Qatar poytaxti Doha shahrida davom etayotgan jahon chempionatida kecha yana besh vazn toifasida janglar o'tkazilib, hal qiluvchi final bosqichiga chiqqan sportchilar nomi ma'lum bo'ldi. Bu haqida O'zbekiston Milliy Olimpiya Qo'mitasining Olympic.uz saytida xabar berib o'tilgan.
Kecha o'tkazilgan yarim final janglarining yakuniga ko'ra uch nafar hamyurtlarimiz Elnur Abduraimov (60 kg), Elshod Rasulov (81 kg) va Bahodir Jalolov (+91 kg) jahon chempionatining bronza medallariga sazovor bo'ldilar.
Shu o'rinda ta'kidlash joizki, ushbu jahon chempionatiga qadar O'zbekiston terma jamoasi mustaqil jamoa sifatida 11 bor jahon chempionatida ishtirok etgan va bir musobaqada uchta bronza medaliga sazovor bo'lmagan. 2003 yili Tailandda, 2005 yili Xitoyda, 2009 yili Italiyada, 2011 yili Ozarbayjonda bo'lib o'tgan jahon chempionatlarida hamyurtlarimiz ikkitadan bronza medali bilan taqdirlanganlar.
Yana bir jihat, Qatarda o'tayotgan jahon chempionatida yana uch nafar charm qo'lqop ustalarimiz hal qiluvchi final bosqichda oltin medallar uchun ringga chiqadilar. Bunday holat 1999 yili Xyuston (AQSh)da o'tkazilgan jahon chempionatida kuzatilgan. O'shanda Muhammadqodir Abdullaev (-63,5 kg) va O'tkirbek Xaydarov (-75 kg) oltin, To'lqinboy Turg'unov (-57 kg) esa kumush medalga sazovor bo'lishgan edi.
Umid qilamizki, 14 oktyabr kuni ringga chiqadigan yurtdoshlarimiz bu borada ham avvalgi ko'rsatkichlarni yanada yaxshilashga astoydil xarakat qiladilar. Zero, Doha ringlarida o'tayotgan jahon chempionatida terma jamoamiz a'zolari har tamonlama kuchli jamoa bo'lib shakllanganliklarini bir yo'la 6 nafar bokschimizni yarim finalga chiqqanligi bilan ham isbotlashdi.
Demak, ertaga -49 kg, -56 kg, -64 kg, -75 kg, va -91 kg vazn toifalarida dastlabki final janglari o'tkaziladi. Shu kuni Murodjon Ahmadaliev (-56 kg) irlandiyalik Maykl Konlonga, Fazliddin G'oipnazarov (-64 kg) rossiyalik Vitaliy Dunaytsevga, Bektemir Meliqo'ziev (-75 kg) esa Kuba vakili Arlen Lopesga qarshi bahs yuritadilar. Qolgan vazn toifalaridagi final janglari 15 oktyabr kuni o'tkaziladi.
Barcha vazn toifalarida finalga etib kelgan juftliklar bilan O'zbekiston Milliy Olimpiya Qo'mitasining rasmiy sayti bo'lgan Olympic.uz'da tanishib olishingiz mumkin.
— deya xabar beradi uff.uz nashri.