ga qarshi bahsda raqibning butun himoyasini betakror «fint»lar seriyasi yordamida qanday «jinni» qilganini eslab qolgan. 2005 yilgi «El-klasiko»da esa «dubl» qayd etib, hattoki, «Real» muxlislari olqishiga sazovor bo'lgan.
«Barselona»dagi birinchi va oxirgi golim o'rtasidagi vaqt to'laligicha sehrli, aql bovar qilmas davr hisoblanadi. O'sha damlarni eslasam, barchasini qayta boshdan o'tkazgandek bo'laman, go'yo. Frank Raykaard - ajoyib murabbiy, zo'r strateg, futbol professori va shunchaki, yaxshi do'st. Uning oqilligi tufayli o'z ishimdan chinakamiga rohatlanganman.
Davomi InterFUTBOL gazetasi blogida.
— deya xabar beradi uff.uz nashri.