Futzal bo'yicha Osiyo chempionati-2016 chorak final bosqichi oldidan ushbu bosqichga etib kelgan jamoalar bosh murabbiylari ishtirokida matbuot anjumani tashkil etildi. Uning ikkinchi qismida Eron, Qirg'iziston, Vetnam hamda Yaponiya terma jamoalari murabbiylari ishtirok etdi. Muhammad Nazim (Eron terma jamoasi bosh murabbiyi): Ertaga Kolumbiyada bo'lib o'tadigan Jahon chempionatiga yo'llanma beradigan o'yyinlar bo'ladi va raqibimiz Qirg'iziston terma jamoasi haqida faqat ijobiy fikrlarni bildirish mumkin. Ular sinxron tarzda ajoyib himoyalanishi va hujum qilishini alohida ta'kidlab o'tgan bo'lardim. Raqibimiz o'yindan o'yinga kuchyib boryapti. Jamoamiz sardori jarohat oldi va katta ehtimol bilan chorak finalda o'ynay olmaydi. Lekin agar keyingi bosqichlarga yo'lanma olsak, uni yarim final va final bosqichlarida maydonga tushiramiz. Andrey Polxovskiy (Qirg'iziston terma jamoasi bosh murabbiyi): Eron terma jamoasi qanday darajada ekanligini hamma biladi. Ular Osiyo futzalini boshqa darajaga olib chiqqan jamoa. Ularning o'yiniga keladigan bo'lsak, raqibga deyarli o'ynashga imkon berishmaydi va o'yinni doimo nazorat qilib borishadi. Ertaga Osiyoning eng kuchli jamoasiga qarshi o'ynaymiz. Lekin bilasizmi, nazariy jihatdan agar juda kuchli va kuchsizroq jamoa bir-biriga qarshi 50 o'yin o'tkazsa, ulardan birida kuchsiz jamoa g'alaba qozonib qolishi mumkin. Ertaga o'sha kuchsiz jamoa yutadigan o'yin bo'lishi mumkin. Biz avvaldan agar guruhda ikkinchi o'rinni olsak, Eronga qarshi o'ynashimizni bilardik. Shuning uchun ham ruxan bu o'yinga tayyorlanganmiz. Bruno Garsiya (Vetnam terma jamoasi bosh murabbiyi): Yaponiya terma jamoasi musobaqa favoritlaridan biri. Ular ohirgi ikki chempionatda g'olib bo'lgan. Lekin har qanday jamoaning ham ojiz nuqtalari bor. Biz ulardan foydalanishga harakat qilamiz. Agar buni uddasidan chiqa olmasak, beshinchi yo'llanma uchun kurashamiz. Migel Rodrigo (Yaponiya terma jamoasi bosh murabbiyi): Ertgaga qiyin o'yin bo'lishini kutyapman. Vetnam bosh murabbiyi janob Brunoni yaxshi bilaman. Biz bu jamoa bilan Yaponiyada ikkita o'rtoqlik uchrashuvi o'tkazdik va faqatgina so'nggi daqiqalarda gollar urib, g'alaba qozona olgandik. Lekin bu rasmiy o'yin va chempionatning muhim pallasi. Shunday ekan bu safargi o'yin boshqacha bo'ladi. Vetnam Tailandga qarshi fantastik o'yin o'tkazdi. Garchi Tailandning super yulduzlari o'yin taqdirini hal qilib ketgan bo'lsada, Vetnamning qarshiligi kuchli bo'ldi. Bizga qarshi o'yin ham shunga yaqin kechadi, menimcha.
— deya xabar beradi uff.uz nashri.